Kutoka 29

1Hivi ndivyo utakavyowatakasa ili wawe makuhani wangu: chukua fahali mchanga mmoja na kondoo dume wawili wasio na kasoro, 2na mkate usiotiwa chachu, pamoja na mikate isiyotiwa chachu iliyokandwa kwa mafuta, na mikate myembamba isiyotiwa chachu iliyopakwa mafuta. Itengeneze yote kwa unga laini wa ngano. 3Iweke yote katika kikapu kimoja na kuileta ndani yake, pamoja na fahali na kondoo dume wawili. 4Kisha walete Haruni na wanawe mbele kwenye mlango wa Hema la Kukutania, uwaoshe kwa maji. 5Kisha chukua mavazi ya kikuhani umvike Haruni: kanzu, joho linalovaliwa chini ya efodi, efodi na kifuko cha kifuani. Mfungie efodi kwa ukanda wake uliofumwa. 6Mvike kilemba kichwani, na uifunge taji takatifu kwenye kilemba. 7Kisha chukua mafuta ya kupaka uyamimine juu ya kichwa chake. Ndivyo utakavyompaka mafuta. 8Kisha walete wanawe mbele uwavike kanzu, 9na uwafunge mishipi, Haruni na wanawe, na uwavike kofia vichwani. Ukuhani utakuwa wao kwa kanuni ya kudumu milele. Hivyo utawasimika Haruni na wanawe. 10Mlete fahali mbele ya Hema la Kukutania, na hapo Haruni na wanawe wataweka mikono yao juu ya kichwa chake. 11Mchinje fahali hapo mbele za BWANA, kwenye mlango wa Hema la Kukutania. 12Kwa kidole chako, paka sehemu ya damu ya fahali kwenye pembe za madhabahu, na damu yote iliyobaki uimwage chini ya madhabahu. 13Ondoa shahamu yote inayofunika viungo vya ndani, kipande kilicho juu ya ini, na figo mbili pamoja na shahamu yake, uvifukize juu ya madhabahu. 14Nyama ya fahali, ngozi yake na mavi yake, uviteketeze kwa moto nje ya kambi. Ni sadaka ya dhambi. 15Kisha mchukue kondoo dume wa kwanza. Haruni na wanawe wataweka mikono yao juu ya kichwa chake. 16Mchinje kondoo dume, uikusanye damu yake na kuirusha kwenye madhabahu pande zote. 17Mkate kondoo dume vipande vipande. Osha viungo vyake vya ndani na miguu yake, uviweke pamoja na vipande vyake na kichwa chake. 18Mfukize kondoo dume mzima juu ya madhabahu kama sadaka ya kuteketezwa kwa BWANA. Ni sadaka ya kuteketezwa kwa moto kwa BWANA, yenye harufu inayompendeza. 19Kisha mchukue kondoo dume yule mwingine, na Haruni na wanawe wataweka mikono yao juu ya kichwa chake. 20Mchinje kondoo dume huyo uchukue sehemu ya damu yake. Itie kwenye ndewe ya sikio la kulia la Haruni na kwenye ndewe za masikio ya kulia ya wanawe, kwenye vidole gumba vya mikono yao ya kulia na kwenye vidole gumba vya miguu yao ya kulia. Damu iliyobaki uirushe kwenye madhabahu pande zote. 21Kisha chukua kiasi kidogo cha damu iliyo juu ya madhabahu na cha mafuta ya kupaka, uvinyunyize juu ya Haruni na mavazi yake, na juu ya wanawe na mavazi yao pia. Kwa njia hiyo Haruni na wanawe watakuwa watakatifu, na mavazi yao yatakuwa matakatifu. 22Chukua shahamu ya kondoo dume huyu, mkia wake mnono, shahamu inayofunika viungo vya ndani, kipande cha ini, figo mbili pamoja na shahamu inayozizunguka, na paja la kulia, kwa sababu huyu ndiye kondoo dume wa kusimikwa, 23pamoja na mkate mmoja wa mviringo, mkate mmoja uliotengenezwa kwa mafuta, na mkate mmoja mwembamba, kutoka katika kikapu cha mikate isiyotiwa chachu kilichowekwa mbele za BWANA. 24Weka vitu hivyo vyote katika mikono iliyokunjuliwa ya Haruni na wanawe, uvitoe kwa BWANA kwa kuvitikisa, kuwa sadaka ya kutikiswa. 25Kisha vichukue kutoka mikononi mwao uvifukize juu ya madhabahu, juu ya sadaka ya kuteketezwa, kuwa harufu ya kupendeza kwa BWANA. Ni sadaka ya kuteketezwa kwa moto kwa BWANA. 26Kisha chukua kidari cha kondoo dume aliyetumika kumsimika Haruni, ukitoe kwa BWANA kuwa sadaka ya kutikiswa. Kipande hicho kitakuwa fungu lako. 27Takasa kidari cha sadaka ya kutikiswa na paja la mchango, yaani sehemu za kondoo dume wa kusimikwa zilizotikiswa na kuinuliwa, fungu ambalo ni la Haruni na wanawe. 28Hili litakuwa fungu la kudumu ambalo Haruni na wanawe watapokea kutoka kwa Waisraeli. Ni mchango: kila mara Waisraeli watakapotoa sadaka za amani, sehemu hii ni mchango wao kwa BWANA. 29Mavazi matakatifu yaliyotengenezwa kwa ajili ya Haruni yatakuwa ya wanawe baada yake. Watayavaa wanapopakwa mafuta na kusimikwa. 30Kwa siku saba, yule mmoja wa wanawe atakayekuwa kuhani mahali pake atayavaa, atakapoingia katika Hema la Kukutania kuhudumu katika mahali patakatifu. 31Kuhusu kondoo dume wa kusimikwa, itokose nyama yake katika mahali patakatifu. 32Haruni na wanawe wataila nyama ya kondoo dume, pamoja na mikate iliyobaki katika kikapu, hapo kwenye mlango wa Hema la Kukutania. 33Vitu vilivyotumika kuwafanyia upatanisho, walipokuwa wakisimikwa na kutakaswa, vitakuwa chakula chao. Mtu wa nje asile chochote katika hivyo, kwa kuwa ni vitakatifu. 34Ikiwa sehemu ya nyama ya kusimikwa au ya mkate itabaki mpaka asubuhi, utakiteketeza kilichobaki. Mtu yeyote asikile, kwa kuwa ni kitakatifu. 35Watendee Haruni na wanawe kila kitu sawasawa na nilivyokuamuru. Tumia siku saba kuwasimika. 36Kila siku utatoa fahali kuwa sadaka ya dhambi kwa ajili ya upatanisho. Utaisafisha madhabahu kutokana na dhambi unapoifanyia upatanisho, nawe utaipaka mafuta ili iwe takatifu. 37Kwa siku saba mfululizo utaifanyia madhabahu upatanisho na kuitakasa, nayo itakuwa takatifu kabisa. Kitu chochote kitakachogusana na madhabahu kitakuwa kitakatifu.

38Hiki ndicho utakachotoa juu ya madhabahu siku kwa siku bila kukosa: wana-kondoo wawili wa mwaka wa kwanza. 39Mwana-kondoo mmoja utamtoa asubuhi, na wa pili jioni inapoingia. 40Pamoja na mwana-kondoo wa kwanza, kutakuwa na unga laini kiasi cha kama lita 2, uliochanganywa na mafuta safi ya zeituni yaliyokamuliwa kiasi cha kama lita 1, na divai kiasi cha kama lita 1 kuwa sadaka ya kinywaji. 41Mwana-kondoo wa pili utamtoa jioni inapoingia. Andaa pamoja naye sadaka ya nafaka na sadaka ya kinywaji kama zile za asubuhi. Ni sadaka ya kuteketezwa kwa moto kwa BWANA, yenye harufu inayompendeza. 42Hii itakuwa sadaka ya kuteketezwa ya kila siku, kizazi baada ya kizazi, kwenye mlango wa Hema la Kukutania mbele za BWANA. Hapo ndipo nitakapokutana nanyi, ili kusema nawe. 43Hapo nitakutana na Waisraeli, na utukufu wangu utalifanya hema kuwa takatifu. 44Hema la Kukutania na madhabahu nitavifanya kuwa vitakatifu, na Haruni na wanawe nitawatenga kuwa watakatifu ili wanitumikie kama makuhani. 45Nitafanya makao yangu kati ya Waisraeli, nami nitakuwa Mungu wao. 46Ndipo watakapojua kwamba mimi ndimi BWANA Mungu wao. Niliwatoa katika nchi ya Misri kwa kusudi hili: ili nifanye makao yangu kati yao. Ndimi BWANA Mungu wao.