Kutoka 18

1Yethro, kuhani wa Midiani na baba mkwe wa Musa, alipata habari za yote ambayo Mungu alikuwa amemtendea Musa na Israeli, watu wake: BWANA alikuwa amewatoa Israeli Misri. 2Yethro, baba mkwe wa Musa, alikuwa amempokea Sipora, mke wa Musa, baada ya Musa kumrudisha nyumbani kwa baba yake, 3pamoja na wanawe wawili. Mmoja wao aliitwa Gershomu, kwa sababu Musa alikuwa amesema, “Nimekuwa mgeni katika nchi ya kigeni.” 4Yule mwingine aliitwa Eliezeri, kwa sababu “Mungu wa baba yangu alikuwa msaidizi wangu, naye akaniokoa na upanga wa Farao.” 5Yethro, baba mkwe wa Musa, alikuja jangwani pamoja na mke na wana wa Musa, akamkuta amepiga kambi kwenye mlima wa Mungu. 6Alimtumia Musa ujumbe, “Mimi, baba mkwe wako Yethro, niko njiani kuja kwako, pamoja na mkeo na wanawe wawili.” 7Musa alitoka kwenda kumlaki baba mkwe wake. Akainama sana na kumbusu, nao wakaulizana hali. Kisha wakaingia hemani. 8Musa alimpa baba mkwe wake habari kamili za yale ambayo BWANA alikuwa amemtendea Farao na Misri kwa ajili ya Israeli. Akamweleza kila taabu iliyowapata safarini, na jinsi BWANA alivyowaokoa. 9Yethro alifurahi kwa sababu ya mema yote ambayo BWANA aliwatendea Israeli alipowaokoa kutoka katika nguvu za Wamisri. 10Yethro alisema, “Ahimidiwe BWANA, aliyewaokoa ninyi kutoka katika nguvu za Misri na za Farao, na aliyewaweka watu hawa huru kutoka chini ya utawala wa Misri. 11Sasa najua kwamba BWANA ni mkuu kuliko miungu yote, kwa maana alionyesha hilo katika jambo lile lile ambalo waliwatendea Israeli kwa kiburi.” 12Kisha Yethro, baba mkwe wa Musa, alileta sadaka ya kuteketezwa na dhabihu nyingine, akamtolea Mungu. Haruni na wazee wote wa Israeli wakaja kuungana na baba mkwe wa Musa, wakala chakula pamoja mbele za Mungu. 13Siku iliyofuata Musa aliketi ili kuamua mashauri ya watu, nao watu wakasimama mbele yake wakingoja tangu asubuhi hadi jioni. 14Baba mkwe wa Musa alipoona yote aliyokuwa akiwafanyia watu, alisema, “Ni jambo gani hili unalofanya na watu? Kwa nini unaketi hapa peke yako, wakati umati wote unasimama ukikungoja tangu asubuhi hadi jioni?” 15Musa alimjibu baba mkwe wake, “Ni kwa sababu watu huja kwangu ili kutafuta shauri la Mungu. 16Kila wanapokuwa na shauri, huletwa kwangu, nami huamua kati ya pande hizo mbili. Pia huwajulisha kanuni za Mungu na sheria zake.” 17Baba mkwe wa Musa alimwambia, “Njia hii ya kufanya mambo si nzuri. 18Hakika utachoka, wewe pamoja na watu walio nawe. Mzigo huu ni mzito mno kwako; huwezi kuubeba peke yako. 19Sasa sikiliza ninachotaka kukuambia. Niache nikushauri, na Mungu awe pamoja nawe. Kazi yako ni kusimama mbele za Mungu kwa niaba ya watu, na kuyapeleka mashauri yao kwa Mungu. 20Wafundishe kanuni na sheria, na uwaonyeshe njia wanayopaswa kuifuata na mambo wanayopaswa kufanya. 21Kisha uwachunguze watu wote, uchague wanaume wenye uwezo, wanaomcha Mungu, waaminifu, wanaochukia faida ya udanganyifu. Uwaweke juu ya watu kuwa maafisa wa maelfu, wa mamia, wa hamsini na wa kumi. 22Wao watawaamua watu wakati wote. Kila shauri kubwa watakuletea wewe, lakini kila shauri dogo wataliamua wenyewe. Hivyo upunguze mzigo wako, nao watauchukua pamoja nawe. 23Ukifanya hivi, na Mungu akakuagiza hivyo, utaweza kustahimili, na watu hawa wote nao watarudi nyumbani kwao kwa amani.” 24Musa alifuata shauri la baba mkwe wake, akafanya yote aliyopendekeza. 25Musa alichagua wanaume wenye uwezo kutoka Israeli wote, akawaweka kuwa viongozi wa watu: maafisa wa maelfu, wa mamia, wa hamsini na wa kumi. 26Tangu hapo waliwaamua watu wakati wote. Kila shauri gumu walimpelekea Musa, lakini kila jambo dogo waliliamua wenyewe. 27Kisha Musa alimsindikiza baba mkwe wake, naye Yethro akarudi katika nchi yake mwenyewe.