Kutoka 30

1Utengeneze madhabahu ya kufukizia uvumba; uitengeneze kwa mbao za mshita. 2Iwe mraba, yenye urefu wa karibu sentimita 45 kila upande na kimo cha karibu sentimita 90, na pembe zake ziwe kipande kimoja nayo. 3Uifunike kwa dhahabu safi: sehemu ya juu, pande zake zote na pembe zake. Kisha uitie ukingo wa dhahabu kuizunguka. 4Uifanyie pete mbili za dhahabu chini ya ukingo wake, kwenye pande zake mbili zinazoelekeana, ziwe vishikio vya mipiko ya kuibebea. 5Utengeneze mipiko kwa mbao za mshita na uifunike kwa dhahabu. 6Uiweke mbele ya pazia linaloning’inia mbele ya sanduku la Ushuhuda, mbele ya kiti cha rehema kinachofunika Ushuhuda, mahali nitakapokutana nawe. 7Kila asubuhi, anapozipanga taa, Haruni afukize juu yake uvumba wenye harufu nzuri. 8Na anapowasha taa wakati wa machweo, aufukize tena. Huo utakuwa uvumba wa kawaida unaotolewa mbele za BWANA, kizazi hadi kizazi. 9Kamwe msifukize juu yake uvumba usioruhusiwa. Si kwa ajili ya sadaka za kuteketezwa wala sadaka za nafaka, wala sadaka ya kinywaji isimiminwe juu yake. 10Haruni afanye upatanisho juu ya pembe zake mara moja kila mwaka, akitumia damu ya sadaka ya dhambi ya upatanisho. Mara moja kila mwaka, kizazi hadi kizazi, upatanisho ufanywe kwa ajili yake. Ni takatifu kabisa kwa BWANA.”

11BWANA akamwambia Musa, 12“Kila mara utakapofanya hesabu ya Waisraeli na kuwaandikisha, kila mwanamume ampe BWANA fidia ya maisha yake anapoandikishwa. Kwa njia hiyo hakuna pigo litakalowapata wakati wa kuhesabiwa. 13Kila mmoja anayevuka kujiunga na waliokwisha kuhesabiwa atoe hiki: karibu gramu 5.7 za fedha, iliyopimwa kwa shekeli ya mahali patakatifu, yenye gera ishirini. Fedha hii ni mchango kwa BWANA. 14Wote wanaovuka kwenda kwa waliohesabiwa, wenye umri wa miaka ishirini na zaidi, watoe mchango huu kwa BWANA. 15Mnapoleta mchango kwa BWANA ili kufanya upatanisho kwa ajili ya maisha yenu, tajiri asitoe zaidi ya gramu hizo 5.7, wala maskini asitoe pungufu. 16Ukusanye fedha za upatanisho kutoka kwa Waisraeli na uzitumie kwa kazi ya Hema la Kukutania. Zitakuwa ukumbusho mbele za BWANA kwa ajili ya Waisraeli, zikifanya upatanisho kwa ajili ya maisha yenu.”

17BWANA akamwambia Musa, 18“Utengeneze birika la shaba juu ya kiweko cha shaba, litumike kwa kunawa. Uliweke kati ya Hema la Kukutania na madhabahu, na ulijaze maji. 19Haruni na wanawe wajioshe mikono na miguu yao kwa maji yake. 20Kila wanapoingia ndani ya Hema la Kukutania, wajioshe kwa maji, ili wasife. Vivyo hivyo wanapokaribia madhabahu ili kuhudumu kwa kuteketeza sadaka ya kuteketezwa kwa moto kwa BWANA: 21wajioshe mikono na miguu yao, ili wasife. Hii ni kanuni ya kudumu milele kwa Haruni na wazao wake, kizazi hadi kizazi.”

22BWANA akamwambia Musa, 23“Ujitwalie viungo vilivyo bora kuliko vyote: karibu kilo 5.75 za manemane inayotiririka yenyewe; nusu ya kiasi hicho, karibu kilo 2.9, za mdalasini wenye harufu nzuri; karibu kilo 2.9 za matete yenye harufu nzuri; 24na karibu kilo 5.75 za kasia, vyote vikipimwa kwa shekeli ya mahali patakatifu; na mafuta ya zeituni karibu lita 3.7. 25Kwa viungo hivyo utengeneze mafuta matakatifu ya kupaka, yaliyochanganywa kwa ustadi wa mtengenezaji wa manukato. Yatakuwa mafuta matakatifu ya kupaka. 26Uyatumie kupaka Hema la Kukutania, sanduku la Ushuhuda, 27meza na vyombo vyake vyote, kinara cha taa na vyombo vyake, madhabahu ya uvumba, 28madhabahu ya sadaka ya kuteketezwa na vyombo vyake vyote, pamoja na birika na kiweko chake. 29Kwa njia hiyo uvitakase, navyo vitakuwa vitakatifu kabisa. Chochote kitakachovigusa kitakuwa kitakatifu. 30Uwapake mafuta Haruni na wanawe, na uwatakase ili wanitumikie kama makuhani. 31Uwaambie Waisraeli, ‘Haya yatakuwa mafuta yangu matakatifu ya kupaka, kizazi hadi kizazi. 32Yasimiminwe juu ya mwili wa mtu wa kawaida, wala msitengeneze mafuta mengine kama hayo kwa mchanganyiko uleule. Ni matakatifu, nanyi myahesabu kuwa matakatifu. 33Yeyote atakayechanganya mafuta kama hayo, au kumpaka mtu asiye kuhani, atakatiliwa mbali na watu wake.’”

34BWANA akamwambia Musa, “Ujitwalie manukato yenye harufu nzuri, natafu, shehelethi na helbena, manukato pamoja na ubani safi, kila kimoja kwa uzito sawa. 35Uyachanganye kuwa uvumba kwa ustadi wa mtengenezaji wa manukato, uliokolezwa kwa chumvi, safi na mtakatifu. 36Usage baadhi yake uwe unga laini na uweke kiasi mbele ya Ushuhuda ndani ya Hema la Kukutania, mahali nitakapokutana nawe. Mtauhesabu kuwa mtakatifu kabisa. 37Kuhusu uvumba utakaoutengeneza, kamwe msijitengenezee mwingine kwa mchanganyiko uleule. Uuhesabu kuwa mtakatifu, wa BWANA. 38Yeyote atakayetengeneza uvumba kama huo ili kufurahia harufu yake atakatiliwa mbali na watu wake.”