Kutoka 21

1Haya ndiyo maagizo utakayowawekea watu: 2Ukimnunua mtumwa Mwebrania, atakutumikia miaka sita; kisha mwaka wa saba ataachiliwa huru, bila kudaiwa chochote. 3Ikiwa alikuja peke yake, ataondoka peke yake. Ikiwa alikuwa ameoa alipokuja, mke wake ataondoka pamoja naye. 4Bwana wake akimpa mke, naye akamzalia wana au binti, yule mke na watoto wake watabaki kuwa wa bwana wake, naye ataondoka peke yake. 5Lakini mtumwa akitamka wazi, ‘Nampenda bwana wangu, mke wangu na watoto wangu. Sitaondoka kama mtu huru.’ 6bwana wake atamleta mbele za Mungu. Kisha atamsimamisha karibu na mlango au mwimo wa mlango, na kutoboa sikio lake kwa shazia, na mtu huyo atamtumikia kama mtumwa maisha yake yote.

7Mtu akimuuza binti yake ili awe mtumishi wa kike, hataachiliwa mwisho wa miaka sita kama watumwa wa kiume. 8Ikiwa bwana wake, aliyekuwa amemkusudia kuwa mke wake, hapendezwi naye tena, atamruhusu akombolewe. Kwa kuwa amemkosea, hana ruhusa ya kumuuza kwa watu wa taifa lingine. 9Akimkusudia mwanawe, atamtendea kama vile angemtendea binti yake mwenyewe. 10Akioa mke wa pili, yule wa kwanza ataendelea kupata sehemu yake kamili ya chakula, mavazi na haki za ndoa. 11Na ikiwa atashindwa kumtimizia mambo haya matatu, ataweza kuondoka huru, bila kulipa chochote.

12Mtu yeyote atakayempiga mtu mwingine na kumuua atauawa. 13Lakini ikiwa mauaji hayakupangwa, na Mungu aliruhusu yatokee, nitakutengea mahali ambapo muuaji anaweza kukimbilia.

14Lakini mtu akimfanyia jirani yake hila na kumuua kwa udanganyifu, utamwondoa hata kwenye madhabahu yangu ili auawe.

15Mtu yeyote atakayempiga baba yake au mama yake atauawa. 16Mtu yeyote atakayeiba mtu atauawa, iwe amekwisha kumuuza mateka wake au amekutwa bado anamshikilia.

17Mtu yeyote atakayemlaani baba yake au mama yake atauawa.

18Tuseme watu wawili wanapigana, na mmoja akampiga mwenzake kwa jiwe au kwa ngumi. Yule mwingine hafi, lakini analala kitandani. 19Ikiwa aliyejeruhiwa anaweza kuinuka na kutembea nje akijitegemeza kwa fimbo, aliyempiga hataadhibiwa. Lakini atamlipa kwa kazi ambayo hakuweza kufanya, na atalipa mpaka atakapopona kabisa.

20Mtu akimpiga mtumwa wake, mwanamume au mwanamke, kwa fimbo na mtumwa huyo akafa papo hapo, kifo chake kitalipiziwa kisasi. 21Lakini mtumwa akiishi siku moja au mbili, hakutakuwa na kisasi, kwa kuwa mtumwa ni fedha ya bwana wake.

22Wanaume wanapopigana na kumgonga mwanamke mja mzito hata akajifungua kabla ya wakati, lakini pasiwe na madhara mengine, mwenye hatia atalipa faini. Mume wa yule mwanamke ataweka kiasi chake, na malipo yatatolewa kama waamuzi watakavyoamua. 23Madhara yakitokea, adhabu itakuwa uhai kwa uhai, 24jicho kwa jicho, jino kwa jino, mkono kwa mkono, mguu kwa mguu, 25jeraha la moto kwa jeraha la moto, mpasuko kwa mpasuko, alama ya pigo kwa alama ya pigo.

26Mtu akimpiga mtumwa wake, mwanamume au mwanamke, jichoni na kulipofusha jicho hilo, mtumwa huyo ataachiliwa huru kama malipo ya jicho lililopotea.

27Ndivyo ilivyo pia kwa jino: mtumwa, mwanamume au mwanamke, ambaye bwana wake amemng’oa jino, ataachiliwa huru kwa ajili ya jino hilo.

28Ng’ombe akimuua mwanamume au mwanamke kwa pembe zake, mnyama huyo atapigwa mawe na nyama yake haitaliwa. Lakini mwenye ng’ombe hana hatia. 29Ni tofauti ikiwa ng’ombe huyo alijulikana kupiga watu pembe tangu zamani. Ikiwa mwenyewe alikuwa ameonywa kuhusu hatari hiyo lakini bado hakumfungia, naye akamuua mwanamume au mwanamke, ng’ombe huyo atapigwa mawe, na mwenyewe pia atauawa. 30Lakini mwenye ng’ombe akipewa nafasi ya kulipa fidia badala yake, anaweza kukomboa uhai wake kwa kulipa kiasi chote kilichowekwa. 31Ng’ombe akimpiga pembe mvulana au msichana, mwenye ng’ombe atatendewa kwa agizo hilo hilo. 32Ikiwa aliyeuawa ni mtumwa, mwanamume au mwanamke, mwenye ng’ombe atamlipa bwana wa mtumwa karibu gramu 345 za fedha, na ng’ombe atapigwa mawe.

33Tuseme mtu amefunua shimo au amechimba jipya na kuliacha bila kifuniko, na ng’ombe au punda akaanguka ndani yake. 34Mwenye shimo atalipa hasara kwa kumpa mwenye mnyama fedha, naye atabaki na mnyama aliyekufa.

35Ng’ombe wa mtu akimjeruhi ng’ombe wa jirani yake naye akafa, watamuuza ng’ombe aliye hai na kugawana bei yake, na pia watagawana yule aliyekufa. 36Lakini ikiwa ilijulikana kwamba ng’ombe huyo alikuwa na tabia ya kupiga pembe, na bado mwenyewe akamwacha huru, mwenye ng’ombe huyo atalipa ng’ombe aliye hai badala ya yule aliyekufa, na yule aliyekufa atakuwa wake.