Zabbuli 10

¹Lwaki otwekwese, Ayi Mukama? Lwaki otwekwese mu biseera eby’emitawaana?

²Omubi, mu malala ge, ayigganya abanafu; muleke agwe mu nkwe ezo z’asaze.

³Kubanga omubi yeewaana ng’anyumya ku bibi ebiri mu mutima gwe, agabula aboomululu n’avuma Mukama.

⁴Omubi mu malala ge tanoonya Katonda.

⁵Buli ky’akola kimugendera bulungi. Amateeka go tagafaako, era n’abalabe be abanyooma.

⁶Ayogera mu mutima gwe nti, “Sikangibwa, nzija kusanyuka emirembe gyonna.”

⁷Mu kamwa ke mujjudde okukolima n’obulimba awamu n’okutiisatiisa; ebigambo bye bya mutawaana era bibi.

⁸Yeekukuma mu byalo okutemula abantu abataliiko musango. Yeekweka ng’aliimisa b’anatta.

⁹Asooba mu kyama ng’empologoma, ng’alindirira okuzinduukiriza abateesobola. Abakwasa n’abatwalira mu kitimba kye.

¹⁰B’abonyaabonya bagwa wansi ne babetentebwa ng’amaanyi g’omubi gabasukkiridde.

¹¹Ayogera mu mutima gwe nti, “Katonda yeerabidde, amaaso ge agakwese, era takyaddayo kubiraba.”

¹²Golokoka, Ayi Mukama, ozikirize omubi, Ayi Katonda; abanaku tobeerabiranga.

¹³Omuntu omubi ayinza atya okukunyooma, Ayi Katonda, n’agamba mu mutima gwe nti “Sigenda kwennyonnyolako?”

¹⁴Naye ggwe, Ayi Katonda, ennaku zaabwe n’okubonaabona kwabwe obiraba era ojja kubikolako. Ateesobola yeewaayo mu mikono gyo, kubanga gwe mubeezi w’abatalina bakitaabwe.

¹⁵Malawo amaanyi g’omwonoonyi, muyite abyogere ebyo ebibadde bitajja kuzuulwa.

¹⁶Mukama ye Kabaka emirembe n’emirembe. Amawanga galizikirizibwa mu nsi ye.

¹⁷Mukama awulira okwetaaga kw’ababonyaabonyezebwa, ogumye emitima gyabwe; otege okutu kwo obaanukule.

¹⁸Olwanirira abataliiko bakitaabwe n’abajoogebwa; omuntu obuntu ow’oku nsi n’ataddayo kubatiisa.