Kutoka 8

1Kisha BWANA alimwambia Musa, “Ingia kwa Farao umwambie, ‘Hili ndilo asemalo BWANA: “Waachilie watu wangu, ili wanitumikie. 2Ukikataa kuwaacha waende, angalia: nitaipiga nchi yako yote kwa vyura. 3Mto Naili utafurika vyura. Watatoka na kuingia ikulu yako, katika chumba chako cha kulala na juu ya kitanda chako, katika nyumba za maafisa wako na juu ya watu wako, katika tanuri zako na katika vyombo vyako vya kukandia unga. 4Juu yako, juu ya watu wako, na juu ya maafisa wako wote, vyura watapanda.”’”

5BWANA alimwambia Musa, “Mwambie Haruni, ‘Nyosha mkono wako ukiwa na fimbo yako juu ya mito, mifereji na mabwawa, uwalete vyura juu ya nchi ya Misri.’” 6Basi Haruni aliunyosha mkono wake juu ya maji ya Misri. Vyura wakapanda, wakaifunika nchi ya Misri. 7Waaguzi nao walifanya vivyo hivyo kwa uchawi wao, wakaleta vyura juu ya nchi ya Misri pia. 8Farao aliwaita Musa na Haruni, akasema, “Mwombeni BWANA aniondolee vyura, mimi na watu wangu, nami nitawaachilia watu waende kumtolea BWANA dhabihu.” 9Musa alimwambia Farao, “Uamuzi ni wako, na heshima pia: niambie ni lini niombe kwa ajili yako, na maafisa wako, na watu wako, ili vyura waondolewe kwako na katika nyumba zako. Watabaki katika Naili tu.” 10Farao akajibu, “Kesho.” Musa akasema, “Itafanyika kama ulivyosema, nawe utajua kwamba BWANA Mungu wetu hana mfano. 11Vyura watakuondokea wewe, nyumba zako, maafisa wako na watu wako. Ni katika Naili tu watakapobaki baadhi yao.” 12Musa na Haruni walitoka mbele ya Farao, naye Musa akamlilia BWANA kuhusu vyura aliokuwa amewatuma dhidi ya Farao. 13BWANA alimtimizia Musa ombi lake. Katika nyumba, katika nyua na katika mashamba, vyura walikufa. 14Watu waliwakusanya katika chungu kubwa, nayo nchi ikatoa uvundo. 15Farao alipoona kwamba amepata nafuu, akaushupaza moyo wake. Hakutaka kuwasikiliza, kama BWANA alivyokuwa amesema.

16BWANA alimwambia Musa, “Mwambie Haruni ainyoshe fimbo yake na kuyapiga mavumbi ya ardhi. Katika nchi yote ya Misri mavumbi hayo yatageuka kuwa mbu.” 17Walifanya hivyo. Haruni alipoinyosha fimbo iliyokuwa mkononi mwake na kuyapiga mavumbi ya ardhi, mbu wakawa juu ya watu na wanyama vilevile. Katika nchi yote ya Misri, mavumbi yote yakageuka kuwa mbu. 18Waaguzi walijaribu kufanya vivyo hivyo kwa uchawi wao ili kuleta mbu, lakini wakashindwa. Nao mbu wakaendelea kuwa juu ya watu na wanyama. 19Waaguzi walimwambia Farao, “Hiki ni kidole cha Mungu kinachofanya kazi!” Lakini moyo wa Farao ukashupaa, akakataa kuwasikiliza, kama BWANA alivyokuwa amesema.

20BWANA alimwambia Musa, “Amka mapema asubuhi, ukasimame mbele ya Farao anapotoka kwenda majini. Mwambie, ‘Hili ndilo asemalo BWANA: Waachilie watu wangu ili wanitumikie. 21Usipowaacha watu wangu waende, nitatuma makundi ya inzi juu yako, maafisa wako, watu wako na nyumba zako. Nyumba za Wamisri zitajaa makundi hayo, na hata ardhi wanayoishi juu yake. 22Lakini siku hiyo nitaitenga nchi ya Gosheni, wanamoishi watu wangu: huko hakutakuwa na makundi ya inzi. Hivyo utajua kwamba mimi, BWANA, niko hapa hapa katika nchi hii. 23Nitafanya ukombozi utakaowatenga watu wangu na watu wako. Kesho ishara hiyo itakuja.’” 24BWANA alifanya hivyo. Makundi makubwa ya inzi yaliingia katika nyumba ya Farao na nyumba za maafisa wake. Katika nchi yote ya Misri, inzi waliiharibu nchi. 25Farao aliwaita Musa na Haruni akasema, “Nendeni mkamtolee Mungu wenu dhabihu, lakini fanyeni hivyo hapa katika nchi hii.” 26Musa alijibu, “Haitafaa kufanya hivyo. Dhabihu tunazomtolea BWANA Mungu wetu ni chukizo kwa Wamisri. Tukitoa mbele yao dhabihu wanazozichukia, je, hawatatupiga kwa mawe? 27Tutasafiri siku tatu kuingia jangwani, na huko tutamtolea BWANA Mungu wetu dhabihu, kama atakavyotuagiza.” 28Farao alisema, “Haya basi, nitawaachilia mwende mkamtolee BWANA Mungu wenu dhabihu jangwani. Ila tu msiende mbali sana. Tena mniombee.” 29Musa alisema, “Ninaondoka kwako sasa, nami nitamwomba BWANA. Kesho inzi wataondoka kwa Farao, kwa maafisa wake na kwa watu wake. Lakini Farao asitudanganye tena kwa kuwazuia watu wasiende kumtolea BWANA dhabihu.” 30Musa alitoka mbele ya Farao, akamwomba BWANA. 31BWANA alilijibu ombi la Musa, akawaondoa inzi kwa Farao, kwa maafisa wake na kwa watu wake. Hakubaki hata inzi mmoja. 32Lakini kwa mara nyingine tena Farao akaushupaza moyo wake; hakuwaachilia watu.