Kutoka 36

1Bezaleli, Oholiabu na kila mtu stadi ambaye BWANA amempa ustadi na ufahamu, ili ajue kufanya kila kazi ya huduma ya mahali patakatifu, watafanya kazi hiyo kama BWANA alivyoamuru.” 2Musa akawaita Bezaleli na Oholiabu, pamoja na wote ambao BWANA alikuwa amewapa ustadi, kila mtu ambaye moyo wake ulimsukuma kujitokeza kuifanya kazi hiyo. 3Musa akawakabidhi michango yote ambayo Waisraeli walikuwa wameleta kwa ajili ya kazi ya huduma ya mahali patakatifu, ili waweze kuifanya. Hata hivyo watu waliendelea kumletea sadaka za hiari kila asubuhi. 4Kwa hiyo mafundi wote stadi waliokuwa wakifanya kazi ya mahali patakatifu wakaja, kila mmoja akiacha kazi aliyokuwa akiifanya, 5wakamwambia Musa, “Watu wanaendelea kuleta zaidi ya kinachohitajika kwa kazi ambayo BWANA ametuamuru tuifanye.” 6Musa akatoa amri, na tangazo likapitishwa kambini kote: “Wanaume na wanawake wote waache kuandaa matoleo kwa ajili ya mahali patakatifu.” Hivyo watu wakazuiliwa wasilete zaidi. 7Vifaa walivyokuwa navyo vilitosha kwa kazi yote, na vingine vikabaki.

8Mafundi wote stadi kati ya wafanyakazi wakaitengeneza maskani kwa mapazia kumi ya kitani safi iliyosokotwa na ya uzi wa samawati, wa zambarau na wa rangi nyekundu, yenye makerubi yaliyofumwa ndani yake na fundi stadi. 9Kila pazia lilikuwa na urefu wa karibu mita 12.6 na upana wa karibu mita 1.8; mapazia yote yalikuwa na kipimo kimoja. 10Wakaunganisha mapazia matano pamoja, na yale matano mengine nayo wakayaunganisha pamoja. 11Wakaweka vitanzi vya uzi wa samawati kwenye ukingo wa nje wa pazia la mwisho katika fungu la kwanza, na vivyo hivyo kwenye ukingo wa pazia la mwisho la fungu la pili. 12Wakaweka vitanzi hamsini katika pazia moja na hamsini mwishoni mwa pazia la fungu la pili, hivi kwamba vitanzi vilielekeana. 13Wakatengeneza vifungo hamsini vya dhahabu, wakaunganisha kwavyo mafungu mawili ya mapazia, moja na jingine. Hivyo maskani ikawa kitu kimoja kizima.

14Kisha wakatengeneza mapazia kumi na moja ya manyoya ya mbuzi yawe hema juu ya maskani. 15Kila pazia lilikuwa na urefu wa karibu mita 13.5 na upana wa karibu mita 1.8; yote kumi na moja yalikuwa na kipimo kimoja. 16Wakaunganisha mapazia matano peke yake, na sita peke yake. 17Kwenye ukingo wa nje wa pazia la mwisho la fungu la kwanza wakaweka vitanzi hamsini, na vingine hamsini kwenye ukingo wa pazia la kuungania la fungu la pili. 18Wakatengeneza vifungo hamsini vya shaba ili kuliunganisha hema, likawa kitu kimoja kizima. 19Wakatengeneza kifuniko cha hema kwa ngozi za kondoo dume zilizotiwa rangi nyekundu, na juu yake kifuniko cha ngozi bora.

20Wakatengeneza fremu za mbao za mshita kwa ajili ya maskani, zisimame wima. 21Kila fremu ilikuwa na kimo cha karibu mita 4.5 na upana wa karibu sentimita 70. 22Kila fremu ilikuwa na ndimi mbili, zilizoungana moja na nyingine. Wakafanya hivyo kwa kila fremu ya maskani. 23Kwa upande wa kusini wa maskani wakatengeneza fremu ishirini. 24Chini ya fremu ishirini wakatengeneza misingi arobaini ya fedha, miwili chini ya kila fremu ili kupokea ndimi zake mbili. 25Kwa upande mwingine wa maskani, upande wa kaskazini, wakatengeneza fremu ishirini 26pamoja na misingi yake arobaini ya fedha, miwili chini ya kila fremu. 27Kwa upande wa nyuma wa maskani, upande wa magharibi, wakatengeneza fremu sita. 28Wakatengeneza fremu nyingine mbili kwa pembe za nyuma za maskani. 29Zilikuwa za kuwili kuanzia chini, na juu ziliunganishwa katika pete moja. Wakazitengeneza fremu zote mbili za pembeni hivyo, kwa pembe zile mbili. 30Hivyo ukuta wa nyuma ulikuwa na fremu nane zilizosimama juu ya misingi kumi na sita ya fedha, jozi moja chini ya kila fremu. 31Wakatengeneza pia mataruma ya mbao za mshita, matano kwa fremu za upande mmoja wa maskani, 32matano kwa fremu za upande wake mwingine, na matano kwa fremu za ukuta wa nyuma unaoelekea magharibi. 33Wakalifanya taruma la katikati lipite nusu ya kimo cha fremu, kutoka mwisho mmoja hadi mwingine. 34Wakazifunika fremu kwa dhahabu, wakazifanya pete zake kwa dhahabu kuwa vishikio vya mataruma; mataruma nayo wakayafunika kwa dhahabu. 35Wakalitengeneza pazia la ndani kwa uzi wa samawati, wa zambarau na wa rangi nyekundu na kwa kitani safi iliyosokotwa, lenye makerubi yaliyofumwa ndani yake na fundi stadi. 36Wakalitengenezea nguzo nne za mbao za mshita, wakazifunika kwa dhahabu. Kulabu zake zilikuwa za dhahabu, nao wakazisubia misingi minne ya fedha. 37Wakatengeneza pazia la mlango wa hema kwa uzi wa samawati, wa zambarau na wa rangi nyekundu na kwa kitani safi iliyosokotwa, lililotariziwa kwa rangi na mtarizi. 38Wakatengeneza pia nguzo zake tano pamoja na kulabu zake. Wakavifunika kwa dhahabu vichwa vya nguzo na mikanda yake, na misingi yake mitano ilikuwa ya shaba.