Mambo ya Walawi 9

1Siku ya nane ilipofika, Musa aliwaita Haruni na wanawe, pamoja na wazee wa Israeli. 2Alimwambia Haruni, “Jichagulie ndama mchanga wa ng’ombe kwa sadaka ya dhambi, na kondoo dume kwa sadaka ya kuteketezwa, wote wawili wasio na kasoro, uwalete mbele za BWANA. 3Kisha uwaambie Waisraeli, ‘Leteni beberu kwa sadaka ya dhambi, na kwa sadaka ya kuteketezwa ndama na mwana-kondoo wa mwaka mmoja wasio na kasoro, 4na ng’ombe dume na kondoo dume wa kutolewa dhabihu mbele za BWANA kuwa sadaka ya amani, na sadaka ya nafaka iliyochanganywa na mafuta. Kwa maana leo BWANA atawatokea.’” 5Basi walileta vyote alivyoamuru Musa mbele ya Hema la Kukutania, na jumuiya yote ikakaribia, ikasimama hapo mbele za BWANA. 6Musa alisema, “Fanyeni hivi, kama BWANA alivyoamuru, na utukufu wa BWANA utawatokea.” 7Kisha Musa alimwambia Haruni, “Isogelee madhabahu. Toa sadaka yako ya dhambi na sadaka yako ya kuteketezwa, na hivyo ufanye upatanisho kwa ajili yako na kwa ajili ya watu. Kisha toa sadaka ya watu na uwafanyie upatanisho, kama BWANA alivyoamuru.” 8Basi Haruni aliisogelea madhabahu, akamchinja ndama wa sadaka yake mwenyewe ya dhambi. 9Wana wa Haruni walimpa damu. Akachovya kidole chake ndani yake, akatia kiasi kwenye pembe za madhabahu, na damu iliyobaki akaimwaga chini ya madhabahu. 10Kisha akafukiza juu ya madhabahu shahamu, figo na kipande kirefu cha ini vya sadaka ya dhambi, kama BWANA alivyomwagiza Musa. 11Nyama na ngozi aliviteketeza kwa moto nje ya kambi. 12Kisha Haruni aliichinja sadaka ya kuteketezwa. Wanawe walipompa damu, akairusha kwenye madhabahu pande zote. 13Wanawe walimpa vipande vya sadaka ya kuteketezwa kimoja kimoja, pamoja na kichwa, naye akavifukiza vyote juu ya madhabahu. 14Viungo vya ndani na miguu aliviosha, kisha akavifukiza juu ya madhabahu, juu ya sehemu nyingine za sadaka ya kuteketezwa. 15Baada ya hayo Haruni aliileta sadaka ya watu. Akamchukua beberu wa sadaka yao ya dhambi, akamchinja, akamtoa kuwa sadaka ya dhambi kama alivyomtoa yule wa kwanza. 16Aliileta pia sadaka ya kuteketezwa, akaitoa kama agizo lilivyotaka. 17Kisha aliitoa sadaka ya nafaka. Akachukua konzi nzima kutoka kwayo, akaifukiza juu ya madhabahu, zaidi ya sadaka ya kuteketezwa ya asubuhi. 18Kisha aliwachinja ng’ombe dume na kondoo dume, sadaka ya amani kwa ajili ya watu. Wana wa Haruni walipompa damu, akairusha kwenye madhabahu pande zote. 19Vipande vya shahamu vya ng’ombe dume na vya kondoo dume, mkia mnono, shahamu inayofunika viungo vya ndani, figo na kipande kirefu cha ini, 20vipande hivyo vya shahamu waliviweka juu ya vidari. Kisha Haruni akafukiza shahamu juu ya madhabahu. 21Vidari na paja la kulia, Haruni alivitikisa mbele za BWANA kuwa sadaka ya kutikiswa, kama Musa alivyoagiza. 22Kisha Haruni aliinyosha mikono yake kuelekea watu, akawabariki. Na alipomaliza kutoa sadaka ya dhambi, sadaka ya kuteketezwa na sadaka ya amani, akashuka kutoka madhabahuni. 23Musa na Haruni waliingia katika Hema la Kukutania, na walipotoka tena wakawabariki watu. Kisha utukufu wa BWANA ukawatokea watu wote. 24Moto ulitoka mbele za BWANA, ukaiteketeza kabisa sadaka ya kuteketezwa na vipande vya shahamu vilivyokuwa juu ya madhabahu. Watu wote walipoona hayo, wakapiga kelele za shangwe na kusujudu nyuso zao hadi chini.