Kutoka 2

1Mwanamume mmoja wa ukoo wa Lawi alimwoa mwanamke ambaye pia alikuwa mzao wa Lawi. 2Alipata mimba, akajifungua mtoto wa kiume. Alipoona jinsi mtoto huyo alivyokuwa mzuri, akamficha kwa miezi mitatu. 3Alipokuwa hawezi kumficha tena, alimtengenezea safina ndogo ya mafunjo, akaiziba kwa lami na kalafati. Akamweka mtoto ndani, akaiweka katikati ya matete ukingoni mwa mto Naili. 4Dada yake alisimama mbali kidogo ili ajue yatakayompata. 5Binti Farao alishuka mtoni Naili kuoga, wajakazi wake wakiwa wanatembea ukingoni mwa mto. Alipoiona safina katikati ya matete, akamtuma mjakazi wake aichukue. 6Alipoifungua alimwona mtoto, mtoto mchanga wa kiume, naye alikuwa akilia. Akamwonea huruma. Akasema, “Huyu lazima awe mmoja wa watoto wa Waebrania.” 7Ndipo dada yake akamwuliza binti Farao, “Je, ungependa niende nikutafutie mwanamke Mwebrania anayeweza kumnyonyesha mtoto kwa ajili yako?” 8“Nenda,” binti Farao akamwambia. Basi msichana huyo akaenda, akamleta mama yake mtoto mwenyewe. 9Binti Farao akamwambia, “Mchukue mtoto huyu, umnyonyeshe kwa ajili yangu. Nitakulipa kwa kazi hiyo.” Basi mwanamke huyo akamchukua mtoto, akamnyonyesha. 10Mtoto alipokuwa mkubwa, mama yake alimpeleka kwa binti Farao, naye akawa mwanawe. Akamwita jina Musa, akisema, “Kwa sababu nilimtoa majini.” 11Miaka mingi baadaye, Musa alipokuwa mtu mzima, alitoka akaenda kwa watu wa kwao, akaona kwa macho yake kazi zao ngumu. Akamwona Mmisri akimpiga Mwebrania, mmoja wa ndugu zake mwenyewe. 12Alitazama pande zote, na alipoona hakuna mtu, akamwua yule Mmisri, akamfukia mchangani. 13Siku iliyofuata alitoka tena, akakuta Waebrania wawili wakipigana. Akamwambia yule aliyekuwa na hatia, “Kwa nini unampiga jirani yako?” 14Mtu huyo akajibu, “Ni nani aliyekufanya kuwa kiongozi na mwamuzi wetu? Je, unakusudia kuniua kama ulivyomwua yule Mmisri?” Ndipo Musa akaogopa. Akawaza, “Kumbe jambo nililofanya limejulikana.” 15Farao aliposikia habari hiyo, alitafuta kumwua Musa. Lakini Musa alikimbia akamwepuka Farao, akaenda kuishi katika nchi ya Midiani. Huko akaketi kando ya kisima. 16Kuhani wa Midiani alikuwa na binti saba. Walikuja kuchota maji na kujaza mabirika ili kulinywesha kundi la baba yao. 17Lakini wachungaji fulani walikuja, wakawafukuza. Musa akasimama, akawatetea, kisha akalinywesha kundi lao. 18Wasichana walipofika nyumbani kwa Reueli baba yao, akawauliza, “Imekuwaje mmerudi mapema hivi leo?” 19“Mmisri mmoja alitutetea dhidi ya wachungaji,” wakajibu. “Hata alituchotea maji yeye mwenyewe, akalinywesha kundi.” 20Akawaambia binti zake, “Basi yuko wapi? Kwa nini mmemwacha mtu huyo nyuma? Nendeni mkamkaribishe aje kula pamoja nasi.” 21Musa alikubali kuishi na mtu huyo, naye akamwoza Musa binti yake Sipora. 22Akajifungua mtoto wa kiume, naye Musa akamwita Gershomu. Akasema, “Nimeishi kama mgeni katika nchi isiyo yangu.”

23Muda mrefu ukapita, naye mfalme wa Misri akafa. Waisraeli waliugua chini ya utumwa wao, wakalia, na kilio chao cha kuomba msaada kikapanda hadi kwa Mungu kutoka katika utumwa wao. 24Mungu alisikia jinsi walivyougua, naye Mungu akalikumbuka agano lake na Abrahamu, Isaka na Yakobo. 25Mungu aliwatazama Waisraeli, naye Mungu akatambua hali yao.