Zabbuli 116

¹Mukama mmwagala, kubanga awulidde eddoboozi lyange n’okwegayirira kwange.

²Kubanga ateze okutu kwe gye ndi, kyennaavanga mmukoowoola ebbanga lyonna lye ndimala nga nkyali mulamu.

³Emiguwa gy’okufa gyansiba, n’okulumwa okw’emagombe kwankwata; ne nzijula ennaku nnyingi n’okutya.

⁴Ne ndyoka nkoowoola erinnya lya Mukama nti, “Ayi Mukama, ndokola.”

⁵Mukama wa kisa, era mutuukirivu; Katonda waffe ajjudde okusaasira.

⁶Mukama alabirira abantu abaabulijjo; bwe nnali mu buzibu obunene, n’andokola.

⁷Wummula ggwe emmeeme yange, kubanga Mukama abadde mulungi gy’oli.

⁸Kubanga ggwe, Ayi Mukama, owonyezza omwoyo gwange okufa, n’amaaso gange ogawonyezza okukaaba; n’ebigere byange n’obiwonya okwesittala,

⁹ndyoke ntambulirenga mu maaso ga Mukama mu nsi ey’abalamu.

¹⁰Nakkiriza kyennava njogera nti, “Numizibbwa nnyo.”

¹¹Ne njogera nga nterebuse nti, “Abantu bonna baliraba.”

¹²Mukama ndimusasula ntya olw’ebirungi bye ebingi bwe bityo by’ankoledde?

¹³Nditoola ekikompe eky’obulokozi, ne nkoowoola erinnya lya Mukama.

¹⁴Ndituukiriza obweyamo bwange eri Mukama, mu maaso g’abantu be bonna.

¹⁵Okufa kw’abatukuvu ba Mukama kwa muwendo nnyo eri Mukama.

¹⁶Ayi Mukama, onsumuluddeko ebyansiba n’onfuula wa ddembe, nange nnaakuweerezanga ennaku zonna.

¹⁷Ndiwaayo ekiweebwayo eky’okwebaza, ne nkoowoola erinnya lya Mukama.

¹⁸Ndituukiriza obweyamo bwange eri Mukama, mu maaso g’abantu be bonna,

¹⁹mu mpya z’ennyumba ya Mukama; wakati wo, ggwe Yerusaalemi. Mutendereze Mukama.