Mambo ya Walawi 10

1Nadabu na Abihu, wana wa Haruni, walichukua kila mmoja chetezo chake. Wakatia moto ndani yake, wakaweka uvumba juu ya moto huo, wakatoa mbele za BWANA moto usioruhusiwa, ambao hakuwa amewaamuru kuuleta. 2Ndipo moto ulitoka mbele za BWANA ukawala kabisa, nao wakafa mbele za BWANA. 3Musa alimwambia Haruni, “Hiki ndicho BWANA alichomaanisha aliposema, ‘Kupitia wale wanaonikaribia nitaonyesha kwamba mimi ni mtakatifu, na machoni pa watu wote nitaonyesha utukufu wangu.’” Haruni hakusema chochote. 4Musa aliwaita Mishaeli na Elsafani, wana wa Uzieli, baba mdogo wa Haruni. Akawaambia, “Njooni mbele, mwaondoe jamaa zenu mbele ya mahali patakatifu, mkawapeleke nje ya kambi.” 5Walisogea mbele, wakawabeba nje ya kambi wakiwa wamevaa kanzu zao wenyewe, kama Musa alivyosema. 6Kisha Musa alimwambia Haruni na wanawe Eleazari na Ithamari, “Msiziache nywele zenu timtimu wala msirarue mavazi yenu kwa kuomboleza, la sivyo mtakufa, naye ataikasirikia jumuiya yote. Jamaa zenu, nyumba yote ya Israeli, wanaweza kuomboleza kwa ajili ya moto ambao BWANA ameuleta. 7Msiondoke mahali penu kwenye mlango wa Hema la Kukutania, la sivyo mtakufa, kwa sababu mnayo mafuta ya kupaka ya BWANA juu yenu.” Wakafanya kama Musa alivyosema.

8BWANA alisema na Haruni. Akasema, 9“Usinywe divai wala pombe, wewe wala wanao pamoja nawe, kila mnapoingia katika Hema la Kukutania, la sivyo mtakufa. Hii ni kanuni ya kudumu milele kwa vizazi vyenu vyote, 10ili mpate kutofautisha kati ya kilicho kitakatifu na kilicho cha kawaida, kati ya kilicho najisi na kilicho safi, 11na ili mpate kuwafundisha Waisraeli kanuni zote ambazo BWANA amewapa kupitia Musa.”

12Musa alimwambia Haruni na wanawe waliobaki, Eleazari na Ithamari, “Chukueni sadaka ya nafaka iliyobaki katika sadaka za kuteketezwa kwa moto za BWANA, mkaile kando ya madhabahu ikiwa haijatiwa chachu, kwa sababu ni takatifu kabisa. 13Ileni mahali patakatifu, kwa sababu ni fungu lililowekwa kwa ajili yako na wanao kutoka katika sadaka za kuteketezwa kwa moto za BWANA. Ndivyo nilivyoamriwa. 14Lakini kidari cha sadaka ya kutikiswa na paja lililotolewa kuwa mchango mnaweza kuvila mahali popote palipo safi kwa taratibu za ibada, wewe na wanao na binti zako pamoja nawe. Umepewa vipande hivyo, wewe na watoto wako, kuwa fungu lenu kutoka katika sadaka za amani za Waisraeli. 15Paja la mchango na kidari cha sadaka ya kutikiswa vitaletwa pamoja na shahamu ya sadaka za kuteketezwa kwa moto, na kutikiswa mbele za BWANA kuwa sadaka ya kutikiswa. Vitakuwa vyako na vya wanao pamoja nawe kuwa fungu lenu la kudumu, kama BWANA alivyoamuru.” 16Musa alichunguza kwa makini habari za beberu wa sadaka ya dhambi, na ikawa kwamba alikuwa ameteketezwa. Akawakasirikia Eleazari na Ithamari, wana wawili wa Haruni waliobaki, akasema, 17“Mbona hamkuila sadaka ya dhambi katika eneo takatifu? Ni takatifu kabisa, naye amewapa ili mbebe hatia ya jumuiya na kuwafanyia upatanisho mbele za BWANA. 18Damu yake haikuletwa ndani ya mahali patakatifu, kwa hiyo hakika mlipaswa kumla beberu huyo katika eneo takatifu, kama nilivyoamuru.” 19Haruni alimjibu Musa, “Tazama, leo hii wametoa sadaka yao ya dhambi na sadaka yao ya kuteketezwa mbele za BWANA, na bado mambo kama haya yamenipata. Kama ningalikula sadaka ya dhambi leo, je, hilo lingalikuwa sawa machoni pa BWANA?” 20Musa aliposikia hayo, aliona ni sawa.