Mambo ya Walawi 15

1BWANA alisema na Musa na Haruni. Akasema, 2“Semeni na Waisraeli, mwaambie, ‘Mwanamume yeyote akitokwa na majimaji kutoka mwilini mwake, majimaji hayo yanamfanya kuwa najisi. 3Huu ndio unajisi unaoletwa na majimaji yake: iwe mwili wake unayatiririsha majimaji hayo au yamezibika, kwa vyovyote vile yeye ni najisi. 4Kitanda chochote anachokilalia mwanamume anayetokwa na majimaji kinakuwa najisi, na vivyo hivyo kitu chochote anachokikalia. 5Mtu yeyote anayegusa kitanda chake atafua nguo zake na kuoga kwa maji, naye atabaki najisi mpaka jioni. 6Mtu yeyote anayeketi juu ya kitu alichokalia mwanamume anayetokwa na majimaji atafua nguo zake na kuoga kwa maji, naye atabaki najisi mpaka jioni. 7Mtu yeyote anayegusa mwili wa mwanamume anayetokwa na majimaji atafua nguo zake na kuoga kwa maji, naye atabaki najisi mpaka jioni. 8Mwanamume anayetokwa na majimaji akimtemea mate mtu aliye safi, mtu huyo atafua nguo zake na kuoga kwa maji, naye atabaki najisi mpaka jioni. 9Tandiko lolote analolipanda mwanamume anayetokwa na majimaji linakuwa najisi. 10Mtu yeyote anayegusa kitu chochote kilichokuwa chini yake atakuwa najisi mpaka jioni, na mtu yeyote anayebeba vitu hivyo atafua nguo zake na kuoga kwa maji, naye atabaki najisi mpaka jioni. 11Mwanamume anayetokwa na majimaji akimgusa mtu bila kusuuza kwanza mikono yake kwa maji, mtu huyo atafua nguo zake na kuoga kwa maji, naye atabaki najisi mpaka jioni. 12Mwanamume anayetokwa na majimaji akigusa chungu cha udongo, kitavunjwa; akigusa chombo cha mbao, kitasuuzwa kwa maji. 13Mwanamume anayetokwa na majimaji akipona, atahesabu siku saba za kutakaswa kwake. Kisha atafua nguo zake na kuoga mwili wake kwa maji yanayotiririka, naye atakuwa safi. 14Siku ya nane atapata hua wawili au makinda mawili ya njiwa, na kuwaleta mbele za BWANA mlangoni pa Hema la Kukutania, na hapo atampa kuhani. 15Kuhani atamtoa ndege mmoja kuwa sadaka ya dhambi na mwingine kuwa sadaka ya kuteketezwa, na hivyo atamfanyia upatanisho mbele za BWANA kwa sababu ya majimaji yake.

16Mwanamume akitokwa na shahawa, ataoga mwili wake wote kwa maji, naye atabaki najisi mpaka jioni. 17Shahawa zikiingia kwenye nguo yoyote au kitu cha ngozi, kitu hicho kitafuliwa kwa maji, nacho kitabaki najisi mpaka jioni.

18Mwanamume akilala na mwanamke na shahawa zikatoka, wote wawili wataoga kwa maji, nao watabaki najisi mpaka jioni. 19Mwanamke akitokwa na majimaji, na kinachotoka mwilini mwake ni damu, hedhi yake itamfanya kuwa najisi kwa siku saba. Mtu yeyote atakayemgusa atakuwa najisi mpaka jioni. 20Wakati wa hedhi yake, kitu chochote anachokilalia na kitu chochote anachokikalia kinakuwa najisi. 21Mtu yeyote anayegusa kitanda chake atafua nguo zake na kuoga kwa maji, naye atabaki najisi mpaka jioni. 22Mtu yeyote anayegusa kitu chochote alichokikalia atafua nguo zake na kuoga kwa maji, naye atabaki najisi mpaka jioni. 23Hata kama ni kitu kilichowekwa juu ya kitanda chake au juu ya kiti anachokitumia, mtu yeyote anayekigusa atakuwa najisi mpaka jioni. 24Mwanamume akilala naye kweli na unajisi wa hedhi yake ukampata, atakuwa najisi siku saba. Kila kitanda atakacholalia kitakuwa najisi pia.

25Mwanamke anaweza kutokwa na damu siku nyingi wakati ambao si wa hedhi yake, au kutokwa na damu kunakoendelea baada ya hedhi yake. Siku zote za kutokwa huko kwa unajisi atakuwa kama alivyo katika siku za hedhi yake: yeye ni najisi. 26Muda wote damu inapotoka, kitanda chochote anachokilalia kitahesabiwa kama kitanda chake wakati wa hedhi yake, na kitu chochote anachokikalia kitakuwa najisi, kama ilivyo wakati wa hedhi yake. 27Mtu yeyote anayevigusa vitu hivyo anakuwa najisi. Atafua nguo zake na kuoga kwa maji, naye atabaki najisi mpaka jioni. 28Damu yake ikishakoma, atahesabu siku saba; kisha atakuwa safi. 29Siku ya nane atapata hua wawili au makinda mawili ya njiwa na kumletea kuhani mlangoni pa Hema la Kukutania. 30Kuhani atamtoa ndege mmoja kuwa sadaka ya dhambi na mwingine kuwa sadaka ya kuteketezwa, na hivyo atamfanyia upatanisho mbele za BWANA kwa sababu ya kutokwa kwake na damu kulikomtia unajisi.’ 31Ni lazima mwatenge Waisraeli mbali na unajisi wao, ili unajisi huo usiwaletee kifo wanapoitia unajisi maskani yangu, iliyo kati yao. 32Haya ndiyo maelekezo kuhusu mwanamume anayetokwa na majimaji, na mwanamume anayetokwa na shahawa zikamfanya kuwa najisi, 33kwa mwanamke aliye katika hali ya hedhi yake, kwa mtu yeyote, mwanamume au mwanamke, anayetokwa na majimaji, na kwa mwanamume anayelala na mwanamke akiwa najisi.”