Kutoka 4

1Musa akajibu, “Lakini hawatanisadiki wala hawatajali ninachosema. Watasema, ‘BWANA hajawahi kukutokea.’” 2BWANA akamwuliza, “Unashika nini hapo?” Akajibu, “Fimbo.” 3Mungu akasema, “Itupe chini ardhini.” Basi Musa akaitupa chini, nayo ikageuka kuwa nyoka, naye akaikimbia. 4Kisha BWANA akamwambia Musa, “Nyoosha mkono umkamate kwa mkia.” Akanyoosha mkono, akamshika, naye akarudi kuwa fimbo mkononi mwake. 5“Hii ni ili waamini kwamba BWANA amekutokea, Mungu wa baba zao, Mungu wa Abrahamu, Isaka na Yakobo.” 6BWANA akasema naye tena, “Ingiza mkono wako ndani ya kunjo la vazi lako.” Musa akafanya hivyo, na alipoutoa, mkono wake ulikuwa na ugonjwa wa ngozi, mweupe kama theluji. 7Mungu akasema, “Sasa rudisha mkono wako ndani ya vazi lako.” Musa akaurudisha, na alipoutoa, ulikuwa mzima tena kama sehemu nyingine ya mwili wake. 8“Wasipokuamini au wasiposhawishika kwa ishara ya kwanza, huenda ishara ya pili ikawashawishi. 9Lakini wasipoamini hata baada ya ishara hizi mbili, wala hawataki kukusikiliza, chota maji kidogo kutoka Naili uyamwage juu ya nchi kavu. Maji utakayoyachota mtoni yatakuwa damu hapo juu ya nchi.” 10Kisha Musa akamwambia BWANA, “Tafadhali, Bwana, sijawahi kuwa msemaji hodari, si zamani, wala tangu ulipoanza kuzungumza na mtumishi wako. Kinywa changu ni kizito na ulimi wangu ni mzito.” 11BWANA akamjibu, “Ni nani aliyewapa wanadamu kinywa? Ni nani anayemfanya mtu ashindwe kusema au kusikia, au aweze kuona, au awe kipofu? Je, si mimi, BWANA? 12Kwa hiyo nenda sasa. Nitakuwa pamoja na kinywa chako, na nitakufundisha unachopaswa kusema.” 13Lakini Musa akasema, “Tafadhali, Bwana, mtume mtu mwingine, yeyote utakayemchagua.” 14Ndipo BWANA akamkasirikia Musa, akasema, “Vipi kuhusu Haruni Mlawi, ndugu yako? Najua yeye ni msemaji fasaha. Kwa kweli yuko njiani sasa kuja kukutana nawe, na moyo wake utajaa furaha atakapokuona. 15Utazungumza naye na kumpa maneno ya kusema. Nitakuwa pamoja nanyi wawili mnaposema, na nitawaonyesha la kufanya. 16Atasema na watu badala yako. Yeye atakuwa msemaji wako, nawe utakuwa kama Mungu kwake. 17Tena chukua fimbo hii mkononi mwako. Utaitumia kufanya zile ishara.”

18Musa akarudi kwa baba mkwe wake Yethro, akasema, “Tafadhali niruhusu nirudi kwa watu wangu huko Misri, nikajue kama bado wako hai.” Yethro akamwambia Musa, “Nenda, na mambo yakuendee vyema.” 19BWANA akamwambia Musa huko Midiani, “Rudi Misri. Wote waliotaka ufe wamekufa wenyewe.” 20Basi Musa akamchukua mke wake na wanawe, akawapandisha juu ya punda, akaanza safari kwenda nchi ya Misri. Mkononi mwake alibeba fimbo ya Mungu. 21BWANA akamwambia Musa, “Utakaporudi Misri, hakikisha unafanya mbele ya Farao maajabu yote niliyokupa uwezo wa kuyafanya. Lakini nitaufanya moyo wake kuwa mkaidi, naye atakataa kuwaachilia watu. 22Kisha umwambie Farao, ‘BWANA asema hivi: Israeli ni mwana wangu mzaliwa wa kwanza. 23Nimekuambia, “Mwache mwana wangu aende, ili aniabudu.” Lakini umekataa kumwachilia. Sasa nitamuua mwana wako mzaliwa wa kwanza.’” 24Njiani, mahali walipopumzika usiku, BWANA alimkabili Musa, akataka kumuua. 25Lakini Sipora akachukua gumegume kali, akakata govi ya mwanawe. Akaigusisha miguu ya Musa, akasema, “Wewe ni bwana arusi wa damu kwangu!” 26Basi BWANA akamwachilia. Ndipo yule mwanamke aliposema, “Bwana arusi wa damu,” akimaanisha tohara.

27BWANA akamwambia Haruni, “Nenda nyikani ukakutane na Musa.” Basi akaenda, akakutana naye kwenye mlima wa Mungu, akamsalimu kwa busu. 28Musa akamjulisha Haruni maneno yote ambayo BWANA alimtuma ayaseme, na ishara zote alizomwagiza azifanye. 29Musa na Haruni wakaenda, wakawaita pamoja wazee wote wa Waisraeli. 30Haruni akarudia yote ambayo BWANA alikuwa amemwambia Musa, akafanya ishara watu wakiona. 31Watu wakaamini. Waliposikia kwamba BWANA amekuja kuwasaidia Waisraeli na kwamba ameona dhiki yao, wakainama chini, wakaabudu.