Zabbuli 106

¹Mumutendereze Mukama! Mwebaze Mukama kubanga mulungi, kubanga okwagala kwe tekuggwaawo emirembe gyonna.

²Ani ayinza okwogera ku bikulu Mukama by’akola n’abimalayo, oba okumutendereza obulungi nga bw’asaanira?

³Balina omukisa abalina obwenkanya, era abakola ebituufu bulijjo.

⁴Onzijukiranga, Ayi Mukama, bw’obanga okolera abantu bo ebirungi; nange onnyambe bw’olibalokola,

⁵ndyoke neeyagalire wamu n’abalonde bo nga bafunye ebirungi, nsanyukire wamu n’eggwanga lyo, era ntendererezenga mu bantu bo.

⁶Twonoonye, nga bajjajjaffe bwe baakola; tukoze ebibi ne tusobya nnyo.

⁷Bakadde baffe tebaafaayo kujjukira ebyamagero bye wakola nga bali mu Misiri; n’ebyekisa ebingi bye wabakolera tebaabijjukira, bwe baatuuka ku Nnyanja Emyufu ne bakujeemera.

⁸Naye Mukama n’abalokola, olw’erinnya lye, alyoke amanyise amaanyi g’obuyinza bwe obungi.

⁹Yaboggolera Ennyanja Emyufu, n’ekalira; n’abakulembera okubayisa mu buziba ng’abayita ku lukalu mu ddungu.

¹⁰Yabawonya abalabe baabwe; n’abanunula mu mikono gy’abo ababakyawa.

¹¹Amazzi ne gabuutikira abalabe baabwe; ne wataba n’omu awona.

¹²Olwo ne bakkiriza ebigambo bye, bye yabasuubiza; ne bayimba nga bamutendereza.

¹³Waayita akabanga katono ne beerabira ebyo byonna bye yakola; ne batawulirizanga kubuulirira kwe.

¹⁴Bwe baatuuka mu ddungu, okwegomba ne kubasukkirira; ne bagezesa Katonda nga bali mu lukoola olwo.

¹⁵Bw’atyo n’abawa kye baasaba, kyokka n’abaleetera n’olumbe olw’amaanyi.

¹⁶Nga bali mu lusiisira baakwatirwa obuggya eri Musa ne Alooni abalonde ba Mukama.

¹⁷Ettaka ne lyasama ne limira Dasani; Abiraamu ne banne ne libasaanyaawo.

¹⁸Omuliro ne gukoleera ne gukwata abagoberezi baabwe; ennimi z’omuliro ne zookya aboonoonyi.

¹⁹Bwe baali e Kolebu ne beekolera ennyana; ne basinza ekifaananyi ekyo kye baakola mu byuma bye baasaanuusa.

²⁰Ekitiibwa kya Katonda ne bakiwaanyisaamu ekibumbe ekifaanana ente erya omuddo.

²¹Ne beerabira Katonda eyabanunula, eyabakolera ebintu ebikulu bwe bityo mu Misiri,

²²ebyamagero bye yabakolera mu nsi ya Kaamu, n’ebikolwa eby’entiisa ku Nnyanja Emyufu.

²³N’agamba nti, Ajja kubazikiriza. Naye Musa, omulonde we, n’ayimirira mu maaso ge n’amwegayirira, obusungu bwe ne bumuggwaako n’atabazikiriza.

²⁴Baanyooma eby’ensi ennungi, kubanga ekisuubizo kye tebaakirinaamu bwesige.

²⁵Beemulugunyiriza mu weema zaabwe, ne batagondera ddoboozi lya Mukama.

²⁶Kyeyava yeerayirira nti alibazikiririza mu ddungu,

²⁷era nga n’abaana baabwe balisaasaanira mu mawanga ne bafiira eyo.

²⁸Baatandika okusinza Baali e Peoli; ne balya ebyaweebwangayo eri bakatonda abataliimu bulamu.

²⁹Ne banyiiza Katonda olw’ebikolwa byabwe ebibi; kawumpuli kyeyava abagwamu.

³⁰Naye Finekaasi n’ayimirira wakati waabwe ne Katonda, kawumpuli n’agenda.

³¹Ekyo ne kimubalirwa nga kya butuukirivu emirembe gyonna.

³²Bwe baatuuka okumpi n’amazzi ag’e Meriba ne banyiiza Mukama, ne baleetera Musa emitawaana;

³³kubanga baajeemera ebiragiro bye, ne kimwogeza n’ebigambo ebitaali bya magezi.

³⁴Abantu be baalwanyisa tebaabazikiriza nga Mukama bwe yali abalagidde,

³⁵naye beetabika n’abannaggwanga ago ne bayiga empisa zaabwe.

³⁶Baasinza ebifaananyi ebikole n’emikono eby’amawanga ago ne bibafuukira omutego.

³⁷Baawaayo batabani baabwe ne bawala baabwe eri bakatonda abo.

³⁸Ne bayiwa omusaayi gwa batabani baabwe ne bawala baabwe abataliiko musango, be baawangayo eri ebifaananyi ebikole n’emikono Abakanani bye baakola, ensi n’eyonoonebwa n’omusaayi gwabwe.

³⁹Beeyonoona olw’ebyo bye baakola, ebikolwa byabwe ne bibafuula abataliimu nsa nga bavudde ku Katonda waabwe.

⁴⁰Mukama kyeyava asunguwalira abantu be, n’akyawa ezzadde lye.

⁴¹N’abawaayo eri amawanga amalala, abalabe ne babafuga.

⁴²Abalabe baabwe ne babanyigiriza, ne babatuntuza nnyo ddala.

⁴³Yabawonyanga abalabe baabwe emirundi mingi, naye obujeemu ne bubalemeramu, ebibi byabwe ne bigenda nga bibasaanyaawo.

⁴⁴Naye bwe yawulira okukaaba kwabwe, n’abakwatirwa ekisa;

⁴⁵ku lwabwe, n’ajjukira endagaano ye; okwagala kwe okungi ne kumuleetera okukyusa ekirowoozo kye.

⁴⁶N’abaleetera okusaasirwa abo abaabawambanga.

⁴⁷Ayi Mukama Katonda, otulokole, otukuŋŋaanye, otuggye mu mawanga, tulyoke twebazenga erinnya lyo ettukuvu, era tusanyukenga nga tukutendereza.

⁴⁸Mukama atenderezebwenga, Katonda wa Isirayiri, emirembe n’emirembe. Abantu bonna ka boogere nti, “Amiina!” Mumutendereze Mukama.