Kutoka 16

1Baada ya kuondoka Elimu, jumuiya yote ya Waisraeli ilifika katika jangwa la Sini, kati ya Elimu na Sinai. Ilikuwa siku ya kumi na tano ya mwezi wa pili tangu walipotoka katika nchi ya Misri. 2Huko jangwani jumuiya yote ya Waisraeli iliwanung’unikia Musa na Haruni. 3Waisraeli waliwaambia, “Afadhali tungalikufa kwa mkono wa BWANA katika nchi ya Misri! Huko tuliketi kando ya vyungu vya nyama, tukala mkate kadiri tulivyotaka. Lakini ninyi wawili mmetuleta katika jangwa hili ili kusanyiko hili lote life kwa njaa.”

4BWANA alimwambia Musa, “Nitawanyeshea mkate kutoka mbinguni. Kila siku watu watatoka kwenda kuokota kiasi kinachohitajika kwa siku hiyo. Kwa njia hii nitawajaribu, nione kama wataishi kwa kufuata sheria yangu au la. 5Siku ya sita watakapotayarisha kile walicholeta, kitakuwa maradufu ya kiasi wanachookota kila siku.”

6Musa na Haruni waliwaambia Waisraeli wote, “Jioni hii mtatambua kwamba ni BWANA aliyewatoa katika nchi ya Misri, 7na asubuhi mtauona utukufu wa BWANA. Kwa maana yeye amesikia manung’uniko mliyoyaelekeza kwa BWANA. Nasi tu nani? Kwa nini mnatunung’unikia?” 8Musa aliendelea kusema, “Mtaliona hili BWANA atakapowapa nyama mle jioni, na mkate asubuhi hadi mshibe, kwa sababu BWANA amesikia manung’uniko mnayoyaelekeza kwake. Sisi tu nani? Hamtunung’unikii sisi hata kidogo, bali mnamnung’unikia BWANA.” 9Musa alimwambia Haruni aiambie jumuiya yote ya Waisraeli wakaribie na kusimama mbele za BWANA, kwa sababu yeye alikuwa amesikia manung’uniko yao. 10Haruni alipokuwa bado akizungumza na jumuiya yote ya Waisraeli, waligeuka kuelekea jangwa, na ghafla utukufu wa BWANA ukaonekana katika wingu.

11Kisha BWANA alimwambia Musa, 12“Manung’uniko ya Waisraeli yamefika masikioni mwangu. Waambie hivi: ‘Jioni ikiingia mtakula nyama, na asubuhi mtashiba mkate. Ndipo mtakapojua kwamba mimi ndimi BWANA Mungu wenu.’” 13Jioni ile kware waliruka wakaja, wakaifunika kambi, na kufikia asubuhi umande ulikuwa umetanda pande zote za kambi. 14Umande ulipoondoka, uso wa jangwa ulikuwa umefunikwa na vitu vyembamba kama magamba, vyembamba kama jalidi juu ya ardhi. 15“Hiki ni nini?” Waisraeli waliulizana walipokiona, kwa kuwa hawakujua kilikuwa nini. Musa akawajibu, “Huu ni mkate, ambao BWANA amewapa kuwa chakula chenu. 16Hivi ndivyo BWANA alivyoamuru: ‘Kila mmoja wenu aokote kiasi anachohitaji kula, kama lita 2 kwa kila mtu. Mkuu wa kila jamaa atawaokotea wote wanaoishi katika hema lake.’” 17Waisraeli walifanya hivyo. Baadhi yao waliokota kingi, na wengine kidogo tu. 18Hata hivyo walipokipima kwa kipimo cha lita 2, aliyeokota kingi hakuwa na kitu cha ziada, wala aliyeokota kidogo hakupungukiwa. Kila mmoja alikuwa ameokota kiasi alichoweza kula. 19Musa aliwaambia, “Mtu yeyote kati yenu asibakize chochote hadi asubuhi inayofuata.” 20Lakini hawakutaka kumsikiliza Musa. Watu wengine walibakiza sehemu yake hadi asubuhi, nacho kikajaa funza na kutoa harufu mbaya. Jambo hilo likamkasirisha Musa juu yao. 21Basi kila asubuhi walikiokota, kila mmoja kiasi alichoweza kula, na joto la jua lilipokuja, kilichobaki kiliyeyuka. 22Siku ya sita waliokota mkate maradufu, kama lita 4 kwa kila mtu. Viongozi wote wa jumuiya wakaja wakamweleza Musa jambo hilo. 23Aliwaambia, “Hivi ndivyo BWANA alivyosema: ‘Kesho ni pumziko la Sabato, Sabato takatifu kwa BWANA.’ Basi leo okeni chochote mnachotaka kuoka na chemsheni chochote mnachotaka kuchemsha. Kinachobaki chote kiwekeni kando mkihifadhi mpaka asubuhi.” 24Walikiweka kando mpaka asubuhi, kama Musa alivyoagiza. Hakikuanza kunuka, wala buu hawakutokea ndani yake. 25Musa alisema, “Leo kuleni hiki. Leo ni Sabato kwa BWANA; leo hamtakiona huko nje kondeni. 26Kwa siku sita mtakiokota. Lakini siku ya saba ni Sabato, na siku hiyo hakutakuwa na chochote cha kuokota.” 27Hata hivyo, siku ya saba ilipofika, baadhi ya watu walitoka kwenda kukiokota, lakini hawakupata chochote.

28BWANA alimwambia Musa, “Ninyi watu mtaendelea mpaka lini kukataa kuzishika amri zangu na sheria zangu? 29Fahamuni jambo hili: BWANA amewapa Sabato. Ndiyo sababu siku ya sita yeye huwapatia mkate wa siku mbili. Siku ya saba kila mmoja wenu akae alipo; mtu yeyote asiondoke nyumbani.” 30Basi siku ya saba watu walipumzika. 31Watu wa Israeli walikiita mana. Kilikuwa kama mbegu za giligilani, lakini cheupe, na ladha yake ilikuwa kama ya mikate myembamba ya asali. 32Musa alisema, “Hivi ndivyo BWANA alivyoamuru: ‘Wekeni lita 2 kamili ya mana ihifadhiwe kwa ajili ya wazao wenu, kizazi baada ya kizazi. Ndipo wataweza kuuona mkate niliowapa mle jangwani baada ya kuwatoa Misri.’” 33Musa alimwambia Haruni, “Chukua gudulia, utie ndani yake lita 2 kamili ya mana. Kisha uliweke mbele za BWANA, lihifadhiwe kwa ajili ya vizazi vyenu vyote vijavyo.” 34Haruni aliliweka mbele ya Ushuhuda ili lihifadhiwe, kama BWANA alivyomwagiza Musa. 35Kwa miaka arobaini Waisraeli walikula mana, mpaka walipofika katika nchi iliyokaliwa na watu. Waliendelea kula mana mpaka walipofika mpakani mwa nchi ya Kanaani. 36(Omeri moja ni kama lita 2, yaani sehemu ya kumi ya efa.)