Mambo ya Walawi 25

1BWANA alinena na Musa katika mlima Sinai. Akasema, 2“Waambie Waisraeli hivi: ‘Mtakapoingia katika nchi ninayowapa, nchi itakuwa na pumziko la Sabato kwa heshima ya BWANA. 3Kwa miaka sita unaweza kupanda mashamba yako, kupogoa mizabibu yako na kukusanya mazao yake. 4Lakini mwaka wa saba utakuwa kwa nchi Sabato ya pumziko kamili, Sabato kwa BWANA; usipande mashamba yako wala usipogoe mizabibu yako. 5Usivune nafaka inayoota yenyewe kutokana na mavuno yaliyopita, wala usichume zabibu za mizabibu uliyoiacha bila kuipogoa. Utakuwa mwaka wa pumziko kamili kwa nchi. 6Chochote nchi itakachotoa katika mwaka wake wa Sabato kitakuwa chakula kwenu nyote: kwako, kwa watumishi wako wa kiume na wa kike, kwa kibarua wako na kwa mkaaji anayeishi pamoja nawe, 7na kwa mifugo yako na wanyama wa porini walio katika nchi yako. Mazao yote ya nchi yanaweza kuliwa.

8Utahesabu Sabato saba za miaka, yaani miaka saba mara saba. Muda wa Sabato hizo saba za miaka utakuwa miaka arobaini na tisa. 9Kisha siku ya kumi ya mwezi wa saba, utapiga pembe ya kondoo dume kwa sauti kuu ili sauti yake ienee nchi nzima. Katika Siku ya Upatanisho mtaipiga pembe katika nchi yenu yote. 10Mtautenga mwaka wa hamsini kuwa mtakatifu, na kutangaza uhuru katika nchi kwa wote wanaoishi ndani yake. Utakuwa Yubile yenu: kila mmoja wenu atarudi kwenye ardhi yake na kwenye ukoo wake. 11Mwaka huo wa hamsini utakuwa Yubile yenu. Msipande, wala msivune kinachoota chenyewe, wala msichume zabibu za mizabibu isiyopogolewa. 12Kwa maana ni Yubile, nayo itakuwa takatifu kwenu. Mtakula kile shamba linachotoa, moja kwa moja kutoka shambani.