Mambo ya Walawi 23

1BWANA alisema na Musa. Akasema, 2“Sema na Waisraeli, uwaambie, ‘Mtazitangaza sikukuu zilizoamriwa za BWANA kuwa mikutano mitakatifu. Hizi ndizo sikukuu zangu zilizoamriwa: 3Kazi inaweza kufanywa kwa siku sita, lakini siku ya saba ni Sabato ya pumziko kamili, mkutano mtakatifu. Msifanye kazi ya aina yoyote. Katika nyumba zenu zote siku hiyo itashikwa kuwa Sabato kwa BWANA.

4Hizi ndizo sikukuu zilizoamriwa za BWANA, mikutano mitakatifu ambayo mtapaswa kuitangaza kila moja wakati wake unapofika. 5Katika mwezi wa kwanza, siku yake ya kumi na nne, jioni inapoingia, Pasaka itaadhimishwa kwa ajili ya BWANA. 6Siku ya kumi na tano ya mwezi huu ni Sikukuu ya Mikate Isiyotiwa Chachu, inayoadhimishwa kwa ajili ya BWANA. Kwa siku saba mtakula mikate isiyotiwa chachu. 7Siku ya kwanza itakuwa kwenu mkutano mtakatifu, ambapo hamtafanya kazi zenu za kawaida. 8Kila siku kati ya zile saba, mtamtolea BWANA sadaka ya kuteketezwa kwa moto. Siku ya saba kutakuwa tena na mkutano mtakatifu, bila kazi zenu za kawaida.’”