Kutoka 1

1Haya ndiyo majina ya wana wa Israeli waliokwenda Misri pamoja na Yakobo, kila mmoja akiwa na jamaa yake: 2Reubeni, Simeoni, Lawi na Yuda, 3Isakari, Zabuloni na Benyamini, 4Dani na Naftali, Gadi na Asheri. 5Wazao wote wa Yakobo walikuwa watu sabini. Yusufu mwenyewe alikuwa tayari yuko Misri. 6Baada ya muda Yusufu alikufa, vivyo hivyo ndugu zake wote na watu wote wa kizazi kile. 7Lakini Waisraeli walizaa sana; waliongezeka kwa wingi mno, wakazidi kuwa na nguvu nyingi, hata wakaijaza nchi.

8Kisha mfalme mpya alitawala Misri, mfalme ambaye hakuwahi kusikia habari za Yusufu. 9Akawaambia watu wake, “Angalieni jinsi taifa la Waisraeli lilivyokuwa kubwa mno na lenye nguvu kutuzidi. 10Haya, lazima tuwazidi kwa werevu, la sivyo wataongezeka zaidi. Kisha vita vikitokea, wanaweza kujiunga na adui zetu, wakapigana nasi, wakatoroka kutoka nchi hii.” 11Kwa hiyo Wamisri waliweka wasimamizi juu yao ili wawakandamize kwa mizigo mizito, nao Waisraeli wakamjengea Farao miji ya kuhifadhia akiba, Pithomu na Ramesesi. 12Lakini kadiri walivyozidi kukandamizwa, ndivyo walivyozidi kuongezeka na kuenea, hata Wamisri wakawachukia Waisraeli na kuwaogopa. 13Wamisri waliwalazimisha Waisraeli kufanya kazi bila huruma, 14na wakayafanya maisha yao kuwa machungu kwa kazi ngumu ya kukanda udongo, kufyatua matofali na kufanya kila aina ya kazi mashambani. Katika kazi hizo zote waliwatumikisha bila huruma. 15Mfalme wa Misri aliwaambia pia wakunga Waebrania, mmoja aitwaye Shifra na mwingine Pua. 16Alisema, “Mnapowasaidia wanawake wa Kiebrania kujifungua, waangalieni wanapopiga magoti juu ya mawe ya kuzalia. Akiwa mtoto wa kiume, mwueni; akiwa wa kike, mwacheni aishi.” 17Lakini wakunga walimcha Mungu. Hawakutii agizo la mfalme wa Misri, bali waliwahifadhi hai watoto wa kiume. 18Basi mfalme wa Misri akawaita wakunga, akawauliza kwa ukali, “Kwa nini mmefanya hivi, mkawaacha watoto wa kiume hai?” 19Wakunga walimwambia Farao, “Wanawake wa Kiebrania si kama wanawake wa Kimisri. Wana nguvu na ni wepesi, nao hujifungua kabla mkunga hajafika.” 20Basi Mungu aliwafadhili wakunga, nao watu wakazidi kuongezeka na kuwa na nguvu sana. 21Na kwa sababu wakunga walimcha Mungu, yeye akawapa jamaa zao wenyewe. 22Kisha Farao akatoa amri kwa watu wake wote: “Kila mtoto wa kiume atakayezaliwa ni lazima atupwe katika mto Naili, lakini kila mtoto wa kike aachwe hai.”