Kutoka 13

1BWANA alimwambia Musa, 2“Nitengee kila mzaliwa wa kwanza kati ya Waisraeli, awe mtakatifu kwangu: kila anayetoka kwanza tumboni mwa mama yake, awe mtu au mnyama. Ni wangu.” 3Musa akawaambia watu, “Ikumbukeni siku hii, siku mliyotoka Misri, katika nyumba ya utumwa. BWANA amewatoa mahali hapa kwa nguvu za mkono wake. Msile mkate uliotiwa chachu. 4Mnatoka leo, katika mwezi wa Abibu. 5BWANA atakapokuingiza katika nchi ya Wakanaani, Wahiti, Waamori, Wahivi na Wayebusi, nchi aliyowaapia mababu zako kwamba atakupa, nchi itiririkayo maziwa na asali, utaiadhimisha ibada hii katika mwezi huu huu. 6Kwa siku saba utakula mikate isiyotiwa chachu, na siku ya saba ni sikukuu kwa heshima ya BWANA. 7Mikate isiyotiwa chachu italiwa katika siku zote saba. Kwako kusipatikane mkate uliotiwa chachu, wala chachu yoyote katika mipaka yako yote. 8Siku hiyo mweleze mwanao maana yake: ‘Tunafanya hivi kwa sababu BWANA alitenda kwa ajili yangu nilipotoka Misri.’ 9Sikukuu hii itakuwa ishara kwako, kama alama juu ya mkono wako, na ukumbusho, kama alama kati ya macho yako, ili mafundisho ya BWANA yadumu midomoni mwako. Kwa maana BWANA alikutoa Misri kwa mkono wenye nguvu. 10Basi utaishika kanuni hii kwa wakati wake, mwaka baada ya mwaka.

11Mara BWANA atakapokuwa amekuingiza katika nchi ya Wakanaani na kukukabidhi, kama alivyokuapia wewe na mababu zako, 12ndipo utamkabidhi BWANA kila mzaliwa wa kwanza afunguaye tumbo. Kila mzaliwa wa kwanza wa wanyama wako aliye dume ni wa BWANA. 13Kila punda mzaliwa wa kwanza utamkomboa kwa kutoa mwanakondoo badala yake; usipotaka kumkomboa, utamvunja shingo. Nawe utamkomboa kila mwana wako mzaliwa wa kwanza. 14Baadaye, mwanao atakapokuuliza, ‘Hii ni nini?’ utamjibu, ‘BWANA alitutoa Misri, katika nyumba ya utumwa, kwa nguvu za mkono wake. 15Farao alipojifanya mkaidi asituruhusu kwenda, BWANA aliwaua wazaliwa wote wa kwanza katika nchi ya Misri, wa wanadamu na wa wanyama pia. Kwa hiyo ninamtolea BWANA dhabihu kila dume afunguaye tumbo, na ninamkomboa kila mzaliwa wa kwanza kati ya wanangu.’ 16Itakuwa ishara kwako, kama alama juu ya mkono wako na utepe kati ya macho yako, kwa maana BWANA alitutoa Misri kwa nguvu za mkono wake.”

17Farao alipokwisha kuwaacha watu waende, Mungu hakuwaongoza kwa njia inayoelekea nchi ya Wafilisti, ingawa ilikuwa njia fupi zaidi. Kwa maana Mungu aliwaza, “Watu wanaweza kujutia kuondoka kwao watakapojikuta wakikabiliwa na vita, wakarudi Misri.” 18Badala yake, Mungu aliwapitisha watu njia ndefu ya kuzunguka kupitia nyikani kuelekea Bahari ya Shamu, nao Waisraeli wakatoka nchi ya Misri wakiwa wamejiandaa kwa vita. 19Musa alichukua mifupa ya Yusufu, kwa kuwa Yusufu alikuwa amewafunga Waisraeli kwa kiapo kizito. Alikuwa amesema, “Hakika Mungu atakuja kuwasaidia, na atakapofanya hivyo, mtaichukua mifupa yangu kutoka hapa pamoja nanyi.” 20Waliondoka Sukothi, wakapiga kambi huko Ethamu, pembeni mwa nyika. 21BWANA aliwatangulia, mchana katika nguzo ya wingu ili awaongoze njiani, na usiku katika nguzo ya moto ili kuwaangazia njia. Hivyo waliweza kuendelea na safari mchana na usiku. 22Mchana nguzo ya wingu, na usiku nguzo ya moto, hazikuondoka kamwe mbele ya watu.