Kutoka 26

1Kwa ajili ya maskani ufanye mapazia kumi ya kitani safi iliyosokotwa, na ya uzi wa samawati, wa zambarau na wa rangi nyekundu. Makerubi yafumwe ndani yake, kazi ya fundi stadi. 2Kila pazia liwe na urefu wa karibu mita 12.6 na upana wa karibu mita 1.8; mapazia yote yawe na kipimo kimoja. 3Mapazia matano yaungwe pamoja, na matano mengine nayo yaungwe pamoja vivyo hivyo. 4Utie vitanzi vya uzi wa samawati kwenye pindo la nje la pazia la mwisho la fungu la kwanza, na vivyo hivyo kwenye pindo la pazia la mwisho la fungu la pili. 5Utie vitanzi hamsini kwenye pazia moja na hamsini kwenye mwisho wa pazia la fungu la pili, ili vitanzi vikabiliane. 6Ufanye vifungo hamsini vya dhahabu, na kwavyo uunganishe mafungu mawili ya mapazia, moja na jingine. Hivyo maskani itakuwa kitu kimoja kizima.

7Kisha ufanye mapazia kumi na moja ya manyoya ya mbuzi, yawe hema juu ya maskani. 8Kila pazia liwe na urefu wa karibu mita 13.5 na upana wa karibu mita 1.8; yote kumi na moja yawe na kipimo kimoja. 9Uunganishe mapazia matano peke yake, na sita peke yake. Pazia la sita likunjwe mara mbili upande wa mbele wa hema. 10Utie vitanzi hamsini kwenye pindo la nje la pazia la mwisho la fungu la kwanza, na vingine hamsini kwenye pindo la pazia linalounganisha fungu la pili. 11Ufanye vifungo hamsini vya shaba, uvitie katika vitanzi na kuliunganisha hema, ili liwe kitu kimoja kizima. 12Nusu ya pazia itabaki ikiwa ya ziada katika mapazia ya hema. Ziada hiyo ining’inie juu ya upande wa nyuma wa maskani. 13Kwa urefu, mapazia ya hema yatazidi kwa karibu sentimita 45 kila upande. Ziada hiyo ining’inie juu ya pande zote mbili za maskani ili kuifunika. 14Ufanye kifuniko cha hema kwa ngozi za kondoo dume zilizotiwa rangi nyekundu, na juu yake kifuniko cha ngozi bora.

15Kwa ajili ya maskani ufanye fremu za mbao za mshita, zisimame wima. 16Kila fremu iwe na kimo cha karibu mita 4.5 na upana wa karibu sentimita 70. 17Kila fremu iwe na ndimi mbili, zimeungwa moja na nyingine. Ufanye hivyo kwa kila fremu ya maskani. 18Upande wa kusini wa maskani uwe na fremu ishirini. 19Chini ya fremu ishirini uweke misingi arobaini ya fedha, miwili chini ya kila fremu kupokea ndimi zake mbili. 20Kwa upande mwingine wa maskani, upande wa kaskazini, ufanye fremu ishirini 21pamoja na misingi yake arobaini ya fedha, miwili chini ya kila fremu. 22Kwa upande wa nyuma wa maskani, mwisho wa magharibi, ufanye fremu sita. 23Fremu nyingine mbili ziwe kwa pembe za nyuma za maskani. 24Ziwe mbili mbili kutoka chini, na ziungwe pamoja juu kwa pete moja. Fremu zote mbili za pembeni zifanywe hivyo; zitakuwa pembe mbili. 25Hivyo ukuta wa nyuma utakuwa na fremu nane zilizosimama juu ya misingi kumi na sita ya fedha, miwili chini ya kila fremu. 26Ufanye pia mataruma ya mbao za mshita, matano kwa fremu za upande mmoja wa maskani, 27matano kwa fremu za upande mwingine, na matano kwa fremu za ukuta wa nyuma unaoelekea magharibi. 28Taruma la katikati, lililowekwa nusu ya kimo cha fremu, lifike kutoka mwisho mmoja hadi mwingine. 29Uzifunike fremu kwa dhahabu, na pete zake uzifanye za dhahabu, ziwe vishikio vya mataruma; mataruma nayo uyafunike kwa dhahabu. 30Uisimamishe maskani kwa kufuata mpango ulioonyeshwa mlimani.

31Ufanye pazia la ndani kwa uzi wa samawati, wa zambarau na wa rangi nyekundu, na kitani safi iliyosokotwa. Liwe kazi ya fundi stadi, lenye makerubi yaliyofumwa katika mchoro wake. 32Ulitundike kwenye nguzo nne za mshita zilizofunikwa kwa dhahabu. Kulabu zake ziwe za dhahabu, nazo zisimame juu ya misingi minne ya fedha. 33Uliweke pazia chini ya vifungo, na ulilete sanduku la Ushuhuda huko, nyuma ya pazia. Pazia hilo litawatenganishia mahali patakatifu na Patakatifu pa Patakatifu. 34Ukiweke kiti cha rehema juu ya sanduku la Ushuhuda, ndani ya Patakatifu pa Patakatifu. 35Uiweke meza nje ya pazia, na kinara cha taa kuelekeana na meza upande wa kusini wa maskani. Meza uiweke upande wa kaskazini. 36Ufanye pazia la mlango wa hema kwa uzi wa samawati, wa zambarau na wa rangi nyekundu, na kitani safi iliyosokotwa, lililotariziwa kwa rangi na mtarizi. 37Ufanye kwa ajili ya pazia hilo nguzo tano za mbao za mshita, uzifunike kwa dhahabu; kulabu zake ziwe za dhahabu. Uzisubie pia misingi mitano ya shaba.