Mambo ya Walawi 5

1Mtu akisikia tangazo la hadharani la kuwaita mashahidi lililotolewa kwa laana, naye aliona yaliyotukia au anayajua, lakini hasemi, ametenda dhambi na atabeba hatia yake. 2Au mtu anaweza kugusa bila kujua kitu chochote kilicho najisi, kama mzoga wa mnyama wa porini aliye najisi, wa mnyama wa kufugwa aliye najisi au wa kiumbe kitambaacho kilicho najisi. Amekuwa najisi na ana hatia. 3Au mtu anaweza kugusa unajisi wa binadamu wa aina yoyote ile unaomfanya mtu kuwa najisi, asitambue. Mara anapojua, ana hatia. 4Au mtu anaweza kuapa bila kufikiri kwamba atafanya jambo fulani, baya au jema, kama viapo ambavyo watu huapa kwa haraka, kisha akasahau. Anapotambua, ana hatia katika lolote kati ya mambo haya. 5Mtu aliye na hatia kwa mojawapo ya njia hizi ataungama dhambi aliyoitenda 6na kumletea BWANA anachodaiwa kwa ajili ya dhambi hiyo: mnyama jike kutoka kwa kondoo na mbuzi, mwana-kondoo au mbuzi, kuwa sadaka ya dhambi. Kuhani atamfanyia upatanisho kwa ajili ya dhambi yake. 7Ikiwa hawezi kumudu mwana-kondoo, atamletea BWANA hua wawili au makinda mawili ya njiwa ili kulipia dhambi yake. Mmoja atakuwa sadaka ya dhambi, na mwingine sadaka ya kuteketezwa. 8Kuhani atawapokea na kumtoa kwanza ndege wa sadaka ya dhambi. Atamvunja shingo upande wa mbele, lakini hatakiondoa kichwa. 9Atanyunyiza baadhi ya damu yake upande wa madhabahu, na iliyobaki itakamuliwa kwenye msingi wa madhabahu. Ni sadaka ya dhambi. 10Ndege wa pili atamtoa kuwa sadaka ya kuteketezwa kwa njia iliyoagizwa. Kwa hiyo kuhani atamfanyia upatanisho kwa ajili ya dhambi yake, naye atasamehewa.

11Ikiwa hata hua wawili au makinda mawili ya njiwa ni zaidi ya uwezo wake, yeye aliyetenda dhambi ataleta kama lita 2 ya unga laini kuwa sadaka ya dhambi. Hatatia mafuta wala ubani juu yake, kwa kuwa ni sadaka ya dhambi. 12Unga huo utapelekwa kwa kuhani. Atachukua konzi nzima kutoka humo kuwa sehemu yake ya ukumbusho na kuifukiza juu ya madhabahu, pamoja na sadaka za kuteketezwa kwa moto za BWANA. Ni sadaka ya dhambi. 13Kuhani atamfanyia upatanisho kwa ajili ya dhambi aliyoitenda katika lolote kati ya mambo haya, naye atasamehewa. Unga uliobaki utakuwa wa kuhani, kama ilivyo kwa sadaka ya nafaka.’”

14BWANA alinena na Musa. Akasema, 15“Mtu akimkosea BWANA bila kukusudia kuhusu vitu vyake vitakatifu, atamletea BWANA kondoo dume asiye na kasoro kutoka kundini kuwa sadaka yake ya hatia. Thamani yake itakadiriwa kwa shekeli za fedha, kwa kipimo cha shekeli ya mahali patakatifu. Ni sadaka ya hatia. 16Pia atalipa kikamilifu kile alichozuia isivyo halali katika vitu vitakatifu, akiongeza sehemu ya tano ya thamani yake, na kumpa kuhani. Kwa kondoo dume wa sadaka ya hatia kuhani atamfanyia upatanisho, naye atasamehewa.

17Tuseme mtu ametenda dhambi kwa kuvunja mojawapo ya amri za BWANA, akifanya jambo lisilopaswa kufanywa, bila kujua. Ana hatia hata hivyo na atabeba hatia yake, 18na kumletea kuhani kondoo dume asiye na kasoro kutoka kundini, mwenye thamani iliyowekwa, kuwa sadaka ya hatia. Hivyo kuhani atamfanyia upatanisho kwa ajili ya kosa alilolifanya bila kujua, naye atasamehewa. 19Ni sadaka ya hatia. Kwa hakika amekuwa na hatia mbele za BWANA.”