Kutoka 31

1BWANA akamwambia Musa, 2“Angalia: nimemchagua Bezaleli kwa jina, mwana wa Uri, mwana wa Huri, wa kabila la Yuda, 3nami nimemjaza Roho wa Mungu, ili awe na hekima, ufahamu na maarifa katika kila aina ya kazi, 4ili kubuni kazi za usanii na kuzitengeneza kwa dhahabu, fedha na shaba, 5kuchonga vito vya kupachikwa, kuchonga mbao, na kufanya kila aina ya kazi ya ustadi. 6Mimi mwenyewe nimemteua pia Oholiabu mwana wa Ahisamaki, wa kabila la Dani, awe msaidizi wake. Mioyoni mwa wote wenye moyo wa hekima nimetia hekima, ili watengeneze yote niliyokuamuru: 7Hema la Kukutania, sanduku la Ushuhuda pamoja na kiti cha rehema kilicho juu yake, na samani nyingine zote za hema; 8meza na vyombo vyake, kinara cha taa cha dhahabu safi pamoja na vyombo vyake vyote, madhabahu ya uvumba, 9madhabahu ya sadaka ya kuteketezwa pamoja na vyombo vyake vyote, birika pamoja na kiweko chake, 10mavazi yaliyofumwa kwa ustadi, yaani mavazi matakatifu ya Haruni kuhani na mavazi ya wanawe wanapohudumu kama makuhani, 11mafuta ya kupaka na uvumba wenye harufu nzuri kwa ajili ya mahali patakatifu. Wafuate kwa kila jambo yale niliyokuamuru.”

12BWANA akamwambia Musa pia, 13“Waambie Waisraeli, ‘Zaidi ya yote, mzishike Sabato zangu. Sabato ni ishara kati yangu na ninyi katika vizazi vyenu vyote, ili mjue kwamba mimi ndimi BWANA, ninayewatenga kuwa watakatifu. 14Basi mtaishika Sabato, kwa sababu ni siku takatifu kwenu. Mtu yeyote akiitia unajisi, atauawa. Mtu yeyote akifanya kazi siku hiyo, atakatiliwa mbali kutoka kati ya watu wake. 15Kuna siku sita za kufanya kazi. Lakini siku ya saba ni Sabato ya pumziko kamili, iliyotengwa kuwa takatifu kwa BWANA. Mtu yeyote atakayefanya kazi siku ya Sabato atauawa. 16Waisraeli waishike Sabato, wakiiadhimisha kizazi hadi kizazi kama agano la kudumu milele. 17Ni ishara kati yangu na Waisraeli milele, kwa sababu kwa siku sita BWANA alifanya mbingu na nchi, na siku ya saba akaacha kufanya kazi, akaburudika.’”

18Alipomaliza kusema na Musa juu ya mlima Sinai, akampa vibao viwili vya Ushuhuda, vibao vya mawe vilivyoandikwa kwa kidole cha Mungu.