Kutoka 32

1Watu walipoona kwamba Musa amekaa muda mrefu bila kushuka kutoka mlimani, walimsonga Haruni pande zote, wakamwambia, “Amka, utufanyie miungu ya kutuongoza njiani. Huyu Musa, mtu aliyetupandisha kutoka nchi ya Misri, hatujui amekuwaje.” 2Haruni akawaambia, “Ondoeni pete za dhahabu masikioni mwa wake zenu, na wa wana wenu na binti zenu, mziletee hapa kwangu.” 3Basi watu wote wakajivua pete za dhahabu masikioni mwao, wakamletea Haruni. 4Akaipokea dhahabu kutoka kwao, akaiunda kwa kifaa cha kuchongea, akaifanya kuwa ndama wa chuma kilichoyeyushwa. Kisha wakasema, “Ee Israeli, hawa ndio miungu yako waliokupandisha kutoka nchi ya Misri!” 5Haruni alipoona hayo, akajenga madhabahu mbele ya ndama, akatangaza, “Kesho tutafanya sikukuu kwa BWANA.” 6Kesho yake waliamka mapema, wakatoa sadaka za kuteketezwa na kuleta sadaka za amani. Kisha watu wakaketi kula na kunywa, wakainuka kufanya sherehe za ufisadi.

7Kisha BWANA akamwambia Musa, “Shuka sasa hivi! Watu wako, uliowapandisha kutoka nchi ya Misri, wamejiharibu. 8Upesi mno wameiacha njia niliyowawekea! Wamejitengenezea ndama wa chuma kilichoyeyushwa, wakamsujudia, wakamtolea dhabihu, na kutangaza, ‘Ee Israeli, hawa ndio miungu yako waliokupandisha kutoka nchi ya Misri!’” 9BWANA akaendelea kumwambia Musa, “Nimeona jinsi watu hawa walivyo. Ni watu wenye shingo ngumu. 10Basi sasa niache, ili ghadhabu yangu iwawakie, niwakomeshe kabisa. Kisha nitakufanya wewe kuwa taifa kubwa.” 11Lakini Musa akatafuta kibali cha BWANA Mungu wake, akasema, “Ee BWANA, kwa nini hasira yako iwawakie watu wako mwenyewe? Wewe ndiye uliyewatoa katika nchi ya Misri kwa uweza mkuu na mkono wenye nguvu. 12Kwa nini Wamisri waseme, ‘Aliwatoa ili awadhuru, awaue katikati ya milima na kuwafuta kutoka uso wa dunia’? Acha hasira yako kali, ughairi madhara uliyokusudia kuwaletea watu wako. 13Wakumbuke Abrahamu, Isaka na Israeli, waliokutumikia. Uliwaapia kwa nafsi yako na kuwaambia, ‘Nitawafanya wazao wenu kuwa wengi kama nyota za angani. Nchi hii yote niliyoitaja nitawapa wazao wenu, nayo itakuwa mali yao siku zote.’” 14Naye BWANA akaghairi madhara aliyokuwa amesema atawaletea watu wake.

15Kisha Musa akageuka, akashuka kutoka mlimani akiwa ameshika vibao viwili vya Ushuhuda. Vibao hivyo vilikuwa vimeandikwa pande zote mbili, mbele na nyuma. 16Mungu mwenyewe ndiye aliyevitengeneza vibao hivyo, na maandishi yaliyochongwa juu yake yalikuwa mwandiko wa Mungu. 17Yoshua aliposikia sauti ya watu wakipiga kelele, akamwambia Musa, “Nasikia sauti ya vita kambini!” 18Lakini Musa akajibu, “Si kelele za watu walioshinda, wala si vilio vya watu walioshindwa. Ninachosikia ni sauti ya kuimba.” 19Musa alipoikaribia kambi, akamwona ndama, akawaona watu wakicheza. Akawaka hasira, akavitupa chini vibao alivyokuwa ameshika, akavivunjavunja chini ya mlima. 20Akamchukua yule ndama waliyemtengeneza, akamchoma motoni, akamponda mpaka akawa vumbi laini. Kisha akalinyunyiza vumbi hilo juu ya maji, akawanywesha Waisraeli. 21Musa akamwuliza Haruni, “Watu hawa walikuwa wamekutendea nini, hata ukawatia katika dhambi kubwa namna hii?” 22Haruni akajibu, “Bwana wangu, usikasirike hivyo. Wewe mwenyewe unawajua watu hawa, jinsi walivyoelekea kutenda maovu. 23Waliniambia, ‘Utufanyie miungu ya kutuongoza njiani. Huyu Musa, mtu aliyetupandisha kutoka nchi ya Misri, hatujui amekuwaje.’ 24Basi nikawaambia, ‘Yeyote mwenye dhahabu, aivue.’ Wakanipa, nikaitupa motoni, na tazama, akatoka ndama huyu!” 25Musa aliona kwamba watu walikuwa wamevunja kila kizuizi. Haruni alikuwa amewaacha wafanye walivyotaka, hata wakawa kitu cha kudharauliwa na adui zao. 26Musa akasimama langoni pa kambi, akaita, “Ni nani aliye upande wa BWANA? Na aje hapa kwangu!” Walawi wote wakakusanyika kumzunguka. 27Akawaambia, “BWANA, Mungu wa Israeli, anasema hivi: ‘Kila mmoja wenu ajifunge upanga wake kiunoni. Piteni katika kambi kutoka lango moja hadi jingine, na kurudi. Kila mmoja amuue ndugu yake, rafiki yake na jirani yake.’” 28Walawi wakafanya kama Musa alivyoagiza, na siku hiyo wakauawa watu wapatao 3,000. 29Musa akasema, “Leo mmejiweka wakfu kwa utumishi wa BWANA, kwa sababu kila mmoja wenu alisimama dhidi ya mwanawe na ndugu yake. Kwa hiyo leo mmepewa baraka.” 30Kesho yake Musa akawaambia watu, “Mliyoyafanya ni dhambi kubwa mno. Lakini nitapanda tena kwa BWANA. Huenda nikaweza kufanya upatanisho kwa ajili ya dhambi yenu.” 31Basi Musa akarudi kwa BWANA, akasema, “Tafadhali unisikie! Watu hawa wametenda dhambi kubwa mno: wamejifanyia miungu ya dhahabu. 32Lakini sasa, laiti ungewasamehe dhambi yao! La sivyo, nifute katika kitabu chako ulichokiandika.” 33BWANA akamjibu Musa, “Aliyenitenda dhambi ndiye nitakayemfuta katika kitabu changu. 34Basi sasa nenda, uwaongoze watu mpaka mahali nilipokuambia. Malaika wangu atakutangulia. Lakini siku itakapofika ya kuwadai hesabu, nitawadai hesabu ya dhambi yao.” 35Kisha BWANA akawaletea watu pigo, kwa sababu ya kumfanya ndama, yule ndama aliyetengenezwa na Haruni.