Mambo ya Walawi 4

1BWANA alisema na Musa. Akasema, 2“Sema na Waisraeli, uwaambie, ‘Tuseme mtu ametenda dhambi bila kukusudia, kwa kufanya mojawapo ya mambo ambayo amri za BWANA zinakataza yasifanywe. 3Ikiwa kuhani aliyepakwa mafuta ndiye anayetenda dhambi, dhambi yake inawatia watu hatia pia. Kwa ajili ya dhambi aliyoitenda, atamtolea BWANA fahali mchanga asiye na kasoro kuwa sadaka ya dhambi. 4Fahali huyo ataletwa mbele za BWANA kwenye mlango wa Hema la Kukutania. Kuhani ataweka mkono wake juu ya kichwa cha fahali na kumchinja mbele za BWANA. 5Kuhani aliyepakwa mafuta atakusanya sehemu ya damu ya fahali na kuipeleka ndani ya Hema la Kukutania. 6Akiwa amechovya kidole chake katika damu, kuhani atanyunyiza sehemu yake mara saba mbele za BWANA, akielekea pazia la mahali patakatifu. 7Kisha kuhani atapaka sehemu ya damu kwenye pembe za madhabahu ya uvumba wa manukato, iliyo mbele za BWANA ndani ya Hema la Kukutania. Damu yote ya fahali iliyobaki ataimwaga kwenye msingi wa madhabahu ya sadaka ya kuteketezwa, iliyo kwenye mlango wa Hema la Kukutania. 8Kutoka kwa fahali wa sadaka ya dhambi ataondoa shahamu yote: shahamu inayofunika viungo vya ndani, shahamu yote iliyoshikamana navyo, 9figo mbili pamoja na shahamu iliyo juu yake karibu na sehemu ya chini ya mgongo, na kipande kirefu cha ini, atakachokiondoa pamoja na figo, 10kama vinavyoondolewa kutoka kwa ng’ombe wa sadaka ya amani. Kisha kuhani atavifukiza juu ya madhabahu ya sadaka ya kuteketezwa. 11Na kuhusu sehemu nyingine za fahali, ngozi yake na nyama yake yote, kichwa chake na miguu yake, viungo vyake vya ndani na mavi yake, 12fahali mzima atamchukua nje ya kambi mpaka mahali palipo safi kwa ibada, mahali majivu yanapomwagwa. Huko atamchoma kwa moto wa kuni. Lazima achomwe mahali majivu yanapomwagwa.

13Ikiwa jumuiya yote ya Israeli imepotea bila kusanyiko kujua, nao wakafanya jambo ambalo mojawapo ya amri za BWANA inakataza lisifanywe, wana hatia. 14Mara dhambi waliyoitenda itakapojulikana, kusanyiko litatoa fahali mchanga kuwa sadaka ya dhambi. Watamleta mbele ya Hema la Kukutania. 15Mbele za BWANA, wazee wa jumuiya wataweka mikono yao juu ya kichwa cha fahali, kisha fahali atachinjwa mbele za BWANA. 16Kuhani aliyepakwa mafuta ataipeleka sehemu ya damu ya fahali ndani ya Hema la Kukutania. 17Akichovya kidole chake katika damu, kuhani atainyunyiza mara saba mbele za BWANA, akielekea pazia. 18Atapaka sehemu ya damu kwenye pembe za madhabahu iliyo ndani ya Hema la Kukutania, ile iliyo mbele za BWANA. Damu yote iliyobaki ataimwaga kwenye msingi wa madhabahu ya sadaka ya kuteketezwa, iliyo kwenye mlango wa Hema la Kukutania. 19Ataondoa shahamu yake yote na kuifukiza juu ya madhabahu. 20Atamfanyia fahali huyu sawasawa na alivyomfanyia fahali wa kwanza wa sadaka ya dhambi. Hivyo kuhani atawafanyia upatanisho, nao watasamehewa. 21Kisha atamchukua fahali huyo nje ya kambi na kumchoma huko, kama fahali wa kwanza alivyochomwa. Ni sadaka ya dhambi kwa ajili ya kusanyiko.

22Kiongozi akitenda dhambi, kwa kufanya bila kukusudia jambo ambalo mojawapo ya amri za BWANA Mungu wake inakataza lisifanywe, ana hatia. 23Au akifahamishwa dhambi aliyoitenda, ataleta beberu asiye na kasoro kuwa sadaka yake. 24Akiweka mkono wake juu ya kichwa cha beberu, atamchinja mbele za BWANA mahali sadaka ya kuteketezwa inapochinjwa. Ni sadaka ya dhambi. 25Kwa kidole chake, kuhani atapaka sehemu ya damu ya sadaka ya dhambi kwenye pembe za madhabahu ya sadaka ya kuteketezwa. Damu iliyobaki ataimwaga kwenye msingi wa madhabahu hiyohiyo. 26Ataifukiza shahamu yake yote juu ya madhabahu, kama inavyofanywa kwa shahamu ya sadaka ya amani. Kwa njia hii kuhani atamfanyia upatanisho kwa ajili ya dhambi yake, naye atasamehewa.

27Ikiwa mtu yeyote kati ya watu wa kawaida atatenda dhambi bila kukusudia, kwa kufanya jambo ambalo mojawapo ya amri za BWANA inakataza lisifanywe, ana hatia. 28Au akifahamishwa dhambi aliyoitenda, ataleta mbuzi jike asiye na kasoro kuwa sadaka yake, kwa ajili ya dhambi aliyoitenda. 29Anayemtoa ataweka mkono wake juu ya kichwa cha mnyama wa sadaka ya dhambi, kisha atamchinja mahali sadaka za kuteketezwa zinapochinjwa. 30Kuhani atachukua sehemu ya damu yake kwa kidole chake na kuipaka kwenye pembe za madhabahu ya sadaka ya kuteketezwa. Damu yake iliyobaki ataimwaga kwenye msingi wa madhabahu. 31Shahamu yake yote itaondolewa kama shahamu ya sadaka ya amani inavyoondolewa, na kuhani ataifukiza juu ya madhabahu, harufu ya kupendeza kwa BWANA. Kuhani akiisha kumfanyia mtu huyo upatanisho kwa njia hii, atasamehewa.

32Ikiwa sadaka ya dhambi anayoileta ni mwana-kondoo, atakuwa jike asiye na kasoro. 33Akiweka mkono wake juu ya kichwa cha mnyama wa sadaka ya dhambi, anayemtoa atamchinja kuwa sadaka ya dhambi mahali sadaka za kuteketezwa zinapochinjwa. 34Kuhani atatia sehemu ya damu ya sadaka ya dhambi kwenye kidole chake na kuipaka kwenye pembe za madhabahu ya sadaka ya kuteketezwa. Damu yote iliyobaki ataimwaga kwenye msingi wa madhabahu. 35Shahamu yake yote itaondolewa, kama shahamu ya mwana-kondoo inavyoondolewa kwa sadaka ya amani. Kisha kuhani ataifukiza shahamu hiyo juu ya madhabahu, juu ya sadaka za BWANA za kuteketezwa kwa moto. Hivyo kuhani atafanya upatanisho kwa ajili ya dhambi aliyoitenda mtu huyo, naye atasamehewa.