Kutoka 35

1Musa aliikusanya jumuiya yote ya Waisraeli, akawaambia, “Haya ndiyo mambo ambayo BWANA amewaagiza mfanye: 2Kuna siku sita za kufanya kazi, lakini siku ya saba itakuwa takatifu kwenu, Sabato ya pumziko kamili kwa ajili ya BWANA. Mtu yeyote atakayefanya kazi siku hiyo atauawa. 3Siku ya Sabato moto usiwashwe mahali popote mnapoishi.”

4Kisha Musa akaiambia jumuiya yote ya Waisraeli, “Hiki ndicho BWANA alichoagiza: 5Tengeni kati yenu mchango kwa ajili ya BWANA. Kila mtu ambaye moyo wake unamvuta kutoa na aulete kama mchango wa BWANA: dhahabu, fedha na shaba; 6uzi wa samawati, wa zambarau na wa rangi nyekundu, kitani safi, manyoya ya mbuzi, 7ngozi za kondoo dume zilizotiwa rangi nyekundu, ngozi bora, mbao za mshita, 8mafuta ya taa, viungo vya mafuta ya kupaka na vya uvumba wenye harufu nzuri, 9na vito vya onikisi na vito vingine vya kupachikwa kwenye efodi na kifuko cha kifuani. 10Kila mmoja wenu mwenye moyo wa hekima atakuja na kufanya yote ambayo BWANA ameagiza: 11maskani pamoja na hema lake na kifuniko chake, vifungo vyake, fremu, mataruma, nguzo na misingi yake; 12sanduku pamoja na mipiko yake, kiti cha rehema, na pazia la ndani linalolisitiri; 13meza pamoja na mipiko yake na vyombo vyake vyote, na mkate wa Uwepo; 14kinara cha taa kwa ajili ya nuru pamoja na vyombo vyake na taa zake, na mafuta kwa ajili ya nuru; 15madhabahu ya uvumba pamoja na mipiko yake, mafuta ya kupaka na uvumba wenye harufu nzuri, na pazia la mlango wa kuingilia maskani; 16madhabahu ya sadaka ya kuteketezwa pamoja na wavu wake wa shaba, mipiko yake na vyombo vyake vyote; birika pamoja na kiweko chake; 17mapazia ya ua pamoja na nguzo zake na misingi yake, na pazia la lango la ua; 18vigingi vya maskani na vya ua, pamoja na kamba zao; 19mavazi yaliyofumwa kwa ustadi kwa ajili ya huduma katika mahali patakatifu, yaani mavazi matakatifu ya kuhani Haruni na mavazi ya wanawe wanapotumika kama makuhani.” 20Kisha jumuiya yote ya Waisraeli ikaondoka mbele ya Musa. 21Kisha kila mtu ambaye moyo wake ulimchochea, na kila mtu ambaye roho yake ilimvuta kutoa, akaja na mchango kwa ajili ya BWANA, utumike katika kujenga Hema la Kukutania, katika huduma yote ya humo, na katika kushona mavazi matakatifu. 22Walikuja, wanaume pamoja na wanawake, wote wenye mioyo iliyo radhi, wakaleta vibanio, hereni, pete za muhuri na vidani, kila aina ya kitu cha dhahabu. Kila mtu aliyemtolea BWANA dhahabu kama sadaka ya kutikiswa aliileta. 23Na watu walileta chochote walichokuwa nacho cha uzi wa samawati, wa zambarau na wa rangi nyekundu, kitani safi, manyoya ya mbuzi, ngozi za kondoo dume zilizotiwa rangi nyekundu na ngozi bora. 24Wale waliotenga fedha au shaba waliileta kama mchango kwa ajili ya BWANA. Watu waliokuwa na mbao za mshita zinazofaa kwa kazi yoyote nao wakazileta. 25Wanawake wote wenye moyo wa hekima walisokota kwa mikono, wakaleta uzi wa samawati, wa zambarau na wa rangi nyekundu na kitani safi walichokuwa wamesokota. 26Wanawake wote ambao mioyo yao iliwachochea kutumia ustadi wao walisokota manyoya ya mbuzi. 27Viongozi walileta vito vya onikisi na vito vingine vya kupachikwa kwenye efodi na kifuko cha kifuani, 28na viungo na mafuta kwa ajili ya taa, kwa ajili ya mafuta ya kupaka na kwa ajili ya uvumba wenye harufu nzuri. 29Waisraeli, kila mwanamume na kila mwanamke ambaye moyo wake ulimvuta kutoa kwa ajili ya kazi yoyote ambayo BWANA aliagiza kupitia Musa, walimletea BWANA sadaka ya hiari.

30Kisha Musa akawaambia Waisraeli, “Angalieni: BWANA amemchagua kwa jina Bezaleli mwana wa Uri, mwana wa Huri, wa kabila la Yuda, 31naye amemjaza Roho wa Mungu, ili awe na hekima, ufahamu na maarifa katika kila aina ya kazi, 32kubuni michoro ya kisanii na kuitekeleza kwa dhahabu, fedha na shaba, 33kuchonga vito vya kupachikwa, kuchonga mbao, na kufanya kila aina ya kazi ya sanaa. 34Pia amewapa Bezaleli na Oholiabu mwana wa Ahisamaki, wa kabila la Dani, uwezo wa kufundisha. 35Amewajaza hekima ya moyo ili watekeleze kila kazi ya mchongaji, ya fundi stadi, ya mtarizi kwa uzi wa samawati, wa zambarau na wa rangi nyekundu na kitani safi, na ya mfumaji. Wanaweza kufanya kila aina ya kazi na kubuni michoro ya kisanii.