Mambo ya Walawi 20

1BWANA alisema na Musa. Akasema, 2“Waambie Waisraeli, ‘Mtu yeyote miongoni mwa Waisraeli, au miongoni mwa wageni wanaoishi katika Israeli, atakayemtoa mmoja wa watoto wake kwa Moleki, ili apitishwe motoni, atauawa. Watu wa nchi watampiga kwa mawe. 3Mimi mwenyewe nitaugeuza uso wangu dhidi ya mtu huyo na kumkatilia mbali na watu. Kwa kumtoa mtoto kwa Moleki, amepatia unajisi mahali pangu patakatifu na amelitia unajisi jina langu takatifu. 4Watu wa nchi wakijifanya hawamwoni mtu huyo anapomtoa mmoja wa watoto wake kwa Moleki, na wasimwue, 5basi nitaugeuza uso wangu dhidi ya mtu huyo na jamaa yake, nami nitamkatilia mbali na watu, yeye pamoja na wote wanaomfuata katika kufanya ukahaba kwa kumwabudu Moleki. 6Mtu akiwageukia wanaowaita wafu na wapiga ramli, na hivyo akafanya ukahaba kwa kuwafuata, nitaugeuza uso wangu dhidi ya mtu huyo na kumkatilia mbali na watu. 7Jitakaseni, mkawe watakatifu, kwa sababu mimi ni BWANA Mungu wenu. 8Shikeni kanuni zangu na kuzifuata. Mimi ni BWANA; ninawafanya kuwa watakatifu. 9Mtu yeyote anayemlaani baba au mama yake atauawa. Kwa kuwa amemlaani baba au mama yake, hatia ya kifo chake ni yake mwenyewe. 10Mwanamume akizini na mwanamke aliyeolewa, mke wa Mwisraeli mwenzake, mwanamume huyo na mwanamke huyo waliozini watauawa wote wawili. 11Mwanamume akijamiiana na mke wa baba yake, amemkosea baba yake. Wote wawili watauawa; hatia ya vifo vyao ni yao wenyewe. 12Mwanamume akijamiiana na mkaza mwanawe, wote wawili watauawa. Wamefanya mchanganyiko potovu; hatia ya vifo vyao ni yao wenyewe. 13Mwanamume akilala na mwanamume mwingine kama mtu alalavyo na mwanamke, wote wawili wamefanya jambo la kuchukiza. Watauawa; hatia ya vifo vyao ni yao wenyewe.