Kutoka 37

1Bezaleli alitengeneza sanduku la mbao za mshita, lenye urefu wa karibu mita 1.1, upana wa karibu sentimita 70 na kimo cha karibu sentimita 70. 2Akalifunika kwa dhahabu safi ndani na nje, akalitia ukingo wa dhahabu pande zote. 3Akalisubia pete nne za dhahabu, zilizowekwa kwenye miguu yake minne, ili kila upande uwe na pete mbili. 4Akafanya mipiko ya kubebea kwa mbao za mshita, akaifunika kwa dhahabu. 5Akaipitisha mipiko katika pete zilizo pande za sanduku, ili sanduku liweze kubebwa. 6Akafanya kiti cha rehema cha dhahabu safi, chenye urefu wa karibu mita 1.1 na upana wa karibu sentimita 70. 7Akafanya makerubi wawili wa dhahabu iliyofuliwa, kwa ajili ya ncha mbili za kiti cha rehema. 8Kulikuwa na kerubi mmoja kwenye ncha moja na mwingine kwenye ncha nyingine. Aliwafanya makerubi hao kutoka kiti cha rehema chenyewe, kwenye ncha zake mbili. 9Makerubi waliyakunjua mabawa yao juu, wakikitia kivuli kiti cha rehema kwa mabawa yao. Walielekeana, nyuso zao zikielekea kiti cha rehema.

10Akafanya meza ya mbao za mshita, yenye urefu wa karibu sentimita 90, upana wa karibu sentimita 45 na kimo cha karibu sentimita 70. 11Akaifunika kwa dhahabu safi, akaitia ukingo wa dhahabu kuizunguka pande zote. 12Akaifanyia kiunzi chenye upana wa karibu sentimita 7.5 pande zote, na ukingo wa dhahabu kukizunguka kiunzi hicho. 13Akaisubia pete nne za dhahabu, akaziweka kwenye pembe nne, moja karibu na kila mguu wake. 14Pete zilikuwa karibu na kiunzi, ili kushika mipiko ambayo meza ilibebwa kwayo. 15Akaifanya mipiko kwa mbao za mshita na kuifunika kwa dhahabu, kwa ajili ya kuibeba meza. 16Akavitengeneza kwa dhahabu safi vyombo vya meza: sahani zake, vijiko vyake, bakuli zake na mitungi iliyotumiwa kumimina sadaka za kinywaji.

17Akafanya kinara cha taa cha dhahabu safi iliyofuliwa. Kitako chake na shina lake, vikombe vyake, matumba yake na maua yake vilikuwa kipande kimoja nacho. 18Matawi sita yalitoka pande za kinara: matawi yake matatu upande mmoja, na matatu upande mwingine. 19Tawi moja lilikuwa na vikombe vitatu vyenye umbo la maua ya mlozi, pamoja na tumba na ua, na tawi lililofuata vikombe vitatu vyenye umbo la maua ya mlozi, pamoja na tumba na ua. Ilikuwa hivyo kwa matawi yote sita yaliyotoka kwenye kinara. 20Kwenye kinara chenyewe kulikuwa na vikombe vinne vyenye umbo la maua ya mlozi, pamoja na matumba yake na maua yake. 21Kulikuwa na tumba chini ya kila jozi ya matawi yaliyotoka kwake: tumba moja chini ya kila jozi kati ya zile jozi tatu, kwa matawi sita yaliyotoka kwake. 22Matumba yake na matawi yake yalikuwa sehemu yake, na kinara chote kilikuwa kipande kimoja cha dhahabu safi iliyofuliwa. 23Akakitengenezea taa saba, pamoja na makoleo yake na vyetezo vyake, vyote vya dhahabu safi. 24Kwa karibu kilo 34 ya dhahabu safi alikitengeneza kinara na vyombo vyake vyote.

25Akafanya madhabahu ya kufukizia uvumba kwa mbao za mshita. Ilikuwa mraba, karibu sentimita 45 kila upande, na kimo cha karibu sentimita 90; pembe zake zilikuwa kipande kimoja nayo. 26Akaifunika kwa dhahabu safi: sehemu ya juu, pande zake zote na pembe zake. Akaitia ukingo wa dhahabu kuizunguka. 27Chini ya ukingo wake akaifanyia pete mbili za dhahabu, kwenye pande zake mbili zinazoelekeana, ziwe vishikio vya mipiko ya kuibebea. 28Akaitengeneza mipiko yake kwa mbao za mshita, akaifunika kwa dhahabu. 29Pia akatengeneza mafuta matakatifu ya kupaka na uvumba safi wa viungo vyenye harufu nzuri, vyote vikiwa vimeandaliwa kwa ustadi wa mtengenezaji wa manukato.