Kutoka 6

1BWANA akamjibu Musa, “Sasa utaona nitakavyomtendea Farao. Akilazimishwa na mkono wenye nguvu, atawaachilia; akilazimishwa na mkono wenye nguvu, atawafukuza katika nchi yake.”

2Mungu akanena na Musa, akamwambia, “Mimi ndimi BWANA. 3Nilijionyesha kwa Abrahamu, Isaka na Yakobo kama Mungu Mwenyezi, lakini sikujitambulisha kwao kwa jina langu, BWANA. 4Pia nilithibitisha agano langu nao, kwamba nitawapa nchi ya Kanaani, nchi waliyoishi kama wageni. 5Mimi mwenyewe sasa nimesikia Waisraeli wakiugua chini ya utumwa ambao Wamisri wamewatwika, nami nimelikumbuka agano langu. 6Basi waambie Waisraeli: ‘Mimi ndimi BWANA. Nitawatoa chini ya kazi za kulazimishwa za Wamisri na kuwaokoa msiwatumikie tena kama watumwa. Nitawakomboa kwa mkono wangu ulionyooshwa na kwa matendo makuu ya hukumu. 7Nitawachukua kuwa watu wangu, nami nitakuwa Mungu wenu. Nanyi mtajua kwamba mimi ndimi BWANA Mungu wenu, yeye anayewatoa chini ya kazi za kulazimishwa za Misri. 8Nitawaleta katika nchi niliyoapa kuwapa Abrahamu, Isaka na Yakobo, nami nitawapa ninyi iwe mali yenu. Mimi ndimi BWANA.’” 9Musa akawaeleza Waisraeli hayo, lakini hawakutaka kumsikiliza, kwa kuwa roho zao zilikuwa zimevunjika na utumwa wao ulikuwa mkali.

10Ndipo BWANA akamwambia Musa, 11“Ingia kwa Farao, mfalme wa Misri, umwambie awaachilie Waisraeli watoke katika nchi yake.” 12Lakini Musa akamjibu BWANA, “Hata Waisraeli hawakunisikiliza. Basi Farao atanisikilizaje, nami ni msemaji mbaya hivi?”

13BWANA akasema na Musa na Haruni, akawapa agizo kwa ajili ya Waisraeli na kwa ajili ya Farao, mfalme wa Misri: walipaswa kuwatoa Waisraeli katika nchi ya Misri.

14Hawa ndio wakuu wa jamaa za baba zao. Reubeni alikuwa mzaliwa wa kwanza wa Israeli; wana wake walikuwa Hanoki, Palu, Hesroni na Karmi. Hizo ndizo koo za Reubeni. 15Wana wa Simeoni walikuwa Yemueli, Yamini, Ohadi, Yakini, Sohari na Shauli, ambaye mama yake alikuwa Mkanaani. Hizo ndizo koo za Simeoni. 16Haya ndiyo majina ya wana wa Lawi kwa kufuata koo zao: Gershoni, Kohathi na Merari. Lawi aliishi miaka 137. 17Wana wa Gershoni walikuwa Libni na Shimei, kila mmoja na ukoo wake. 18Wana wa Kohathi walikuwa Amramu, Ishari, Hebroni na Uzieli. Kohathi aliishi miaka 133. 19Wana wa Merari walikuwa Mahli na Mushi. Hizo ndizo koo za Lawi, kwa kufuata vizazi vyao. 20Amramu alimwoa Yokebedi, dada ya baba yake, naye akamzalia Haruni na Musa. Amramu aliishi miaka 137. 21Wana wa Ishari walikuwa Kora, Nefegi na Zikri. 22Wana wa Uzieli walikuwa Mishaeli, Elsafani na Sithri. 23Haruni alimwoa Elisheba, binti Aminadabu na dada ya Nashoni, naye akamzalia Nadabu, Abihu, Eleazari na Ithamari. 24Wana wa Kora walikuwa Asiri, Elkana na Abiasafu. Hizo ndizo koo za Wakora. 25Eleazari mwana wa Haruni alimwoa mmoja wa binti za Putieli, naye akamzalia Finehasi. Hawa ndio waliokuwa wakuu wa jamaa za Walawi, ukoo kwa ukoo. 26Huyo Haruni na huyo Musa ndio wale ambao BWANA aliwaambia, “Waongozeni Waisraeli watoke katika nchi ya Misri, kikosi kwa kikosi.” 27Ndio wao walioingia kwa Farao, mfalme wa Misri, wakasema naye ili Waisraeli watolewe Misri: huyo Musa na huyo Haruni. 28Basi siku ile BWANA aliposema na Musa katika nchi ya Misri,

29BWANA alimwambia Musa, “Mimi ndimi BWANA. Mrudishie Farao, mfalme wa Misri, kila neno ninalokuambia.” 30Lakini Musa akajibu mbele za BWANA, “Mimi ni msemaji mbaya sana. Farao atanisikilizaje?”