Kutoka 40

1BWANA alimwambia Musa, 2“Siku ya kwanza ya mwezi wa kwanza, isimamishe maskani, yaani Hema la Kukutania. 3Utaliweka humo sanduku la Ushuhuda, na kulisitiri kwa pazia la ndani. 4Utaileta meza ndani na kupanga juu yake kwa utaratibu vitu vinavyowekwa juu yake. Utakileta kinara cha taa na kuzipandisha taa zake. 5Utaiweka madhabahu ya dhahabu ya uvumba mbele ya sanduku la Ushuhuda, na kutundika pazia la mlango wa maskani. 6Utaiweka madhabahu ya sadaka ya kuteketezwa mbele ya mlango wa maskani, yaani Hema la Kukutania. 7Utaliweka birika kati ya Hema la Kukutania na madhabahu, na kutia maji ndani yake. 8Utausimamisha ua kuzunguka pande zote, na kutundika pazia la lango la ua. 9Kisha utachukua mafuta ya kupaka na kuipaka mafuta maskani na kila kitu kilichomo ndani yake. Utaitakasa pamoja na vyombo vyake vyote, nayo itakuwa takatifu. 10Utaipaka mafuta madhabahu ya sadaka ya kuteketezwa na vyombo vyake vyote. Utaitakasa madhabahu, nayo itakuwa takatifu kabisa. 11Utalipaka mafuta birika pamoja na kiweko chake, na kulitakasa. 12Utawaleta Haruni na wanawe kwenye mlango wa Hema la Kukutania na kuwaosha kwa maji. 13Utamvika Haruni mavazi matakatifu, utampaka mafuta na kumtakasa, ili anitumikie kama kuhani. 14Kisha utawaleta wanawe mbele na kuwavika kanzu. 15Utawapaka mafuta kama ulivyompaka baba yao, ili wao pia wanitumikie kama makuhani. Kupakwa mafuta kwao kutawapa ukuhani wa kudumu milele, katika kila kizazi.” 16Musa alitekeleza yote aliyoamriwa na BWANA. Hivyo ndivyo hasa alivyofanya.

17Katika mwaka wa pili, siku ya kwanza ya mwezi wa kwanza, maskani ilisimamishwa. 18Musa aliisimamisha maskani. Aliweka misingi yake, akazisimika fremu zake, akatia mataruma yake na kuzisimamisha nguzo zake. 19Alilitandaza hema juu ya maskani, akaweka kifuniko cha hema juu yake, kama BWANA alivyomwamuru Musa.

20Aliuchukua Ushuhuda akauweka ndani ya sanduku, akaitia mipiko kwenye sanduku, na kuweka kiti cha rehema juu ya sanduku. 21Aliliingiza sanduku ndani ya maskani, akatundika pazia la ndani linalolisitiri, ili sanduku la Ushuhuda lisionekane, kama BWANA alivyomwamuru Musa.

22Aliiweka meza ndani ya Hema la Kukutania, upande wa kaskazini wa maskani, nje ya pazia la ndani. 23Aliipanga mikate juu yake kwa safu mbele za BWANA, kama BWANA alivyomwamuru Musa.

24Alikiweka kinara cha taa ndani ya Hema la Kukutania, kuelekeana na meza, upande wa kusini wa maskani. 25Alizipandisha taa mbele za BWANA, kama BWANA alivyomwamuru Musa.

26Aliiweka madhabahu ya dhahabu ndani ya Hema la Kukutania, mbele ya pazia la ndani, 27akafukiza juu yake uvumba wenye harufu nzuri, kama BWANA alivyomwamuru Musa.

28Alitundika pazia la mlango wa maskani. 29Aliiweka madhabahu ya sadaka ya kuteketezwa penye mlango wa maskani, yaani Hema la Kukutania, akatoa juu yake sadaka ya kuteketezwa na sadaka ya nafaka, kama BWANA alivyomwamuru Musa.

30Kati ya Hema la Kukutania na madhabahu aliliweka birika, akalijaza maji ya kunawia. 31Musa, Haruni na wana wa Haruni walikuwa wakinawa mikono na miguu yao kwa maji ya birika hilo. 32Kila walipoingia ndani ya Hema la Kukutania au kuikaribia madhabahu, walinawa, kama BWANA alivyomwamuru Musa.

33Aliusimamisha ua kuizunguka maskani na madhabahu pande zote, akatundika pazia la lango la ua. Hivyo Musa akaikamilisha kazi.

34Ndipo wingu likalifunika Hema la Kukutania, na maskani ikajazwa utukufu wa BWANA. 35Musa hakuweza kuingia ndani ya Hema la Kukutania, kwa kuwa wingu lilikuwa limetua juu yake, na maskani ilikuwa imejaa utukufu wa BWANA. 36Kila wingu lilipoinuka kutoka juu ya maskani, Waisraeli walivunja kambi na kuendelea na safari, katika kila hatua ya safari zao. 37Kama wingu lilibaki pale lilipokuwa, nao walibaki, hadi siku lilipoinuka. 38Mchana wingu la BWANA lilikaa juu ya maskani, na usiku moto uling’aa ndani yake. Nyumba yote ya Israeli iliweza kuona hayo, katika kila hatua ya safari zao.