Kutoka 17

1Jumuiya yote ya Waisraeli iliondoka katika jangwa la Sini, ikisafiri hatua kwa hatua kama BWANA alivyoagiza. Walipiga kambi Refidimu, lakini hapakuwa na maji ya kunywa kwa ajili ya watu. 2Watu walimgeukia Musa wakagombana naye. “Tupeni maji ya kunywa!” wakadai. Musa akawajibu, “Kwa nini mnaanzisha ugomvi nami? Kwa nini mnamjaribu BWANA?” 3Lakini watu waliona kiu huko, wakamnung’unikia Musa. “Kwa nini ulitutoa Misri?” walisema. “Je, ni ili tufe kwa kiu pamoja na watoto wetu na wanyama wetu?” 4Musa alimlilia BWANA, “Nifanye nini na watu hawa? Hali hii ikiendelea kidogo tu, watanipiga mawe!” 5BWANA alimwambia Musa, “Tangulia mbele ya watu, uwachukue baadhi ya wazee wa Israeli pamoja nawe. Chukua pia fimbo yako, ile uliyoupiga nayo mto Naili; ishike mkononi, uende. 6Tazama, mimi nitasimama huko mbele yako, juu ya mwamba ulioko Horebu. Utaupiga mwamba, na maji yatabubujika kutoka ndani yake, nao watu watakunywa.” Musa alifanya hivyo, wazee wa Israeli wakiwa wanatazama. 7Alipaita mahali pale Masa, “Kujaribu,” na Meriba, “Ugomvi,” kwa sababu huko Waisraeli waligombana, na huko walimjaribu BWANA kwa kuuliza, “Je, BWANA yuko pamoja nasi au hayuko?”

8Kisha Waamaleki walikuja wakapigana vita na Israeli huko Refidimu. 9Musa alimwambia Yoshua, “Tuchagulie watu, utoke ukapigane vita na Amaleki. Kesho nitasimama juu ya kilele cha kilima, nikiwa nimeishika fimbo ya Mungu mkononi mwangu.” 10Yoshua alifanya kama Musa alivyomwambia, akapigana na Amaleki, huku Musa, Haruni na Huri wakipanda juu ya kilele cha kilima. 11Kila Musa alipoushikilia mkono wake juu, Israeli walishinda; na kila alipoushusha, Amaleki walishinda. 12Mikono ya Musa ilipochoka, walichukua jiwe wakaliweka chini yake, naye akaketi juu yake. Haruni na Huri wakaishikilia mikono yake juu, mmoja upande huu na mwingine upande ule, hivyo mikono yake ikabaki imara mpaka jua lilipotua. 13Hivyo Yoshua aliwaangusha Amaleki na wapiganaji wake kwa makali ya upanga.

14Kisha BWANA alimwambia Musa, “Liandike jambo hili katika gombo ili likumbukwe, umwambie Yoshua maneno haya: nitaifuta kabisa kumbukumbu ya Amaleki chini ya mbingu.” 15Kisha Musa alijenga madhabahu huko, akaiita jina “BWANA Ni Bendera Yangu.” 16Akasema, “Mkono umeinuliwa kuelekea kiti cha enzi cha BWANA! BWANA atapigana na Amaleki kizazi baada ya kizazi.”