Zabbuli 59

¹Ayi Katonda wange, mponya abalabe bange; onnwanirire, abantu bwe bangolokokerako.

²Omponye abakola ebitali bya butuukirivu, era ondokole mu batemu.

³Laba banneekwekeredde nga banteega okunzita. Abasajja ab’amaanyi abakambwe banneekobera, Ayi Mukama, so nga soonoonye wadde okubaako ne kye nsobezza.

⁴Sirina kye nsobezza, naye bateekateeka okunnumba. Tunuulira obuzibu bwange, osituke, onnyambe.

⁵Ayi Mukama Katonda ow’Eggye, Katonda wa Isirayiri, golokoka obonereze amawanga gonna; abo bonna abasala enkwe tobasaasira.

⁶Bakomawo buli kiro, nga babolooga ng’embwa, ne batambulatambula mu kibuga.

⁷Laba, bwe bavuma! Ebigambo biwamatuka mu kamwa kaabwe ng’ebitala, nga boogera nti, “Ani atuwulira?”

⁸Naye ggwe, Ayi Mukama, obasekerera, era amawanga ago gonna oganyooma.

⁹Ayi Katonda, Amaanyi gange, nnaakwesiganga era nnaakutenderezanga, kubanga ggwe kigo kyange ekinywevu.

¹⁰Katonda wange anjagala anankulemberanga, ne ndyoka neeyagalira ku balabe bange.

¹¹Tobatta, Ayi Mukama, engabo yaffe, abantu bange baleme kwerabira; mu buyinza bwo obungi, baleke batangetange; n’oluvannyuma obakkakkanyize ddala.

¹²Amalala gaabwe n’ebyonoono ebiva mu kamwa kaabwe, n’ebigambo by’oku mimwa gyabwe leka byonna bibatege ng’omutego. Kubanga bakolima era ne boogera eby’obulimba.

¹³Bamaleewo n’ekiruyi kyo, bamalirewo ddala; amawanga gonna galyoke gategeere nga Katonda wa Yakobo y’afuga ensi yonna.

¹⁴Bakomawo nga buwungedde nga babolooga ng’embwa, ne batambulatambula mu kibuga.

¹⁵Banoonya emmere buli wantu mu kibuga, ne bawowoggana bwe batakkuta.

¹⁶Naye nze nnaayimbanga nga ntendereza amaanyi go; mu makya nnaayimbanga ku kwagala kwo; kubanga ggwe kigo kyange, era ggwe kiddukiro kyange mu buzibu bwange.

¹⁷Ggwe, Ayi Katonda, Amaanyi gange, nnaakuyimbiranga nga nkutendereza; kubanga ggwe kigo kyange, era ggwe Katonda wange, anjagala.