Zabbuli 30

¹Nnaakugulumizanga, Ayi Mukama, kubanga wannyimusa; n’otoganya balabe bange kunneeyagalirako.

²Ayi Mukama, nakukaabirira onnyambe, n’omponya.

³Ayi Mukama, omwoyo gwange waguggya emagombe, n’omponya ekinnya.

⁴Muyimbire Mukama nga mumutendereza, mmwe abatukuvu be; mutendereze erinnya lye ettukuvu.

⁵Kubanga obusungu bwe bwa kiseera buseera, naye obulungi bwe bwa mirembe gyonna. Amaziga gayinza okubaawo ekiro kyokka essanyu ne lijja nga bukedde.

⁶Bwe namala okunywera ne njogera nti, “Sigenda kusiguukululwa.”

⁷Ayi Mukama, bwe wanjagala, wanyweza olusozi lwange; naye bwe wankweka amaaso go ne neeraliikirira.

⁸Ggwe gwe nakoowoola, Ayi Mukama; ne nkukaabirira Mukama, onsaasire.

⁹“Kingasa ki bwe nzika mu kinnya ne nzikirira? Enfuufu eneekutenderezanga n’etegeeza abantu obwesigwa bwo?

¹⁰Mpuliriza, Ayi Mukama, onsaasire; Ayi Mukama, onnyambe.”

¹¹Ofudde okwaziirana kwange amazina; onnyambuddemu ebibukutu, n’onnyambaza essanyu.

¹²Omutima gwange gulemenga kusirika busirisi, wabula gukuyimbirenga ennyimba ez’okukutenderezanga. Ayi Mukama, Katonda wange, nnaakwebazanga emirembe gyonna.