Mambo ya Walawi 3

1Mtu akitoa sadaka ya amani, akaleta mnyama kutoka kwa kundi la ng’ombe, anaweza kuwa dume au jike, lakini atakuwa asiye na kasoro atakapomleta mbele za BWANA. 2Anayemtoa ataweka mkono wake juu ya kichwa cha mnyama huyo na kumchinja kwenye mlango wa Hema la Kukutania. Kisha wana wa Haruni, makuhani, watairusha damu pande zote za madhabahu. 3Kutoka kwa sadaka ya amani, anayeitoa atamtolea BWANA sadaka ya kuteketezwa kwa moto: shahamu inayofunika viungo vya ndani na shahamu yote iliyo juu yake, 4figo mbili pamoja na shahamu iliyo juu yake karibu na sehemu ya chini ya mgongo, na kipande kirefu cha ini, kitakachoondolewa pamoja na figo. 5Wana wa Haruni watavifukiza viungo hivi juu ya madhabahu, wakiviweka juu ya sadaka ya kuteketezwa iliyo juu ya kuni za moto. Ni sadaka ya kuteketezwa kwa moto, harufu ya kupendeza kwa BWANA.

6Sadaka ya amani kwa BWANA ikiwa ni ya kundi la kondoo na mbuzi, mnyama atakayeletwa anaweza kuwa dume au jike, lakini atakuwa asiye na kasoro. 7Ikiwa sadaka ni mwana-kondoo, anayemtoa atamleta mbele za BWANA. 8Anayemtoa ataweka mkono wake juu ya kichwa chake na kumchinja mbele ya Hema la Kukutania, na wana wa Haruni watairusha damu yake pande zote za madhabahu. 9Kutoka kwa sadaka ya amani, anayeitoa atamtolea BWANA sadaka ya kuteketezwa kwa moto: shahamu yake, yaani mkia mzima mnono, uliokatwa karibu kabisa na uti wa mgongo, shahamu inayofunika viungo vya ndani na shahamu yote iliyo juu yake, 10figo mbili pamoja na shahamu iliyo juu yake karibu na sehemu ya chini ya mgongo, na kipande kirefu cha ini, kitakachoondolewa pamoja na figo. 11Kuhani atavifukiza vyote juu ya madhabahu kuwa chakula, sadaka ya kuteketezwa kwa moto kwa BWANA.

12Ikiwa sadaka ni mbuzi, anayemtoa atamleta mbele za BWANA. 13Anayemtoa ataweka mkono wake juu ya kichwa chake na kumchinja mbele ya Hema la Kukutania, na wana wa Haruni watairusha damu yake pande zote za madhabahu. 14Kutoka kwake, anayemtoa atatoa sadaka yake, sadaka ya kuteketezwa kwa moto kwa BWANA: shahamu inayofunika viungo vya ndani na shahamu yote iliyo juu yake, 15figo mbili pamoja na shahamu iliyo juu yake karibu na sehemu ya chini ya mgongo, na kipande kirefu cha ini, kitakachoondolewa pamoja na figo. 16Kuhani atavifukiza juu ya madhabahu kuwa chakula, sadaka ya kuteketezwa kwa moto na harufu ya kupendeza. Shahamu yote ni mali ya BWANA. 17Msile shahamu yoyote wala damu yoyote. Hii ni kanuni ya kudumu milele kwa vizazi vyenu vyote, popote mtakapoishi.’”