Mambo ya Walawi 16

1BWANA alisema na Musa baada ya wana wawili wa Haruni kumkaribia BWANA na kufa. 2BWANA alimwambia Musa, “Sema na ndugu yako Haruni. Asiingie wakati wowote apendao katika Patakatifu pa Patakatifu nyuma ya pazia, mbele ya kiti cha rehema kilicho juu ya sanduku, ili asife. Kwa maana ni katika wingu juu ya kiti cha rehema ndipo mimi ninapoonekana. 3Haruni ataingia Patakatifu pa Patakatifu kwa njia hii tu: pamoja na fahali mchanga kuwa sadaka ya dhambi na kondoo dume kuwa sadaka ya kuteketezwa. 4Atavaa kanzu takatifu ya kitani, pamoja na suruali za ndani za kitani mwilini mwake, mshipi wa kitani kiunoni na kilemba cha kitani kichwani. Kwa kuwa mavazi haya ni matakatifu, ataoga mwili wake kwa maji kisha ayavae. 5Kutoka kwa jumuiya ya Waisraeli atachukua mabeberu wawili kuwa sadaka ya dhambi na kondoo dume mmoja kuwa sadaka ya kuteketezwa. 6Haruni atamleta fahali wa sadaka yake mwenyewe ya dhambi, na hivyo kujifanyia upatanisho yeye mwenyewe na watu wa nyumbani mwake. 7Atawachukua mabeberu hao wawili na kuwasimamisha mbele za BWANA kwenye mlango wa Hema la Kukutania. 8Haruni atawapigia mabeberu hao wawili kura: kura moja kwa ajili ya BWANA na kura nyingine kwa ajili ya Azazeli. 9Kisha Haruni atamleta beberu aliyechaguliwa kwa kura ya BWANA na kumtoa kuwa sadaka ya dhambi. 10Lakini beberu aliyechaguliwa kwa kura ya Azazeli atasimamishwa hai mbele za BWANA, ili upatanisho ufanywe kwa njia yake, kwa kumpeleka jangwani kwa Azazeli. 11Haruni atamleta fahali wa sadaka yake mwenyewe ya dhambi na kujifanyia upatanisho yeye mwenyewe na watu wa nyumbani mwake. Atamchinja fahali huyo. 12Atajaza chetezo makaa yanayowaka kutoka kwenye madhabahu iliyo mbele za BWANA, atachukua konzi mbili za uvumba wa manukato uliosagwa laini, na kuvipeleka nyuma ya pazia. 13Hapo mbele za BWANA ataweka uvumba juu ya moto, na wingu la uvumba litafunika kiti cha rehema kilicho juu ya Ushuhuda. Hivyo hatakufa. 14Atachukua sehemu ya damu ya fahali na kuinyunyiza kwa kidole chake upande wa mashariki wa kiti cha rehema, upande wake wa mbele. Pia mbele ya kiti cha rehema atanyunyiza sehemu ya damu kwa kidole chake mara saba. 15Kisha atamchinja beberu aliye sadaka ya dhambi kwa ajili ya watu na kuileta damu yake nyuma ya pazia. Atafanya kwa damu hiyo kama alivyofanya kwa damu ya fahali, akiinyunyiza juu ya kiti cha rehema na mbele yake. 16Hivyo atafanya upatanisho kwa ajili ya Patakatifu pa Patakatifu, akipatakasa kutokana na unajisi wa Waisraeli, uasi wao na dhambi zao zote. Atafanya vivyo hivyo kwa ajili ya Hema la Kukutania, lililo pamoja nao katikati kabisa ya unajisi wao. 17Wakati Haruni yuko ndani akifanya upatanisho katika Patakatifu pa Patakatifu, mtu yeyote asiwe ndani ya Hema la Kukutania mpaka atakapotoka tena. Yeye anafanya upatanisho kwa ajili yake mwenyewe, kwa ajili ya watu wa nyumbani mwake na kwa ajili ya kusanyiko lote la Israeli. 18Kisha atatoka kwenda kwenye madhabahu iliyo mbele za BWANA na kufanya upatanisho kwa ajili yake. Akichukua sehemu ya damu ya fahali na ya beberu, ataipaka kwenye pembe za madhabahu pande zote. 19Atanyunyiza sehemu ya damu juu ya madhabahu kwa kidole chake mara saba. Hivyo ataitakasa kutokana na unajisi wa Waisraeli na kuifanya takatifu tena. 20Akishamaliza upatanisho kwa ajili ya Patakatifu pa Patakatifu, Hema la Kukutania na madhabahu, atamleta beberu ambaye bado yuko hai. 21Haruni ataweka mikono yake miwili juu ya kichwa cha beberu aliye hai na kuungama juu yake maovu yote ya Waisraeli, uasi wao wote na dhambi zao zote. Hivyo atayaweka juu ya kichwa cha beberu, kisha atampeleka jangwani pamoja na mtu aliyewekwa tayari kwa kazi hiyo. 22Beberu atabeba maovu yao yote juu yake mpaka nchi kame, na yule mtu atamwachilia beberu huyo jangwani. 23Baada ya hayo Haruni ataingia ndani ya Hema la Kukutania. Humo atayavua mavazi ya kitani aliyoyavaa ili kuingia Patakatifu pa Patakatifu, na kuyaacha ndani ya hema. 24Ataoga mwili wake kwa maji katika mahali patakatifu na kuvaa mavazi yake ya kawaida. Kisha atatoka nje na kutoa sadaka yake mwenyewe ya kuteketezwa na ile ya watu, na hivyo kufanya upatanisho kwa ajili yake mwenyewe na kwa ajili ya watu. 25Shahamu ya sadaka ya dhambi ataifukiza juu ya madhabahu. 26Mtu aliyempeleka beberu kwa Azazeli atafua nguo zake na kuoga kwa maji kabla ya kurudi kambini. 27Kuhusu fahali na beberu wa sadaka za dhambi, ambao damu yao ilipelekwa Patakatifu pa Patakatifu kwa ajili ya upatanisho, mtu atawatoa nje ya kambi, na huko ngozi zao, nyama yao na mavi yao vitachomwa. 28Yule anayevichoma atafua nguo zake na kuoga kwa maji kabla ya kurudi kambini. 29Hii itakuwa kanuni ya kudumu milele kwenu. Siku ya kumi ya mwezi wa saba mtajinyenyekeza kwa kufunga, wala msifanye kazi ya aina yoyote, mzawa na mgeni anayeishi kati yenu. 30Kwa maana siku hii upatanisho utafanywa kwa ajili yenu ili kuwatakasa, nanyi mtakuwa safi mbele za BWANA, mkiwa mmeondolewa dhambi zenu zote. 31Ni Sabato ya mapumziko kamili kwenu, siku ya kujinyenyekeza kwa kufunga. Hii ni kanuni ya kudumu milele. 32Upatanisho utafanywa na kuhani aliyepakwa mafuta na kusimikwa kutumika kama kuhani mahali pa baba yake. Atavaa mavazi ya kitani, mavazi matakatifu, 33na kufanya upatanisho kwa ajili ya mahali patakatifu pa utakatifu, kwa ajili ya Hema la Kukutania na kwa ajili ya madhabahu, na pia kwa ajili ya makuhani na kwa ajili ya watu wote wa kusanyiko. 34Hii itakuwa kanuni ya kudumu milele kwenu, kwamba mara moja kwa mwaka upatanisho ufanywe kwa ajili ya Waisraeli kwa ajili ya dhambi zao zote.” Naye Haruni akafanya kama BWANA alivyomwagiza Musa.