Zabbuli 33

¹Muyimbire Mukama n’essanyu mmwe abatuukirivu; kisaanira abalongoofu okumutenderezanga.

²Mutendereze Mukama n’ennanga, mumukubire ennyimba ku ntongooli ey’enkoba ekkumi.

³Mumuyimbire oluyimba oluggya; musune enkoba ze ntongooli n’amagezi nga bwe muyimba mu ddoboozi ery’omwanguka olw’essanyu.

⁴Kubanga ekigambo kya Mukama kituufu era kya mazima; mwesigwa mu buli ky’akola.

⁵Mukama ayagala obutuukirivu n’obwenkanya. Ensi ejjudde okwagala kwa Mukama okutaggwaawo.

⁶Mukama yayogera kigambo, eggulu ne likolebwa; n’assiza omukka mu kamwa ke eggye lyonna ery’omu ggulu ne litondebwa.

⁷Yakuŋŋaanya amazzi g’ennyanja mu ntuumu, agayanja n’agasibira mu masitoowa gaago.

⁸Ensi yonna esaana etyenga Mukama, n’abantu ab’omu mawanga gonna bamussengamu ekitiibwa;

⁹kubanga yayogera bwogezi n’etondebwa, n’alagira n’eyimirira nga nywevu.

¹⁰Mukama asansulula enteekateeka y’amawanga; alemesa abantu okutuukiriza bye bagenderera.

¹¹Naye enteekateeka za Mukama zibeerawo nga nywevu emirembe gyonna; n’ebigendererwa by’omutima gwe bya lubeerera.

¹²Lirina omukisa eggwanga eririna Katonda nga ye Mukama waalyo, ng’abantu baalyo yabalonda babeere bantu be.

¹³Mukama asinziira mu ggulu n’alaba abaana b’abantu bonna;

¹⁴asinziira mu kifo kye mw’abeera n’alaba abantu bonna abali ku nsi.

¹⁵Ye y’ategeka ebirowoozo byabwe bonna ne yeetegereza byonna bye bakola.

¹⁶Tewali kabaka asobola kuwona olw’obunene bw’eggye lye; era tewali mulwanyi ayinza kuwona olw’amaanyi ge amangi.

¹⁷Okusuubira embalaasi yokka okukuwanguza olutalo kuteganira bwerere; newaakubadde erina amaanyi mangi naye tesobola kulokola.

¹⁸Naye amaaso ga Mukama galabirira abo abamutya; abalina essuubi mu kwagala kwe okutaggwaawo,

¹⁹abawonya okufa, era abawonya enjala.

²⁰Tulindirira Mukama nga tulina essuubi, kubanga ye mubeezi waffe era ye ngabo yaffe.

²¹Mu ye emitima gyaffe mwe gijaguliza, kubanga twesiga erinnya lye ettukuvu.

²²Okwagala kwo okutaggwaawo kubeerenga mu ffe, Ayi Mukama, ng’essuubi lyaffe bwe liri mu ggwe.