Mambo ya Walawi 8

1BWANA alisema na Musa. Akasema, 2“Mchukue Haruni pamoja na wanawe. Chukua pia mavazi, mafuta ya kupaka, fahali wa sadaka ya dhambi, kondoo dume wawili na kikapu cha mikate isiyotiwa chachu. 3Kisha iite jumuiya yote ikusanyike kwenye mlango wa Hema la Kukutania.” 4Musa alifanya kama BWANA alivyoagiza, na jumuiya ikakusanyika kwenye mlango wa Hema la Kukutania. 5Musa aliiambia jumuiya, “Mtakachokiona kikifanywa sasa ndicho BWANA alichoamuru.” 6Musa aliwaleta Haruni na wanawe mbele, akawaosha kwa maji. 7Alimvika Haruni kanzu na kumfunga mshipi kiunoni. Akamvika joho na kumvika efodi juu yake, kisha akamfunga mkanda wa efodi uliofumwa, na hivyo akaikaza efodi mwilini mwake. 8Juu ya hayo alimvika kifuko cha kifuani, na ndani yake akaweka Urimu na Thumimu. 9Alimvika Haruni kilemba kichwani, na upande wa mbele wa kilemba akafunga bamba la dhahabu, yaani taji takatifu, kama BWANA alivyomwagiza Musa. 10Kisha Musa alichukua mafuta ya kupaka. Akaipaka mafuta maskani na vyote vilivyokuwa ndani yake, akavitakasa. 11Alinyunyiza mafuta kidogo juu ya madhabahu mara saba, akaipaka mafuta madhabahu pamoja na vyombo vyake vyote, na birika pamoja na kiweko chake, ili kuvitakasa. 12Alimimina mafuta kidogo ya kupaka juu ya kichwa cha Haruni, akampaka mafuta ili kumtakasa. 13Kisha Musa aliwaleta wana wa Haruni mbele. Akawavika kanzu, akawafunga mishipi viunoni, na kuwavika kofia vichwani, kama BWANA alivyomwagiza Musa. 14Alimleta fahali wa sadaka ya dhambi, na Haruni na wanawe wakaweka mikono yao juu ya kichwa chake. 15Musa alimchinja, akachukua damu, na kwa kidole chake akaitia kwenye kila pembe ya madhabahu pande zote, akaisafisha madhabahu. Damu iliyobaki akaimwaga chini ya madhabahu. Hivyo akaitakasa, ili kufanya upatanisho kwa ajili yake. 16Alichukua shahamu yote iliyokuwa juu ya viungo vya ndani, kipande kirefu cha ini, na figo mbili pamoja na shahamu yake, na Musa akavifukiza juu ya madhabahu. 17Lakini fahali, pamoja na ngozi yake, nyama yake na mavi yake, akaviteketeza kabisa kwa moto nje ya kambi, kama BWANA alivyomwagiza Musa. 18Kisha alimleta kondoo dume wa sadaka ya kuteketezwa, na Haruni na wanawe wakaweka mikono yao juu ya kichwa chake. 19Musa alimchinja, akairusha damu kwenye madhabahu pande zote. 20Alimkata kondoo dume vipande vipande, na Musa akakifukiza kichwa, vipande na shahamu. 21Aliviosha kwa maji viungo vya ndani na miguu, na Musa akamfukiza kondoo dume mzima juu ya madhabahu. Ilikuwa sadaka ya kuteketezwa yenye harufu ya kupendeza, sadaka ya kuteketezwa kwa moto kwa BWANA, kama BWANA alivyomwagiza Musa. 22Kisha alimleta kondoo dume yule mwingine, kondoo dume wa kusimikwa, na Haruni na wanawe wakaweka mikono yao juu ya kichwa chake. 23Musa alimchinja, akachukua sehemu ya damu yake. Akaitia kwenye ndewe ya sikio la kulia la Haruni, kwenye kidole gumba cha mkono wake wa kulia na kwenye kidole gumba cha mguu wake wa kulia. 24Kisha aliwaleta wana wa Haruni mbele, na Musa akatia sehemu ya damu kwenye ndewe za masikio yao ya kulia, kwenye vidole gumba vya mikono yao ya kulia na kwenye vidole gumba vya miguu yao ya kulia. Kisha Musa akairusha damu kwenye madhabahu pande zote. 25Alichukua shahamu: mkia mnono, shahamu yote iliyokuwa juu ya viungo vya ndani, kipande kirefu cha ini, figo mbili pamoja na shahamu yake, na pia paja la kulia. 26Kutoka katika kikapu cha mikate isiyotiwa chachu kilichokuwa mbele za BWANA, alichukua mkate mmoja usiotiwa chachu, mkate mmoja uliokandwa kwa mafuta na mkate mwembamba mmoja, akaiweka juu ya vipande vya shahamu na juu ya paja la kulia. 27Aliviweka vyote hivyo mikononi mwa Haruni na wanawe, akavitikisa mbele za BWANA kuwa sadaka ya kutikiswa. 28Kisha Musa alivichukua tena kutoka mikononi mwao, akavifukiza juu ya madhabahu juu ya sadaka ya kuteketezwa. Ilikuwa sadaka ya kusimikwa yenye harufu ya kupendeza, sadaka ya kuteketezwa kwa moto kwa BWANA. 29Musa alikichukua kidari, akakitikisa mbele za BWANA kuwa sadaka ya kutikiswa. Hicho kilikuwa fungu la Musa mwenyewe kutoka kwa kondoo dume wa kusimikwa, kama BWANA alivyomwagiza Musa. 30Musa alichukua kiasi cha mafuta ya kupaka na cha damu iliyokuwa juu ya madhabahu, akavinyunyiza juu ya Haruni na mavazi yake, na juu ya wanawe na mavazi yao. Kwa njia hiyo akamtakasa Haruni na mavazi yake, na wanawe pamoja na mavazi yao. 31Musa aliwaambia Haruni na wanawe, “Ichemsheni nyama kwenye mlango wa Hema la Kukutania na kuila hapo, pamoja na mkate ulio katika kikapu cha kusimikwa, kama nilivyoamuru niliposema, ‘Haruni na wanawe ndio watakaoila.’ 32Chochote kitakachobaki cha nyama na mkate, mkiteketeze kabisa kwa moto. 33Kaeni kwenye mlango wa Hema la Kukutania wala msiondoke hapo kwa siku saba, mpaka muda wa kusimikwa kwenu utakapokwisha. Kusimikwa kwenu kutachukua siku saba. 34Yaliyofanyika leo, BWANA ameamuru yafanyike tena, ili kufanya upatanisho kwa ajili yenu. 35Kaeni kwenye mlango wa Hema la Kukutania mchana na usiku kwa siku saba, na mlinde zamu ambayo BWANA amewapa, ili msife. Hivyo ndivyo nilivyoagizwa.” 36Haruni na wanawe walifanya kila kitu ambacho BWANA aliamuru kupitia Musa.