Kutoka 3

1Musa alikuwa akichunga kundi la baba mkwe wake Yethro, kuhani wa Midiani. Akaliongoza kundi mbali ndani ya nyika, akafika Horebu, mlima wa Mungu. 2Huko malaika wa BWANA akamtokea katika mwali wa moto uliokuwa ukitoka kichakani. Musa akatazama, akaona kwamba ingawa kichaka kilikuwa kikiwaka, hakikuteketea. 3Musa akasema, “Lazima niende kando nikaangalie jambo hili la ajabu. Kwa nini kichaka hiki hakiteketei?” 4BWANA alipoona kwamba amekuja kutazama, Mungu akamwita kutoka kichakani, “Musa! Musa!” Akajibu, “Naam, mimi hapa.” 5Mungu akasema, “Usikaribie zaidi. Vua makubazi yako, kwa sababu mahali unaposimama ni ardhi takatifu.” 6Kisha Mungu akasema, “Mimi ni Mungu ambaye baba yako alimwabudu, Mungu wa Abrahamu, wa Isaka na wa Yakobo.” Musa akajifunika uso wake, kwa kuwa aliogopa kumwangalia Mungu. 7BWANA akasema, “Nimeiona kikamilifu dhiki ya watu wangu huko Misri. Nimewasikia wakilia chini ya wasimamizi wanaowalazimisha kazi. Ninajua jinsi wanavyoteseka. 8Nimeshuka ili kuwaokoa kutoka katika nguvu za Misri na kuwapandisha kutoka nchi ile kwenda nchi nzuri na yenye nafasi kubwa, nchi itiririkayo maziwa na asali, mahali wanapoishi sasa Wakanaani, Wahiti, Waamori, Waperizi, Wahivi na Wayebusi. 9Kilio cha Waisraeli sasa kimenifikia, nami nimeona jinsi Wamisri wanavyowakandamiza vikali. 10Basi nenda. Nitakutuma kwa Farao, nawe utawatoa watu wangu, Waisraeli, kutoka Misri.” 11Lakini Musa akamwambia Mungu, “Mimi ni nani mpaka niweze kwenda kwa Farao na kuwaongoza Waisraeli watoke Misri?” 12Mungu akajibu, “Nitakuwa pamoja nawe. Na hii itakuwa uthibitisho kwako kwamba ni mimi niliyekutuma: utakapowatoa watu Misri, ninyi nyote mtamwabudu Mungu hapa juu ya mlima huu.” 13Musa akamwambia Mungu, “Tuseme nimekwenda kwa Waisraeli na kuwaambia, ‘Mungu wa baba zenu amenituma kwenu,’ nao wakaniuliza, ‘Jina lake ni nani?’ Nitawajibu nini?” 14Mungu akamwambia Musa, “NIKO NILIYE.” Kisha akasema, “Waambie Waisraeli hivi: ‘NIKO amenituma kwenu.’” 15Mungu akamwambia Musa pia, “Waambie Waisraeli hivi: ‘BWANA, Mungu wa baba zenu, Mungu wa Abrahamu, wa Isaka na wa Yakobo, amenituma kwenu.’ Hilo ndilo jina langu kwa nyakati zote, jina ambalo kwalo nitakumbukwa katika kila kizazi. 16Nenda ukawaite pamoja wazee wa Israeli, uwaambie, ‘BWANA, Mungu wa baba zenu, Mungu wa Abrahamu, Isaka na Yakobo, alinitokea. Akasema, “Nimekuja kuwasaidia, nami nimeona jinsi mnavyotendewa huko Misri. 17Nimeazimia kuwapandisha kutoka katika mateso yenu huko Misri mpaka nchi ya Wakanaani, Wahiti, Waamori, Waperizi, Wahivi na Wayebusi, nchi itiririkayo maziwa na asali.”’ 18Watakusikiliza. Kisha wewe na wazee wa Israeli mtakwenda kwa mfalme wa Misri na kumwambia, ‘BWANA, Mungu wa Waebrania, amekuja kukutana nasi. Basi tafadhali turuhusu tusafiri safari ya siku tatu nyikani ili tumtolee BWANA Mungu wetu dhabihu.’ 19Hata hivyo najua kwamba mfalme wa Misri hatawaacha mwende isipokuwa alazimishwe kwa mkono wenye nguvu. 20Basi nitaunyoosha mkono wangu na kuipiga Misri kwa kila aina ya maajabu nitakayofanya huko. Ndipo hatimaye atawaachilia mwende. 21Nitawafanya Wamisri wawaonee watu hawa wema, ili mtakapoondoka msiondoke bila kitu. 22Kila mwanamke ataomba kwa jirani yake Mmisri, na kwa mwanamke yeyote anayeishi nyumbani mwake, vito vya fedha na vya dhahabu, pamoja na nguo. Mtawavalisha wana wenu na binti zenu, na hivyo mtainyang’anya Misri utajiri wake.”