Mambo ya Walawi 13

1BWANA alisema na Musa na Haruni. Akasema, 2“Mtu akitokwa na uvimbe, kigaga au doa linalong’aa kwenye ngozi ya mwili wake, nalo likageuka kuwa kitu kinachoweza kuwa kidonda cha ugonjwa mbaya wa ngozi, mtu huyo ataletwa kwa Haruni kuhani au kwa mmoja wa wanawe, makuhani. 3Kuhani atakiangalia kidonda kwa makini. Ikiwa nywele zilizo ndani yake zimekuwa nyeupe, na kinaonekana kuingia ndani zaidi ya uso wa ngozi, ni kidonda cha ugonjwa mbaya wa ngozi. Baada ya kukiona, kuhani atamtangaza mtu huyo kuwa najisi. 4Lakini ikiwa kuna doa jeupe linalong’aa kwenye ngozi ambalo halionekani kuingia chini ya uso wa ngozi, na nywele zake hazijawa nyeupe, kuhani atamtenga mtu huyo kwa siku saba. 5Siku ya saba kuhani atamwangalia mtu huyo tena. Ikiwa kwa maoni yake kidonda hakijabadilika wala hakijaenea katika ngozi, atamtenga kwa siku nyingine saba. 6Siku saba za pili zikiisha, kuhani atamwangalia tena. Ikiwa kidonda kimefifia na hakijaenea katika ngozi, ni kigaga tu, na kuhani atamtangaza mtu huyo kuwa safi. Akishafua nguo zake, atakuwa safi. 7Lakini kigaga kikienea katika ngozi baada ya mtu huyo kujionyesha kwa kuhani na kutangazwa kuwa safi, atakwenda tena kwa kuhani. 8Kuhani akiona kwamba kigaga kimeenea katika ngozi, atamtangaza mtu huyo kuwa najisi: ni ugonjwa mbaya wa ngozi.

9Mtu yeyote mwenye kidonda cha ugonjwa mbaya wa ngozi ataletwa kwa kuhani. 10Kuhani ataangalia. Ikiwa kuna uvimbe mweupe katika ngozi ambao umegeuza nywele kuwa nyeupe, na kuna nyama mbichi katika uvimbe huo, 11ni ugonjwa mbaya wa ngozi uliokaa muda mrefu katika ngozi ya mwili. Kuhani atamtangaza mtu huyo kuwa najisi bila kumtenga, kwa maana hakuna shaka kwamba yeye ni najisi. 12Ugonjwa ukienea katika ngozi yote na kufunika ngozi nzima ya mtu mwenye kidonda, kutoka kichwani hadi miguuni, kila mahali kuhani anapoangalia, 13kuhani ataangalia, na ikiwa ugonjwa umefunika mwili wote, atamtangaza mtu huyo kuwa safi. Mwili wote umekuwa mweupe; yeye ni safi. 14Lakini wakati wowote nyama mbichi itakapoonekana kwake, atakuwa najisi. 15Kuhani ataiangalia nyama mbichi na kumtangaza mtu huyo kuwa najisi. Nyama mbichi ni najisi; ni ugonjwa mbaya wa ngozi. 16Lakini nyama mbichi ikibadilika tena na kuwa nyeupe, mtu huyo atakwenda kwa kuhani. 17Kuhani atamchunguza, na ikiwa kidonda kimekuwa cheupe, atamtangaza mtu mwenye kidonda kuwa safi. Yeye ni safi.

18Mtu akiwa na jipu kwenye ngozi yake, nalo likapona, 19na mahali lilipokuwa jipu ukatokea uvimbe mweupe au doa linalong’aa jeupe lenye wekundu, mtu huyo atamwonyesha kuhani. 20Kuhani ataliangalia. Ikiwa linaonekana kuwa chini zaidi kuliko ngozi inayolizunguka na nywele zake zimekuwa nyeupe, kuhani atamtangaza mtu huyo kuwa najisi. Ni kidonda cha ugonjwa mbaya wa ngozi kilichochipuka mahali lilipokuwa jipu. 21Lakini kuhani asipoona nywele nyeupe ndani yake, nalo halijashuka chini ya ngozi, nalo limefifia, atamtenga mtu huyo kwa siku saba. 22Likienea katika ngozi, kuhani atamtangaza mtu huyo kuwa najisi. Ni kidonda cha ugonjwa huo. 23Doa linalong’aa likibaki pale pale bila kuenea, ni kovu la jipu, na kuhani atamtangaza mtu huyo kuwa safi.

24Au mtu akiwa na jeraha la kuungua kwenye ngozi yake, na sehemu mbichi ya jeraha hilo ikawa doa linalong’aa jeupe lenye wekundu au jeupe, 25kuhani ataliangalia. Ikiwa nywele katika doa linalong’aa zimekuwa nyeupe na doa hilo linaonekana kuingia ndani zaidi ya ngozi, ni ugonjwa mbaya wa ngozi uliochipuka katika jeraha la kuungua. Kuhani atamtangaza mtu huyo kuwa najisi; ni kidonda cha ugonjwa mbaya wa ngozi. 26Lakini kuhani asipoona nywele nyeupe katika doa linalong’aa, nalo halijashuka chini ya ngozi, nalo limefifia, atamtenga mtu huyo kwa siku saba. 27Siku ya saba kuhani atamwangalia. Ikiwa doa limeenea katika ngozi, kuhani atamtangaza mtu huyo kuwa najisi; ni kidonda cha ugonjwa mbaya wa ngozi. 28Lakini doa linalong’aa likibaki pale pale, bila kuenea katika ngozi, nalo limefifia, ni uvimbe wa jeraha la kuungua. Kuhani atamtangaza mtu huyo kuwa safi, kwa sababu ni kovu la jeraha hilo.

29Mwanamume au mwanamke akiwa na kidonda kichwani au katika ndevu, 30kuhani atakichunguza kidonda. Ikiwa kinaonekana kuingia ndani zaidi ya ngozi na kuna nywele za manjano nyembamba ndani yake, kuhani atamtangaza mtu huyo kuwa najisi. Ni choa, ugonjwa mbaya wa ngozi wa kichwa au wa ndevu. 31Lakini kuhani akikichunguza kidonda cha choa na hakionekani kuingia ndani zaidi ya ngozi, na hakuna nywele nyeusi ndani yake, atamtenga mtu mwenye kidonda hicho kwa siku saba. 32Siku ya saba kuhani atakichunguza kidonda. Ikiwa choa haijaenea, wala hazijaota ndani yake nywele za manjano, wala haionekani kuingia ndani zaidi ya ngozi, 33mtu huyo atanyoa, lakini si mahali palipo na choa, na kuhani atamtenga kwa siku nyingine saba. 34Siku ya saba kuhani ataichunguza choa. Ikiwa haijaenea katika ngozi wala haionekani kuingia ndani zaidi ya ngozi, atamtangaza mtu huyo kuwa safi. Atafua nguo zake, naye atakuwa safi. 35Lakini choa ikienea katika ngozi baada ya mtu huyo kutangazwa kuwa safi, 36na kuhani akimchunguza na kuona kwamba imeenea katika ngozi, hana haja ya kutafuta nywele za manjano. Mtu huyo ni najisi. 37Lakini kwa maoni ya kuhani choa ikiwa haijabadilika, na nywele nyeusi zimeota ndani yake, imepona. Mtu huyo ni safi, na kuhani atamtangaza kuwa safi.