Kutoka 7

1BWANA alimwambia Musa, “Tazama, nimekuweka uwe kama Mungu kwa Farao, na ndugu yako Haruni atakuwa nabii wako. 2Sema kila kitu nitakachokupa useme. Kisha ndugu yako Haruni atasema na Farao, ili awaruhusu Waisraeli waondoke katika nchi yake. 3Lakini kwa upande wangu, nitaufanya moyo wa Farao kuwa mgumu, nami nitaijaza nchi ya Misri ishara na maajabu yangu. 4Farao hatawasikiliza. Ndipo nitaunyosha mkono wangu dhidi ya Misri, na kwa matendo makuu ya hukumu nitavitoa katika nchi ya Misri vikosi vyangu, yaani watu wangu Waisraeli. 5Nitakapounyosha mkono wangu dhidi ya Misri na kuwatoa Waisraeli kutoka kati ya watu wake, Wamisri watajua kwamba mimi ndimi BWANA.” 6Basi Musa na Haruni walitii; walifanya sawasawa na BWANA alivyowaambia. 7Walipozungumza na Farao, Musa alikuwa na umri wa miaka themanini, na Haruni miaka themanini na mitatu.

8BWANA aliwaambia Musa na Haruni, 9“Farao akiwadai, ‘Thibitisheni ninyi ni nani kwa kufanya ajabu,’ mwambie Haruni aichukue fimbo yake na kuitupa chini mbele ya Farao. Itageuka kuwa joka.” 10Musa na Haruni walikwenda kwa Farao, wakafanya kama BWANA alivyoamuru. Haruni akaitupa fimbo yake chini mbele ya Farao na baraza lake, nayo ikageuka kuwa joka. 11Farao naye aliwaita wenye hekima wake na wachawi, nao waaguzi wa Misri wakafanya vivyo hivyo kwa uchawi wao. 12Kila mmoja wao akaitupa fimbo yake chini, nazo pia zikawa majoka. Kisha fimbo ya Haruni ikazimeza fimbo zao. 13Lakini moyo wa Farao ukashupaa. Alikataa kuwasikiliza, kama BWANA alivyokuwa amesema.

14BWANA alimwambia Musa, “Farao ni mkaidi moyoni, wala hatawaachilia watu. 15Nenda kwa Farao asubuhi, atakapotoka kwenda majini. Mngoje ukingoni mwa mto Naili, ukiwa umeshika mkononi fimbo ile iliyogeuka kuwa nyoka. 16Mwambie, ‘BWANA, Mungu wa Waebrania, amenituma nikuambie, “Waachilie watu wangu, ili wanitumikie jangwani.” Mpaka sasa umekataa kusikiliza. 17Hili ndilo asemalo BWANA: “Hivi ndivyo utakavyojua kwamba mimi ni BWANA: nitayapiga maji ya Naili kwa fimbo hii iliyo mkononi mwangu, nayo yatakuwa damu. 18Samaki wake watakufa, mto Naili utatoa uvundo, nao Wamisri watashindwa kabisa kunywa maji yake.”’”

19BWANA alimwambia Musa, “Mwambie Haruni, ‘Chukua fimbo yako, unyoshe mkono wako juu ya maji ya Misri, juu ya matawi ya Naili, mifereji yake, madimbwi yake, na kila mahali maji yake yanapokusanywa, ili yawe damu.’ Kutakuwa na damu katika nchi yote ya Misri, hata katika vyombo vya mbao na vya mawe.” 20Musa na Haruni walifanya kama BWANA alivyoamuru. Farao na maafisa wake wakitazama, aliinua fimbo akayapiga maji ya Naili, nayo maji yote ya mto yakageuzwa kuwa damu. 21Samaki wa Naili walikufa, na mto ukaanza kutoa uvundo; Wamisri hawakuweza kunywa maji yake. Kulikuwa na damu kote katika nchi ya Misri. 22Lakini waaguzi wa Misri walifanya vivyo hivyo kwa uchawi wao, na moyo wa Farao ukashupaa. Hakuwasikiliza; ikawa kama BWANA alivyokuwa amesema. 23Farao aligeuka akaenda zake ikulu, bila kulijali hata jambo hili. 24Kwa kuwa hawakuweza kunywa maji ya Naili, Wamisri wote walichimba kandokando ya mto ili kupata maji yanayofaa kunywa. 25Baada ya BWANA kuupiga mto Naili, zilipita siku saba kamili.