Kutoka 20

1Mungu aliyatamka maneno haya yote, akasema,

2“Mimi ni BWANA Mungu wako. Nilikuleta nje ya nchi ya Misri, kutoka nyumba ulimotumikishwa kama mtumwa. 3Hutakuwa na mungu mwingine yeyote kando yangu. 4Hutajitengenezea sanamu iliyochongwa, wala sura ya kitu chochote kilichoko mbinguni juu, katika ardhi chini, au ndani ya maji yaliyo chini ya ardhi. 5Hutaviinamia wala kuvitumikia. Kwa maana ndimi BWANA Mungu wako, Mungu mwenye wivu. Ninaleta hatia ya baba juu ya watoto wao, juu ya vizazi vya tatu na vya nne vya wale wanaonichukia, 6lakini maelfu ya wale wanaonipenda na kutii amri zangu ninawaonyesha upendo wa uaminifu.

7Hutalitumia jina la BWANA Mungu wako kwa uongo au kwa mambo yasiyo na maana, kwa maana BWANA hatamwachilia mtu yeyote anayelitumia jina lake hivyo bila kumwadhibu.

8Kumbuka siku ya Sabato, uitenge iwe takatifu. 9Una siku sita za kufanya kazi na kumaliza shughuli zako zote, 10lakini siku ya saba ni Sabato kwa ajili ya BWANA Mungu wako. Siku hiyo usifanye kazi yoyote, iwe wewe, mwanao au binti yako, mtumishi wako wa kiume au wa kike, mifugo yako, au mgeni anayeishi nawe katika miji yako. 11Kwa maana BWANA alifanya mbingu na dunia, bahari na kila kilichomo ndani yake, kwa siku sita, na siku ya saba akapumzika. Kwa sababu hiyo BWANA aliibariki siku ya Sabato na kuitakasa.

12Waheshimu baba yako na mama yako. Ndipo utaishi muda mrefu katika nchi ambayo BWANA Mungu wako atakupa.

13Usiue. 14Usizini. 15Usiibe. 16Usitoe ushahidi wa uongo dhidi ya jirani yako.

17Hutaitamani nyumba ya jirani yako: usimmezee mate mke wake, wala mtumishi wake wa kiume au wa kike, wala ng’ombe wake au punda wake, wala kitu kingine chochote ambacho ni mali ya jirani yako.”

18Watu wote walishuhudia ngurumo na umeme, mlio wa pembe ya kondoo dume na mlima uliokuwa ukifuka moshi. Walipoona hayo, walitetemeka, wakajiweka mbali. 19Walimwambia Musa, “Wewe ndiye useme nasi, nasi tutakusikiliza. Lakini Mungu asiseme nasi, la sivyo tutakufa.” 20Musa aliwajibu watu, “Msiogope. Mungu amekuja kuwapima, na kuweka kicho chake mbele ya macho yenu, ili msitende dhambi.” 21Basi watu walibaki mbali, na Musa akasogea karibu kabisa na giza zito alimokuwa Mungu.

22BWANA alimwambia Musa, “Waambie Waisraeli hivi: ‘Mliona kwa macho yenu wenyewe kwamba nilisema nanyi kutoka mbinguni. 23Msifanye miungu ya kushiriki nafasi yangu; msijitengenezee miungu ya fedha wala ya dhahabu. 24Utanijengea madhabahu ya udongo, na juu yake utoe sadaka zako za kuteketezwa na sadaka zako za amani, kutoka katika makundi yako ya kondoo na mbuzi na ya ng’ombe. Mahali popote nitakapolifanya jina langu likumbukwe, nitakujia na kukubariki. 25Kama utanijengea madhabahu ya mawe, isijengwe kwa mawe yaliyochongwa. Mara unapopitisha kifaa chako juu yake, unaiondolea utakatifu wake. 26Usipande madhabahu yangu kwa kutumia ngazi, ili uchi wako usionekane hapo.