Mambo ya Walawi 11

1BWANA alisema na Musa na Haruni. Akawaambia, 2“Semeni na Waisraeli, mwaambie, ‘Kati ya wanyama wote wanaoishi nchi kavu, hawa ndio viumbe mnaoweza kuwala. 3Mnaweza kumla mnyama yeyote anayecheua na mwenye kwato zilizopasuka kabisa kuwa mbili. 4Hata hivyo, msiwale hawa, ingawa wanacheua au wana kwato zilizopasuka: ngamia, kwa sababu anacheua lakini kwato yake haijapasuka. Yeye ni najisi kwenu. 5Pimbi anacheua, lakini kwato yake haijapasuka; ni najisi kwenu. 6Sungura naye anacheua, lakini kwato yake haijapasuka; ni najisi kwenu. 7Nguruwe ana kwato zilizopasuka kabisa kuwa mbili, lakini hacheui; ni najisi kwenu. 8Msile nyama yao yoyote, wala msiwaguse wakiwa wamekufa. Ni najisi kwenu. 9Hivi ndivyo viumbe vya majini mnavyoweza kula: kila kilicho na mapezi na magamba, kiwe kinaishi baharini au mitoni. 10Lakini kila kinachoishi baharini au mitoni bila mapezi na magamba, kiwe ni kati ya viumbe vidogo vinavyojaa majini au kiumbe hai kingine chochote kilichomo, kitakuwa machukizo kwenu. 11Wataendelea kuwa machukizo kwenu. Msile nyama yao, na mizoga yao mtaihesabu kuwa machukizo. 12Kila kinachoishi majini bila mapezi na magamba kitakuwa machukizo kwenu. 13Kati ya ndege, hawa ndio mtakaowachukia. Wasiliwe, kwa sababu ni machukizo: tai, tai mwenye ndevu, tai mweusi, 14mwewe mwekundu, aina mbalimbali za mwewe mweusi, 15kila aina ya kunguru, 16mbuni, bundi wa kelele, shakwe, aina mbalimbali za kozi, 17bundi mdogo, mnandi, bundi mkubwa, 18bundi mweupe, bundi wa jangwani, tai mla mizoga, 19korongo, aina mbalimbali za nyange, hudihudi na popo. 20Kila kiumbe kidogo chenye mabawa ambacho pia hutembea kwa miguu minne kitakuwa machukizo kwenu.

21Lakini mnaweza kula baadhi ya viumbe vidogo vyenye mabawa vinavyotembea kwa miguu minne: vile vyenye jozi ya miguu mirefu juu ya nyayo zao kwa ajili ya kurukaruka ardhini. 22Kati yao mnaweza kula hawa, kila mmoja kwa aina yake: nzige wa makundi, nzige mwenye upara, nyenje na panzi. 23Kila kiumbe kingine kidogo chenye mabawa kinachotembea kwa miguu minne kitakuwa machukizo kwenu. 24Hawa pia watawatia unajisi. Yeyote atakayegusa mzoga wa mmoja wao atakuwa najisi mpaka jioni. 25Yeyote atakayebeba sehemu yoyote ya mizoga yao atafua nguo zake, naye atabaki najisi mpaka jioni. 26Kila mnyama mwenye kwato zisizopasuka kabisa, ambaye pia hacheui, ni najisi kwenu. Yeyote atakayemgusa mmoja wao akiwa amekufa atakuwa najisi. 27Kila mnyama wa miguu minne anayetembea kwa nyayo laini ni najisi kwenu. Yeyote atakayegusa mzoga wa mmoja wao atakuwa najisi mpaka jioni. 28Yeyote atakayebeba mzoga wao atafua nguo zake na atakuwa najisi mpaka jioni. Wanyama hao ni najisi kwenu.

29Kati ya viumbe vidogo vitambaavyo ardhini, hawa ni najisi kwenu: kicheche, panya, aina mbalimbali za mjusi mkubwa, 30mjusi wa nyumbani, kenge, mjusi wa ukutani, guruguru na kinyonga. 31Hawa ndio viumbe vitambaavyo walio najisi kwenu. Mtu yeyote akimgusa mmoja wao akiwa amekufa, atakuwa najisi mpaka jioni.