Mambo ya Walawi 1

1Kutoka katika Hema la Kukutania, BWANA alimwita Musa na kusema naye. Akasema, 2“Sema na Waisraeli, uwaambie, ‘Mtu wa kwenu akimletea BWANA mnyama kuwa sadaka, mnyama huyo atatoka katika kundi la ng’ombe au la kondoo na mbuzi. 3Sadaka ya kuteketezwa kutoka kwa kundi la ng’ombe itakuwa dume asiye na kasoro. Ataletwa kwenye mlango wa Hema la Kukutania, ili BWANA amkubali yule anayemtoa. 4Anayeitoa ataweka mkono wake juu ya kichwa cha sadaka ya kuteketezwa, nayo itakubaliwa kwa ajili yake na kumfanyia upatanisho. 5Yule aliyemleta fahali mchanga atamchinja hapo mbele za BWANA. Kisha wana wa Haruni, makuhani, wataileta damu na kuirusha pande zote za madhabahu iliyo kwenye mlango wa Hema la Kukutania. 6Kisha anayeitoa ataichuna ngozi sadaka ya kuteketezwa na kuikata vipande vyake. 7Wana wa kuhani Haruni wataweka moto juu ya madhabahu na kupanga kuni kwa utaratibu juu ya moto. 8Wana wa Haruni, makuhani, watapanga vipande hivyo pamoja na kichwa na shahamu juu ya kuni zinazowaka juu ya madhabahu. 9Viungo vya ndani na miguu vitaoshwa kwa maji, naye kuhani atamfukiza mnyama mzima juu ya madhabahu. Ni sadaka ya kuteketezwa, sadaka ya kuteketezwa kwa moto, harufu ya kupendeza kwa BWANA.

10Kama mnyama wa sadaka ya kuteketezwa ni wa kundi la kondoo na mbuzi, yaani kondoo au mbuzi, atakuwa dume asiye na kasoro. 11Atachinjwa mbele za BWANA upande wa kaskazini wa madhabahu, na wana wa Haruni, makuhani, watairusha damu yake pande zote za madhabahu. 12Atakatwa vipande vyake, naye kuhani atavipanga pamoja na kichwa na shahamu juu ya kuni zinazowaka juu ya madhabahu. 13Viungo vya ndani na miguu vitaoshwa kwa maji. Kuhani atavitoa vyote na kuvifukiza juu ya madhabahu. Ni sadaka ya kuteketezwa, sadaka ya kuteketezwa kwa moto, harufu ya kupendeza kwa BWANA.

14Mtu akimtolea BWANA ndege kuwa sadaka ya kuteketezwa, ataleta hua au kinda la njiwa. 15Kuhani atamleta madhabahuni. Atakinyofoa kichwa chake na kukifukiza kichwa hicho juu ya madhabahu, nayo damu ya ndege huyo itakamuliwa ubavuni mwa madhabahu. 16Ataliondoa gole lake pamoja na manyoya yake na kulitupa upande wa mashariki wa madhabahu, mahali pa majivu. 17Akimshika kwa mabawa, atampasua bila kumgawa sehemu mbili. Kisha kuhani atamfukiza juu ya madhabahu, juu ya kuni zinazowaka. Ni sadaka ya kuteketezwa, sadaka ya kuteketezwa kwa moto, harufu ya kupendeza kwa BWANA.