Zabbuli 7

¹Ayi Mukama, Katonda wange, neesiga ggwe: ngobaako bonna abangigganya era omponye,

²si kulwa nga bantagulataagula ng’empologoma ne bankutulakutula obufiififi ne watabaawo amponya.

³Ayi Mukama, Katonda wange, obanga nkoze kino, era ng’engalo zange ziriko omusango,

⁴obanga waliwo andaze ebirungi nze ne si muyisa bulungi, oba nzibye omulabe wange awatali nsonga:

⁵Kale, abalabe bange baleke bangoberere bankwate, bankube wansi banninnyirire, banzitire mu nfuufu.

⁶Golokoka, Ayi Mukama, mu busungu bwo oziyize abalabe bange abajjudde obukambwe. Golokoka, Ayi Katonda wange, onnyambe ggwe asala omusango mu bwenkanya.

⁷Kuŋŋaanya bannaggwanga bonna okukwetooloola; obafuge ng’oli waggulu ennyo.

⁸Ggwe, Ayi Mukama, Ali Waggulu Ennyo, asalira amawanga gonna emisango, osale omusango gwange Ayi Mukama Ali Waggulu Ennyo ng’obutuukirivu bwange bwe buli, era n’amazima agali mu nze bwe gali.

⁹Ayi Katonda omutukuvu, akebera emitima n’emmeeme; okomye ebikolwa by’abakola ebibi: era onyweze abatuukirivu.

¹⁰Katonda Ali Waggulu Ennyo ye ngabo yange; alokola abo abalina omutima omulongoofu.

¹¹Katonda mulamuzi wa mazima; era alaga ekiruyi kye buli lunaku.

¹²Mukama awagala ekitala kye n’aleega omutego gwe ogw’obusaale.

¹³Era ategese ebyokulwanyisa ebissi; era akozesa obusaale obw’omuliro.

¹⁴Omuntu ajjudde ebibi afuna emitawaana, n’azaala obulimba.

¹⁵Asima ekinnya, n’akiwanvuya nnyo; ate n’akigwamu ye kye yasimye.

¹⁶Emitawaana gye gimwebunguludde; n’obukambwe bwe bumuddire.

¹⁷Nneebazanga Mukama olw’obutuukirivu bwe; nnaayimbanga nga ntendereza erinnya lya Mukama Ali Waggulu Ennyo.