Mambo ya Walawi 6

1BWANA alinena na Musa. Akasema, 2“Tuseme mtu ametenda dhambi na kumsaliti BWANA kwa kumdanganya jirani yake: akikana kwamba anashika mali ambayo jirani alimpa aitunze au iwe rehani, au kwa kunyang’anya mali ya jirani, au kwa kumdhulumu, 3au kwa kushika mali iliyopotea aliyoiokota na kuikana, au kwa kuapa kwa uongo kuhusu lolote kati ya makosa ambayo watu hufanya, 4basi, akiwa na hatia ya dhambi kama hiyo, atarudisha mali aliyonyang’anya au aliyopata kwa dhuluma, amana aliyowekewa, au kitu kilichopotea alichookota, 5au kitu chochote kile alichokiapia kwa uongo. Atakilipa kikamilifu na kuongeza sehemu ya tano zaidi, na mwenye mali atakipokea siku ambayo mwenye hatia atatoa sadaka yake ya hatia. 6Atampelekea kuhani sadaka yake ya hatia kwa ajili ya BWANA: kondoo dume asiye na kasoro kutoka kundini, mwenye thamani iliyowekwa. 7Mbele za BWANA kuhani atamfanyia upatanisho, naye atasamehewa kwa kosa lolote lililomletea hatia.”

8BWANA alinena na Musa. Akasema, 9“Wape Haruni na wanawe agizo hili: ‘Haya ndiyo maelekezo kuhusu sadaka ya kuteketezwa. Sadaka ya kuteketezwa itakaa juu ya meko ya madhabahu usiku kucha mpaka asubuhi, na moto wa madhabahu utaendelea kuwaka juu yake. 10Kuhani atavaa vazi lake la kitani, pamoja na suruali ya ndani ya kitani mwilini mwake. Kisha atayazoa majivu yaliyobaki baada ya moto kuiteketeza sadaka ya kuteketezwa juu ya madhabahu, na kuyaweka kando ya madhabahu. 11Kisha atavua mavazi hayo, avae mengine, na kuyapeleka majivu nje ya kambi, mahali palipo safi kwa taratibu za ibada. 12Moto wa madhabahu utaendelea kuwaka na hautazimika. Kila asubuhi kuhani ataongeza kuni juu yake, kuipanga sadaka ya kuteketezwa juu yake, na kufukiza juu yake shahamu ya sadaka za amani. 13Moto utawaka juu ya madhabahu wakati wote, usizimike kamwe. 14Haya ndiyo maelekezo kuhusu sadaka ya nafaka. Wana wa Haruni wataitoa mbele za BWANA, mbele ya madhabahu. 15Kuhani atachukua konzi ya unga laini wa sadaka ya nafaka pamoja na sehemu ya mafuta yake, na ubani wote ulio juu yake, na kuvifukiza juu ya madhabahu kuwa sehemu yake ya ukumbusho, harufu ya kupendeza kwa BWANA. 16Kinachobaki ni chakula cha Haruni na wanawe. Watakila kama mikate isiyotiwa chachu, mahali patakatifu: katika ua wa Hema la Kukutania ndipo watakapokila. 17Haitaokwa pamoja na chachu. Nimewapa kuwa fungu lao la sadaka zangu za kuteketezwa kwa moto. Ni takatifu kabisa, kama sadaka ya dhambi na sadaka ya hatia. 18Mwanamume yeyote wa uzao wa Haruni anaweza kuila. Ni fungu lao la kudumu la sadaka za kuteketezwa kwa moto za BWANA, kwa vizazi vyenu vyote. Yeyote atakayezigusa sadaka hizi atakuwa mtakatifu.’”

19BWANA alinena na Musa. Akasema, 20“Hii ndiyo sadaka ambayo Haruni na wanawe watamtolea BWANA tangu siku atakapopakwa mafuta: kama lita 2 ya unga laini kuwa sadaka ya nafaka ya kawaida, nusu asubuhi na nusu jioni. 21Itaandaliwa kwa mafuta juu ya kikaango bapa. Utaileta ikiwa imelowekwa vizuri, na kuitoa kuwa sadaka ya nafaka iliyomegwa vipande vipande, harufu ya kupendeza kwa BWANA. 22Mwanawe atakayemrithi kuwa kuhani aliyepakwa mafuta ataiandaa. Hili ni fungu la kudumu la BWANA: itateketezwa kabisa. 23Kila sadaka ya nafaka ambayo kuhani anaitoa kwa ajili yake mwenyewe itateketezwa yote; haipaswi kuliwa.”

24BWANA alinena na Musa. Akasema, 25“Sema na Haruni na wanawe, uwaambie, ‘Haya ndiyo maelekezo kuhusu sadaka ya dhambi. Sadaka ya dhambi itachinjwa mbele za BWANA mahali pale pale ambapo sadaka ya kuteketezwa huchinjwa. Ni takatifu kabisa. 26Kuhani anayeitoa kwa ajili ya dhambi ataila. Itapaswa kuliwa mahali patakatifu, katika ua wa Hema la Kukutania. 27Chochote kitakachogusa nyama yake kitakuwa kitakatifu. Damu yake ikirukia vazi, utaiosha sehemu iliyoingia doa mahali patakatifu. 28Chungu chochote cha udongo itakachopikiwa lazima kivunjwe. Ikipikwa katika sufuria ya shaba, sufuria hiyo itasuguliwa na kusuuzwa kwa maji. 29Mwanamume yeyote wa ukoo wa makuhani anaweza kuila. Ni takatifu kabisa. 30Lakini sadaka yoyote ya dhambi haitaliwa ikiwa sehemu ya damu yake imeletwa ndani ya Hema la Kukutania kufanya upatanisho katika mahali patakatifu. Itachomwa motoni.