Zabbuli 31

¹Ayi Mukama, ggwe kiddukiro kyange, leka nneme kuswazibwa. Ndokola mu butuukirivu bwo.

²Ontegere okutu kwo oyanguwe okunziruukirira. Beera ekiddukiro kyange eky’olwazi era ekigo eky’amaanyi eky’okumponya.

³Nga bw’oli olwazi lwange era ekigo kyange; olw’erinnya lyo onkulembebere era onnuŋŋamye.

⁴Omponye mu mutego gwe banteze; kubanga ggwe kiddukiro kyange.

⁵Nteeka omwoyo gwange mu mikono gyo; ondokole, Ayi Mukama, Katonda ow’amazima.

⁶Nkyawa abo abeesiga bakatonda abalala; nze nneesiga Mukama.

⁷Nnaajaguzanga ne nsanyukira mu kwagala kwo, kubanga olabye okubonaabona kwange era omanyi ennaku endi ku mwoyo.

⁸Tompaddeeyo mu balabe bange, naye otadde ebigere byange mu kifo ekigazi.

⁹Onsaasire, Ayi Mukama, kubanga ndi mu nnaku nnyingi; amaaso gange gakooye olw’ennaku; omwoyo gwange n’omubiri gwange nabyo binafuye olw’obuyinike.

¹⁰Obulamu bwange buweddewo olw’obunaku n’emyaka gyange ne giggwaawo olw’okusinda. Amaanyi gampweddemu olw’okwonoona kwange, n’amagumba ganafuye.

¹¹Abalabe bange bonna bansekerera, banneetamiddwa. Nfuuse ekyenyinyalwa mu mikwano gyange, n’abandaba mu kkubo banziruka.

¹²Nneerabiddwa ng’eyafa edda; nfuuse ng’ekibumbe ekyatifu.

¹³Buli ludda mpulirayo obwama nga bangeya; bye banteesaako nga basala olukwe okunzita.

¹⁴Naye nneesiga ggwe, Ayi Mukama; nga njogera nti, “Oli Katonda wange.”

¹⁵Entuuko zange ziri mu mikono gyo; ondokole mu mikono gy’abalabe bange n’abangigganya.

¹⁶Amaaso go ogatunuulize omuweereza wo; ondokole n’okwagala kwo okutaggwaawo.

¹⁷Ayi Mukama tondeka kuswazibwa, kubanga nkukoowoola; leka abo ababi baswale, era bagalamire emagombe nga basirise.

¹⁸Akamwa kaabwe akayogera eby’obulimba kasirisibwe, kubanga boogera ebitaliimu ku batuukirivu bo, nga babyogeza amalala n’okunyooma.

¹⁹Obulungi bwo, bwe waterekera abo abakutya nga buyitirivu, n’obuwa mu lwatu abo abaddukira gy’oli.

²⁰Obalabirira n’obawonya enkwe z’abalabe baabwe, n’obakuuma bulungi mu nnyumba yo, n’ennyombo z’abantu ne zitabatuukako.

²¹Mukama atenderezebwenga kubanga yandaga okwagala kwe okungi, bwe nnali mu kibuga kye baali bazingizza.

²²Bwe natya ennyo ne njogera nti, “Ngobeddwa mu maaso go.” Kyokka wampulira nga nkukaabirira n’onsaasira.

²³Mwagalenga Mukama abatukuvu be mwenna! Mukama akuuma abo abamwesiga, naye ab’amalala ababonereza mu bujjuvu.

²⁴Muddeemu amaanyi mugume omwoyo mmwe mwenna abalina essuubi mu Mukama.