Mambo ya Walawi 27

1BWANA alisema na Musa. Akasema, 2“Sema na Waisraeli, uwaambie, ‘Mtu akiweka nadhiri maalum ya kumtolea BWANA thamani ya mtu, 3thamani ya mwanamume wa miaka ishirini hadi sitini itakuwa shekeli hamsini za fedha, zikipimwa kwa shekeli ya mahali patakatifu. 4Ikiwa ni mwanamke, thamani yake ni shekeli thelathini. 5Kwa mtu wa miaka mitano hadi ishirini, thamani ni shekeli ishirini kwa mtu wa kiume na shekeli kumi kwa mtu wa kike. 6Kwa mtoto wa mwezi mmoja hadi miaka mitano, thamani ni shekeli tano za fedha kwa mtoto wa kiume na shekeli tatu za fedha kwa mtoto wa kike. 7Kwa mtu wa miaka sitini au zaidi, thamani ni shekeli kumi na tano kwa mwanamume na shekeli kumi kwa mwanamke. 8Lakini ikiwa aliyeweka nadhiri ni maskini mno kuweza kulipa thamani hiyo, mtu huyo atalazimika kuletwa mbele ya kuhani, naye kuhani atamkadiria thamani kulingana na kile ambacho aliyeweka nadhiri anaweza kulipa.

9Ikiwa nadhiri ni ya mnyama wa aina inayoweza kutolewa kuwa sadaka kwa BWANA, kila mnyama wa namna hiyo aliyetolewa kwa BWANA anakuwa mtakatifu. 10Mwenye mnyama asimbadilishe wala asiweke mwingine mahali pake, mzuri badala ya duni au duni badala ya mzuri. Akimbadilisha mnyama mmoja kwa mwingine, wote wawili, yule wa kwanza na yule aliyewekwa mahali pake, watakuwa watakatifu. 11Ikiwa nadhiri ni ya mnyama aliye najisi, wa aina isiyoweza kutolewa kuwa sadaka kwa BWANA, mnyama huyo ataletwa mbele ya kuhani, 12naye kuhani atakadiria thamani yake kulingana na kama ni mzuri au duni. Thamani atakayoweka itasimama. 13Mwenye mnyama akitaka kumkomboa, atalipa thamani yake na kuongeza sehemu ya tano. 14Mtu akiitakasa nyumba kuwa takatifu kwa BWANA, kuhani ataamua kama iko katika hali nzuri au duni na kukadiria thamani yake. Thamani atakayoweka kuhani itasimama. 15Ikiwa aliyeitakasa nyumba anataka kuikomboa, atalipa thamani yake kwa fedha na kuongeza sehemu ya tano, nayo itakuwa yake tena. 16Mtu akimtakasia BWANA sehemu ya shamba lililo ardhi ya urithi wa jamaa yake, thamani yake itafuata kiasi cha mbegu kinachohitajika kulipanda: shekeli hamsini za fedha kwa mbegu za shayiri kama lita 220. 17Ikiwa shamba litatakaswa kuanzia mwaka wa Yubile, thamani yote itasimama. 18Lakini shamba likitakaswa baada ya Yubile, kuhani atahesabu bei kwa miaka iliyobaki hadi mwaka wa Yubile unaofuata, na thamani itapunguzwa kwa kadiri hiyo. 19Ikiwa aliyelitakasa shamba atalikomboa, atalipa thamani yake kwa fedha na kuongeza sehemu ya tano, nalo litabaki kuwa lake. 20Lakini asipolikomboa shamba, au ikiwa shamba limeuzwa kwa mtu mwingine, haliwezi kukombolewa tena kamwe. 21Shamba litakapoachiliwa katika Yubile, litakuwa takatifu kwa BWANA, kama shamba lililowekwa wakfu kabisa kwake. Litakuwa mali ya kuhani kama ardhi yake mwenyewe. 22Mtu akimtakasia BWANA shamba alilonunua, ambalo si sehemu ya ardhi ya urithi wa jamaa yake, 23kuhani atahesabu kiasi cha thamani hadi mwaka wa Yubile, na mtu huyo atalipa thamani hiyo siku ileile kuwa zawadi takatifu kwa BWANA. 24Katika mwaka wa Yubile shamba litarudi kwa yule aliyeliuza, ambaye ardhi hiyo ni urithi wa jamaa yake.