Kutoka 28

1Sasa mlete ndugu yako Haruni karibu nawe, pamoja na wanawe, kutoka miongoni mwa Waisraeli, ili wanitumikie kama makuhani: Haruni na wanawe Nadabu, Abihu, Eleazari na Ithamari. 2Umshonee ndugu yako Haruni mavazi matakatifu, ili yampe utukufu na uzuri. 3Sema na wote wenye moyo wa hekima, ambao nimewajaza roho ya hekima, wamfanyie Haruni mavazi ya kumtakasa, ili anitumikie kama kuhani. 4Mavazi watakayoshona ni haya: kifuko cha kifuani, efodi, joho, kanzu iliyofumwa kwa miraba, kilemba na mshipi. Watamshonea ndugu yako Haruni na wanawe mavazi matakatifu, ili wanitumikie kama makuhani. 5Mafundi watachukua dhahabu, uzi wa samawati, wa zambarau na wa rangi nyekundu, na kitani safi.

6Watafanya efodi kwa dhahabu, kwa uzi wa samawati, wa zambarau na wa rangi nyekundu, na kwa kitani safi iliyosokotwa, kazi ya mbunifu stadi. 7Vipande viwili vya mabegani viungwe kwenye ncha zake mbili, ili efodi ishikamane pamoja. 8Ukanda uliofumwa wa kuifunga, unaoizunguka, ufanywe kwa namna ileile na uwe kipande kimoja nayo, kwa dhahabu, uzi wa samawati, wa zambarau na wa rangi nyekundu, na kitani safi iliyosokotwa. 9Uchukue vito viwili vya onikisi, uchore juu yake majina ya wana wa Israeli, 10majina yao sita kwenye kito cha kwanza na majina mengine sita kwenye kito cha pili, kwa mpangilio wa kuzaliwa kwao. 11Uchore majina ya wana wa Israeli kwenye vito hivyo viwili kwa ustadi wa mchoraji wa mawe anayechora muhuri. Uvitie vito hivyo katika vikalio vya dhahabu iliyosokotwa. 12Uweke vito hivyo viwili juu ya vipande vya mabegani vya efodi kama vito vya ukumbusho kwa ajili ya wana wa Israeli. Haruni atayabeba majina yao mbele za BWANA juu ya mabega yake mawili, ili wakumbukwe.

13Ufanye vikalio vya dhahabu iliyosokotwa, 14na mikufu miwili ya dhahabu safi, iliyosokotwa kama kamba inavyosokotwa, uifunge mikufu hiyo iliyosokotwa kwenye vikalio.

15Ufanye kifuko cha kifuani cha hukumu, kazi ya mbunifu stadi. Ukifanye kwa namna ileile kama efodi, kwa dhahabu, kwa uzi wa samawati, wa zambarau na wa rangi nyekundu, na kwa kitani safi iliyosokotwa. 16Kiwe cha mraba na kukunjwa mara mbili, chenye urefu wa karibu sentimita 23 na upana wa karibu sentimita 23. 17Ukijaze kwa vito vilivyopachikwa katika safu nne. Katika safu ya kwanza kuwe na akiki, topazi na berili; 18katika safu ya pili, feruzi, yakuti samawi na zumaridi; 19katika safu ya tatu, hiasinti, ageti na amethisto; 20na katika safu ya nne, krisolito, onikisi na yaspi. Vipachikwe katika vikalio vya dhahabu. 21Vito hivyo vitabeba majina ya wana wa Israeli, vito kumi na viwili kwa majina yao kumi na mawili. Uchore kila kimoja kama muhuri, kwa jina lake, kwa ajili ya makabila kumi na mawili. 22Ukifanyie kifuko cha kifuani mikufu ya dhahabu safi, iliyosokotwa kama kamba. 23Ukifanyie kifuko cha kifuani pete mbili za dhahabu, uziweke pete hizo mbili kwenye pembe zake mbili. 24Uzifunge kamba mbili za dhahabu kwenye pete mbili zilizo pembeni mwa kifuko cha kifuani. 25Uzifunge ncha nyingine mbili za kamba hizo mbili kwenye vikalio viwili, na hivyo uziunganishe na vipande vya mabegani vya efodi upande wa mbele. 26Ufanye pia pete mbili za dhahabu, uziweke kwenye ncha mbili za chini za kifuko cha kifuani, kwenye ukingo unaogusa efodi, upande wa ndani. 27Ufanye pete nyingine mbili za dhahabu. Uziweke kwenye vipande viwili vya mabegani vya efodi, kuelekea chini upande wake wa mbele, karibu na mahali inapounganishwa, juu ya ukanda uliofumwa wa efodi. 28Ukifunge kifuko cha kifuani kwa pete zake kwenye pete za efodi kwa kamba ya samawati, ili kikae juu ya ukanda uliofumwa wa efodi na kisitengane nayo. 29Hivyo Haruni atayabeba majina ya wana wa Israeli katika kifuko cha kifuani cha hukumu juu ya moyo wake kila anapoingia mahali patakatifu, ili wakumbukwe mbele za BWANA wakati wote. 30Uweke Urimu na Thumimu ndani ya kifuko cha kifuani cha hukumu, ili viwe juu ya moyo wa Haruni anapoingia mbele za BWANA. Hivyo Haruni atabeba daima juu ya moyo wake, mbele za BWANA, hukumu ya Waisraeli.

31Joho linalovaliwa chini ya efodi lifanywe lote kwa samawati. 32Katikati yake kuwe na tundu la kupitishia kichwa. Kuzunguka tundu hilo ushone pindo lililofumwa, kama shingo ya deraya, ili lisichanike. 33Kuzunguka pindo lake ufanye makomamanga ya uzi wa samawati, wa zambarau na wa rangi nyekundu, pande zote, pamoja na kengele za dhahabu katikati yake pande zote, 34kengele ya dhahabu na komamanga, kengele ya dhahabu na komamanga, kuzunguka pindo lote la joho. 35Haruni atalivaa joho hilo anapohudumu. Anapoingia mahali patakatifu kusimama mbele za BWANA, na anapotoka, mlio wake utasikika, na hivyo hatakufa.

36Ufanye bamba la dhahabu safi, uchore juu yake, kama muhuri unavyochorwa, maneno haya: ‘Mtakatifu wa BWANA.’ 37Ulifunge kwa kamba ya samawati na uliweke juu ya kilemba. Mahali pake ni upande wa mbele wa kilemba. 38Haruni alivae kwenye paji la uso wake. Kwa njia hii atabeba hatia ya vitu vitakatifu ambavyo Waisraeli wanaviweka wakfu, zawadi zozote takatifu wanazozileta. Litakuwa juu ya paji la uso wake wakati wote, ili wakubaliwe mbele za BWANA. 39Uifume kanzu ya kitani safi kwa miraba. Kilemba nacho kiwe cha kitani safi. Na mshipi, ufanywe na mtarizi kwa nakshi za rangi. 40Wana wa Haruni nao watakuwa na kanzu; uwashonee pia mishipi na kofia, kwa ajili ya utukufu na uzuri. 41Umvike ndugu yako Haruni mavazi hayo, pamoja na wanawe. Kisha uwapake mafuta, uwasimike na kuwatakasa ili wanitumikie kama makuhani. 42Uwashonee suruali za ndani za kitani ili kufunika uchi wa miili yao; zifike kutoka viunoni hadi mapajani. 43Haruni na wanawe watayavaa wanapoingia katika Hema la Kukutania, au wanapokaribia madhabahu kuhudumu mahali patakatifu; hivyo hawatajiletea hatia na kufa. Ni kanuni ya kudumu milele kwa Haruni na kwa wazao wake baada yake.