Kutoka 33

1BWANA akamwambia Musa, “Ondoka hapa, wewe na watu uliowapandisha kutoka nchi ya Misri. Elekea nchi niliyowaapia Abrahamu, Isaka na Yakobo, nchi ambayo nilisema, ‘Nitawapa wazao wako.’ 2Nitamtuma malaika akutangulie, nami nitawafukuza Wakanaani, Waamori, Wahiti, Waperizi, Wahivi na Wayebusi. 3Panda mpaka nchi itiririkayo maziwa na asali. Lakini sitapanda kati yako mimi mwenyewe, kwa kuwa ni watu wenye shingo ngumu, nami ningeweza kukuangamiza njiani.” 4Watu waliposikia habari hii nzito, wakaomboleza; hakuna hata mmoja aliyevaa mapambo yake. 5BWANA akamwambia Musa, “Waambie Waisraeli, ‘Ninyi ni watu wenye shingo ngumu. Kama ningepanda kati yenu hata kwa kitambo kidogo tu, ningewaangamiza. Basi sasa vueni mapambo yenu, kisha nitaamua nitakalowafanyia.’” 6Basi tangu mlima Horebu na kuendelea, Waisraeli hawakuvaa mapambo yao. 7Ilikuwa desturi ya Musa kuchukua hema na kulipiga nje ya kambi, mbali kiasi. Akaliita Hema la Kukutania. Yeyote aliyetaka kumtafuta BWANA alikwenda kwenye Hema la Kukutania nje ya kambi. 8Kila Musa alipotoka kwenda kwenye hema, watu wote walisimama. Walisimama kila mmoja mlangoni pa hema lake, wakimfuata Musa kwa macho mpaka alipoingia. 9Kila Musa alipoingia hemani, nguzo ya wingu ilishuka na kukaa mlangoni pa hema, na BWANA akasema na Musa. 10Watu wote walipoiona nguzo ya wingu mlangoni pa hema, walisimama, kisha wakasujudu, kila mmoja mlangoni pa hema lake. 11BWANA alikuwa akizungumza na Musa uso kwa uso, kama mtu anavyozungumza na rafiki yake. Kisha Musa alirudi kambini; lakini Yoshua mwana wa Nuni, kijana aliyemhudumia, alibaki ndani ya hema, wala hakuliacha.

12Musa akamwambia BWANA, “Unaniambia, ‘Wapeleke watu hawa,’ lakini hujanijulisha ni nani atakayekwenda pamoja nami. Tena umesema, ‘Nakujua kwa jina lako, nawe umepata kibali mbele yangu.’ 13Basi sasa, ikiwa kweli nimepata kibali kwako, nionyeshe njia zako. Ndipo nitakapokujua, na kuendelea kupata kibali mbele yako. Tena kumbuka kwamba taifa hili ni watu wako, ni mali yako.” 14BWANA akajibu, “Uwepo wangu wenyewe utakwenda pamoja nawe, nami nitakufikisha kwenye pumziko.” 15Musa akamwambia, “Uwepo wako usipokwenda pamoja nasi, usituondoe mahali hapa. 16Watu watajuaje vinginevyo kwamba umeniridhia mimi na watu wako? Je, si kwa wewe kwenda pamoja nasi? Hilo ndilo linalotutenga, mimi na watu wako, na watu wengine wote walio duniani.”

17BWANA akamwambia Musa, “Hata ombi hili ulilofanya sasa hivi nitalitimiza, kwa sababu umepata kibali mbele yangu, nami nakujua kwa jina lako.” 18Ndipo Musa akasema, “Tafadhali, niruhusu nione utukufu wako.” 19BWANA akajibu, “Nitaufanya wema wangu wote upite mbele yako, na nitalitangaza jina ‘BWANA’ mbele yako. Nitamwonea neema yule nitakayemwonea neema, na kumhurumia yule nitakayemhurumia.” 20Akaendelea kusema, “Uso wangu huwezi kuuona. Hakuna binadamu awezaye kuniona akabaki hai.” 21BWANA akasema, “Kuna mahali kando yangu. Utasimama pale juu ya mwamba. 22Utukufu wangu unapopita, nitakuweka katika ufa wa mwamba, na kukukinga kwa mkono wangu mpaka nitakapokuwa nimepita. 23Nitakapouondoa mkono wangu, utaona mgongo wangu. Lakini uso wangu hautaonekana.”