Kutoka 5

1Baada ya hayo, Musa na Haruni waliingia kwa Farao, wakamwambia, “BWANA, Mungu wa Israeli, asema hivi: ‘Waachilie watu wangu waende nyikani wakanifanyie sikukuu.’” 2Farao akajibu, “BWANA ni nani, hata nifanye anavyosema na kumwachilia Israeli? Simjui BWANA, na hakika sitamwacha Israeli aende.” 3Wakasema, “Mungu wa Waebrania amekuja kukutana nasi. Tafadhali turuhusu tusafiri mwendo wa siku tatu nyikani, tumtolee BWANA Mungu wetu dhabihu, la sivyo atatupiga kwa magonjwa au kwa vita.” 4Mfalme wa Misri akawajibu, “Musa na Haruni, kwa nini mnawavuruga watu wasifanye kazi zao? Rudini kwenye kazi zenu za kulazimishwa!” 5Farao akaendelea, “Tazameni jinsi watu hawa wa nchi walivyokuwa wengi sasa, nanyi mnataka kuwapumzisha na kazi zao!” 6Siku hiyo hiyo Farao aliwaamuru wanyapara wa watu na wasimamizi wao, 7“Msiwape watu tena majani ya kutengenezea matofali kama mlivyokuwa mkifanya. Waende wenyewe wakakusanye majani yao. 8Lakini wadaini idadi ile ile ya matofali kama zamani; msiipunguze. Ni wavivu, ndiyo sababu wanapiga kelele, wakisema, ‘Twende tukamtolee Mungu wetu dhabihu.’ 9Wazidishieni watu hao kazi; washughulike nayo ili wasisikilize maneno ya uongo.” 10Basi wanyapara na wasimamizi walitoka, wakawatangazia watu, “Farao asema hivi: ‘Sitawapa majani tena. 11Nendeni ninyi wenyewe mkajitafutie majani popote mtakapoyapata. Lakini kazi yenu haitapunguzwa hata kidogo.’” 12Watu walienea katika nchi yote ya Misri kukusanya mabua ya kutumia kama majani. 13Wanyapara waliendelea kuwasukuma: “Malizeni kazi yenu, kiasi cha kila siku katika siku yake, kama mlivyofanya mlipokuwa mkipewa majani.” 14Wasimamizi wa Kiisraeli, ambao wanyapara wa Farao walikuwa wamewaweka kuwa wakuu wa kazi, walipigwa na kuulizwa, “Kwa nini jana na leo hamkukamilisha idadi yenu ya matofali kama zamani?” 15Ndipo wasimamizi wa Kiisraeli walipokwenda kumlalamikia Farao: “Kwa nini unawatendea watumishi wako namna hii? 16Watumishi wako hawapewi majani, hata hivyo tunaambiwa, ‘Fanyeni matofali!’ Sasa watumishi wako wanapigwa, ingawa wenye kosa ni watu wako mwenyewe.” 17Lakini yeye akajibu, “Ninyi ni wavivu, wavivu tu! Ndiyo maana mnaendelea kusema, ‘Twende tukamtolee BWANA dhabihu.’ 18Sasa nendeni mkafanye kazi. Hamtapewa majani, lakini ni lazima mlete idadi kamili ya matofali.” 19Wasimamizi wa Kiisraeli walitambua kwamba wamo katika taabu kubwa walipoambiwa, “Msipunguze idadi yenu ya matofali ya kila siku.” 20Walipotoka mbele ya Farao, waliwakuta Musa na Haruni wamesimama pale wakiwangoja. 21Wakawaambia, “BWANA na aone mlichofanya, awahukumu! Mmetufanya tuchukiwe na Farao na maafisa wake, nanyi mmewapa upanga mkononi ili watuue.” 22Musa akamgeukia BWANA, akasema, “Bwana, kwa nini umewaletea watu hawa mabaya? Kwa nini basi ulinituma? 23Tangu nilipokwenda kusema na Farao kwa jina lako, amewatesa watu hawa, nawe hujafanya lolote kabisa kuwaokoa watu wako.”