Kutoka 25

1BWANA akamwambia Musa, 2“Waambie Waisraeli wanitengee mchango. Mpokee mchango wangu kutoka kwa kila mtu ambaye moyo wake unamvuta kutoa. 3Huu ndio mchango mtakaoupokea kutoka kwao: dhahabu, fedha na shaba, 4uzi wa samawati, wa zambarau na wa rangi nyekundu, kitani safi, manyoya ya mbuzi, 5ngozi za kondoo dume zilizotiwa rangi nyekundu, ngozi bora, mbao za mshita, 6mafuta ya taa, viungo vya mafuta ya kupaka na vya uvumba wenye harufu nzuri, 7na vito vya onikisi na vito vingine vya kupachikwa kwenye efodi na kifuko cha kifuani. 8Wanifanyie mahali patakatifu, ili nikae kati yao. 9Mtaifanya kulingana na kila kitu nitakachokuonyesha, mkifuata mfano wa maskani na mfano wa samani zake zote.

10Watengeneze sanduku la mbao za mshita, lenye urefu wa karibu mita 1.1, upana wa karibu sentimita 70 na kimo cha karibu sentimita 70. 11Ulifunike kwa dhahabu safi ndani na nje, na ulitie ukingo wa dhahabu pande zote. 12Ulisubie pete nne za dhahabu na uzifunge kwenye miguu yake minne, ili kila upande uwe na pete mbili. 13Ufanye pia mipiko ya mbao za mshita, uifunike kwa dhahabu. 14Uipitishe mipiko katika pete zilizo pande za sanduku, ili sanduku libebwe kwayo. 15Mipiko ibaki katika pete za sanduku, isiondolewe kamwe. 16Ndani ya sanduku uweke Ushuhuda nitakaokupa. 17Ufanye kiti cha rehema cha dhahabu safi, chenye urefu wa karibu mita 1.1 na upana wa karibu sentimita 70. 18Ufanye makerubi wawili wa dhahabu. Uwafanye kwa dhahabu iliyofuliwa, kwenye ncha mbili za kiti cha rehema. 19Ufanye kerubi mmoja kwenye ncha moja na mwingine kwenye ncha nyingine. Makerubi hao wafanywe kutoka kiti cha rehema chenyewe, kwenye ncha zake mbili. 20Makerubi wayakunjue mabawa yao juu, wakikitia kivuli kiti cha rehema kwa mabawa yao. Waelekeane, nyuso zao zikielekea kiti cha rehema. 21Kiti cha rehema kiwekwe juu ya sanduku, na ndani ya sanduku uweke Ushuhuda nitakaokupa. 22Huko nitakutana nawe. Nitasema nawe kutoka juu ya kiti cha rehema, kutoka mahali kati ya makerubi wawili walio juu ya sanduku la Ushuhuda, na kukupa kila amri kwa ajili ya Waisraeli.

23Ufanye meza ya mbao za mshita, yenye urefu wa karibu sentimita 90, upana wa karibu sentimita 45 na kimo cha karibu sentimita 70. 24Uifunike kwa dhahabu safi, na uitie ukingo wa dhahabu kuizunguka pande zote. 25Uifanyie kiunzi chenye upana wa karibu sentimita 7.5 pande zote, na ukingo wa dhahabu kukizunguka kiunzi hicho. 26Uifanyie pete nne za dhahabu, uziweke kwenye pembe nne, moja karibu na kila mguu wake. 27Pete ziwekwe karibu na kiunzi; zitashika mipiko ambayo meza itabebwa kwayo. 28Uifanye mipiko kwa mbao za mshita na uifunike kwa dhahabu. Meza itabebwa kwayo. 29Ufanye sahani zake, vijiko vyake, mitungi yake na bakuli zake, vinavyotumiwa kumimina sadaka za kinywaji; uvifanye kwa dhahabu safi. 30Juu ya meza uweke mkate wa Uwepo, ukae mbele yangu daima.

31Ufanye kinara cha taa cha dhahabu safi iliyofuliwa. Kitako chake na shina lake, vikombe vyake, matumba yake na maua yake viwe kipande kimoja nacho. 32Matawi sita yatoke pande za kinara: matawi yake matatu upande mmoja, na matatu upande mwingine. 33Tawi moja liwe na vikombe vitatu vyenye umbo la maua ya mlozi, pamoja na tumba na ua, na tawi linalofuata vikombe vitatu vyenye umbo la maua ya mlozi, pamoja na tumba na ua. Iwe hivyo kwa matawi yote sita yanayotoka kwenye kinara. 34Kwenye kinara chenyewe kuwe na vikombe vinne vyenye umbo la maua ya mlozi, pamoja na matumba yake na maua yake. 35Kuwe na tumba chini ya kila jozi ya matawi yanayotoka kwake: tumba moja chini ya kila jozi kati ya zile jozi tatu, kwa matawi sita yanayotoka kwenye kinara. 36Matumba yake na matawi yake yawe sehemu yake, na kinara chote kiwe kipande kimoja cha dhahabu safi iliyofuliwa. 37Ukitengenezee kinara taa saba. Taa hizo ziwekwe hivi kwamba nuru yake iangaze mahali palipo mbele ya kinara. 38Makoleo yake na vyetezo vyake viwe vya dhahabu safi. 39Kinara na vyombo hivi vyote vifanywe kwa karibu kilo 34 ya dhahabu safi. 40Hakikisha unavifanya kwa kufuata mfano unaoonyeshwa mlimani.